കുവൈത്ത് സിറ്റി: ട്രാൻസ് ഫാറ്റ് തടയുന്നതിനുള്ള ഗൾഫ് സ്റ്റാൻഡേർഡ് സ്പെസിഫിക്കേഷനുകളും സാങ്കേതിക നിയന്ത്രണങ്ങളും പാലിക്കുന്നതിന്റെ ഭാഗമായി അടിസ്ഥാന ഭക്ഷണ ഗ്രൂപ്പുകൾക്കനുസൃതമായി ദൈനംദിന ഭക്ഷണ ഘടകങ്ങളുടെ ക്രമീകരണം കണക്കിലെടുത്ത് ജനറൽ അതോറിറ്റി ഫോർ ഫുഡ് ആൻഡ് ന്യൂട്രീഷൻ തയ്യാറാക്കിയ സ്കൂൾ കഫ്റ്റീരിയ ചട്ടങ്ങൾക്ക് ആരോഗ്യമന്ത്രി ഡോ. അഹമ്മദ് അൽ-അവാദി അംഗീകാരം നൽകി

ഫത്‌വ ആൻഡ് ലജിസ്ലേഷൻ ഡിപ്പാർട്ട്‌മെന്‍റിന്‍റെ അംഗീകാരത്തിനും ഡയറക്ടർ ബോർഡിന്‍റെ അനുമതിക്കും ശേഷമാണ് ജനറൽ അതോറിറ്റി ഫോർ ഫുഡ് ആൻഡ് ന്യൂട്രീഷൻ തയ്യാറാക്കിയ നിയന്ത്രണങ്ങൾക്ക് അംഗീകാരം നൽകിയത്. ഔദ്യോഗിക ഗസറ്റിൽ പ്രസിദ്ധീകരിക്കുന്ന തീയതി മുതൽ ഈ തീരുമാനം പ്രാബല്യത്തിൽ വരും. 

വിദ്യാർത്ഥികളെ അനാരോഗ്യകരമായ ഭക്ഷണരീതികളിൽ നിന്ന് സംരക്ഷിക്കുന്നതിനും സ്കൂളുകളിൽ നൽകുന്ന ഭക്ഷണത്തിന്റെ ഗുണനിലവാരം ആധുനിക ആരോഗ്യ-പോഷകാഹാര മാനദണ്ഡങ്ങളുമായി പൊരുത്തപ്പെടുത്തുന്നതിനും വിദ്യാർത്ഥികളുടെ സുരക്ഷയ്ക്ക് മുൻഗണന നൽകുന്ന ഒരു ആരോഗ്യകരമായ വിദ്യാഭ്യാസ അന്തരീക്ഷം സ്ഥാപിക്കുന്നതിനുമുള്ള ശ്രമങ്ങളുടെ ഭാഗമായാണ് ഈ നിയന്ത്രണം അംഗീകരിച്ചതെന്ന് മന്ത്രാലയം സൂചിപ്പിച്ചു.

പുതിയ സ്കൂൾ കാന്റീൻ ചട്ടങ്ങൾ പൊതു, സ്വകാര്യ സ്കൂളുകളിലെ കാന്റീനുകളുടെ പ്രവർത്തനം നിയന്ത്രിക്കുന്ന ഒരു സമഗ്രമായ നിയന്ത്രണ രേഖയാണെന്ന് അദ്ദേഹം ചൂണ്ടിക്കാട്ടി. സൗകര്യങ്ങളും ജീവനക്കാരും സംബന്ധിച്ച കൃത്യമായ ആവശ്യകതകൾ, വിളമ്പുന്ന ഭക്ഷണത്തിന് ആവശ്യമായ മാനദണ്ഡങ്ങൾ, മേൽനോട്ട, പരിശോധന സംവിധാനങ്ങൾ, സ്കൂൾ പരിതസ്ഥിതിയിൽ സന്തുലിതവും സുരക്ഷിതവുമായ ഭക്ഷണം ഉറപ്പാക്കുന്ന ഒരു ലൈസൻസിംഗ്, ഉത്തരവാദിത്ത സംവിധാനം എന്നിവ അവയിൽ ഉൾപ്പെടുന്നു. അതിൽ ഭക്ഷണം കൈകാര്യം ചെയ്യുന്നതിൽ കുറഞ്ഞത് രണ്ട് വർഷത്തെ പരിചയം, സാധുവായ ആരോഗ്യ ലൈസൻസ്, തൊഴിൽ ആരോഗ്യ, സുരക്ഷാ ആവശ്യകതകൾ പാലിക്കൽ എന്നിവ ഉൾപ്പെടുന്നു.