സോൾ. യുഎസ് പ്രസിഡൻ്റ് ഡോണൾഡ് ട്രംപും ചൈനീസ് പ്രസിഡന്റ് ഷി ചിൻപിങ്ങും ദക്ഷിണ കൊറിയയിലെ ബുസാനിൽ കൂടിക്കാഴ്ച‌ നടത്തി. എപെക് (ഏഷ്യ പസിഫിക് ഇക്കണോമിക് കോ ഓപ്പറേഷൻ) ഉച്ചകോടിക്കിടെയായിരുന്നു കൂടിക്കാഴ്ച്‌ച. വിശദമായ ചർച്ചകൾ ഇന്നു നടക്കും.

ആറു വർഷത്തിനുശേഷമാണ് രണ്ടു നേതാക്കളും കുടിക്കാഴ്ച നടത്തുന്നത്. തീരുവ വിഷയത്തിൽ ഇരു രാജ്യങ്ങളും തമ്മിൽ തർക്കങ്ങൾ നിലനിൽക്കുന്നതിനിടെയാണ് കുടിക്കാഴ്ച. ചൈനയുമായി വ്യാപാര കരാർ ഒപ്പിടുമെന്ന സൂചന ട്രംപ് നൽകി. ചൈനയുമായി ദീർഘകാലത്തേക്ക് അതിഗംഭീരമായ ബന്ധമുണ്ടാകുമെന്ന് കരുതുന്നതായും ട്രംപ് പറഞ്ഞു. ഇരു രാജ്യങ്ങൾക്കും പരസ്‌പരം സഹകരിച്ചു പ്രവർത്തിക്കാനാകുമെന്ന് ഷി ചിൻപിങ് പറഞ്ഞു.

ചൈനീസ് സ്‌ഥാപനമായ ടിക് ടോക്കിനെ യുഎസ് കമ്പനികൾക്കു വിൽക്കുന്നതു പ്രധാന ചർച്ചയാകും. ചൈനയിൽനിന്നുള്ള അപൂർവ ധാതു കയറ്റുമതി നിയന്ത്രണം മരവിപ്പിക്കുന്നതും യുഎസിൽനിന്നുള്ള സെമി കണ്ടക്ടർ ചിപ് കയറ്റുമതി നിയന്ത്രണം എടുത്തുകളയുന്നതും സംബന്ധിച്ച് തീരുമാനമാകും.