നേപ്പാളിലുടനീളം തെരുവിലിറങ്ങിയിരിക്കുന്നത് ചെറുപ്പക്കാരാണ്. സർക്കാർ, സ്വകാര്യ സ്‌കുളുകളിൽ നിന്നുള്ള വിദ്യാർഥികളും നിയമ ബിരുദധാരികളും സർവകലാശാലാ വിദ്യാർഥികളും ഇക്കൂട്ടത്തിലുണ്ട്. സമൂഹത്തിൻ്റെ നാനാതുറകളിൽ നിന്നുള്ളവരാണിവർ: തൊഴിലില്ലായ്‌മയിൽ നിരാശരായവർ, പരിമിതമായ അവസരങ്ങളിൽ ബുദ്ധിമുട്ടുന്നവർ, നിഷ്ക്രിയരായി ഇരിക്കേണ്ടി വരുന്നവർ. ഇതാണ് 'ജെൻ സി.' നിശ്ചയദാർഢ്യമുള്ള, നിശ്ശബ്ദരാക്കാനാവാത്ത യുവത്വം.

കഴിഞ്ഞ 2 വർഷമായി യുവതലമുറയ്ക്കിടയിൽ അമർഷം പുകയുകയായിരുന്നു. അഴിമതി, തൊഴിലില്ലായ്മ‌, ഏകാധിപത്യത്തിലേക്കു നീങ്ങുന്ന സർക്കാർ എന്നിവയെല്ലാം അവരുടെ നിത്യ ജീവിതത്തിൽ ഭാരമായി. സർക്കാർ തസ്തികകൾക്കായി ഇടനിലക്കാർ വിലപേശുന്നെന്നും രാഷ്ട്രീയ നിയമനങ്ങൾ പോലും ഇത്തരം ഇടപാടുകളിലൂടെയാണ് തീരുമാനിക്കപ്പെടുന്നതെന്നും ആരോപണമുയർന്നു.