വർണ്ണ കാഴ്ചകളുടെ വിസ്‌മയ ലോകം ഒരുക്കി നോട്ടിംഗ് ഹിൽ കാർണിവൽ. ലോക പ്രശസ്തമായ, യൂറോപ്പിലെ ഏറ്റവും വലിയ സ്ട്രീറ്റ് പാർട്ടി ഞായറാഴ്ച രാവിലെ നടത്തിയ സ്ട്രീറ്റ് പരേഡോടെയാണ് ആരംഭിച്ചത്. തെരുവുകളിൽ നിറങ്ങളും സംഗീതവും നൃത്തവും നിറഞ്ഞതോടെ വെസ്റ്റ് ലണ്ടൻ വീണ്ടും സജീവമായി. കരീബിയൻ സംസ്കാരവും ചരിത്രവും ആഘോഷിക്കുന്ന ഈ വാർഷിക പരിപാടി 50 വർഷത്തിലേറെയായി ബ്രിട്ടനിൽ നടത്തപ്പെടുന്നു. യൂറോപ്പിലെ ഏറ്റവും വലിയ തെരുവ് പാർട്ടിയാണിത്.

-------------------aud--------------------------------

കരീബിയൻ പ്രദേശത്തുടനീളമുള്ള ആയിരക്കണക്കിന് കലാകാരന്മാർ അലങ്കരിച്ച, രത്നങ്ങൾ പതിച്ച വസ്ത്രങ്ങളിലും ഫ്ലോട്ടുകളിലും പരേഡിൽ പങ്കെടുത്തു. ബജാൻ റോ ലിക്കർ, മഹാഗണി, ചോക്ലേറ്റ് നേഷൻ, മാസ് ആഫ്രിക്ക, വിൻസി അലയൻസ്, യുണൈറ്റഡ് ക്രെയോൾ എന്നിവയുൾപ്പെടെയുള്ള ഗ്രൂപ്പുകളും ബ്രസീലിയൻ സാംബ സ്കൂളുകളും യുകെ കമ്മ്യൂണിറ്റി ബാൻഡുകളും പരേഡിൽ പങ്കെടുത്തു. തെരുവുകളിൽ, വർണ്ണപ്പകിട്ടാർന്ന ഫാഷൻ വസ്ത്രങ്ങളും സംഗീതവും നൃത്തവും നിറയുന്ന, കരീബിയൻ സംസ്‌കാരത്തിന്റെയും ചരിത്രത്തിന്റെയും ഈ വാർഷികാഘോഷത്തിൽ ഏകദേശം പത്ത് ലക്ഷത്തോളം പേർ പങ്കെടുക്കുമെന്നാണ് പ്രതീക്ഷിക്കുന്നത്. 1966 മുതൽ ലണ്ടനിലെ ബറോയിൽ ഇത് വർഷത്തിൽ ഒരിക്കൽ കൊണ്ടാറുള്ളതാണ്. പടിഞ്ഞാറൻ ലണ്ടനിലെ ലാഡ്‌ബ്രോക്ക് ഗ്രോവ്, ഗ്രെയ്റ്റ് വെസ്റ്റേൺ റോഡ്, വെസ്റ്റ്‌ബേൺ പാർക്ക് എന്നിവിടങ്ങളിലൂടെയുള്ള മൂന്ന് മൈൽ നീളുന്ന പരേഡിൽ പങ്കെടുത്തവരിൽ ചിലർ ജമൈക്ക, സെയിന്റ് കിറ്റ്‌സ് ആൻഡ് നെവിസ്, ബാർബഡോസ് തുടങ്ങിയ രാജ്യങ്ങളിലെ പതാകകളും ഉയർത്തി പിടിച്ചിരുന്നു. വ്യത്യസ്ത സംസ്കാരങ്ങളെ ഒരുമിച്ച് കൊണ്ടുവന്നതും സന്ദർശകർക്ക് വിസ്‌മയ കാഴ്ചയേകി.