അർജന്റീന ഇതിഹാസം ലയണൽ മെസി ഫുട്‌ബോളിൽ നേടാത്ത കിരീടങ്ങളില്ല. 37ാം വയസിലും താരം കളത്തിൽ സജീവം. ലോകകപ്പും കോപ്പ അമേരിക്കയും ചാംപ്യൻസ് ലീഗും ക്ലബ് ലോകകപ്പും ഒളിംപിക്‌സ് സ്വർണവും അടക്കം എണ്ണം പറഞ്ഞ കിരീടങ്ങളെല്ലാം ആ ഷോക്കേസിലുണ്ട്. ഫിഫ ദി ബെസ്റ്റ്, ബാല്ലൺ ഡി ഓർ ഉൾപ്പെടെ വ്യക്തിഗത പുരസ്‌കാരങ്ങൾ വേറെയും.ഏറ്റവും പുതിയ ഫിഫ ദി ബെസ്റ്റ് പട്ടിക പുറത്തുവിട്ടപ്പോൾ ആരാധകർ പക്ഷേ ഞെട്ടിപ്പോയി. കാരണം ഫിഫയുടെ പുരസ്‌കാര പട്ടികയിൽ ലയണൽ മെസി അപ്രതീക്ഷിതമായി ഉൾപ്പെട്ടതാണ് അമ്പരപ്പിച്ചത്. മികച്ച മുന്നേറ്റ താരങ്ങളുടെ പുരസ്കാര പട്ടികയിലും മെസിയുടെ പേരുണ്ട്. ഇതോടെ സാമൂഹിക മാധ്യമങ്ങളിൽ ആരാധകർ രണ്ട് തട്ടിലായി ചർച്ചയും തുടങ്ങി.