സെക്കന്തരാബാദിലെ ബിആർഎസ് എംഎൽഎ ലാസ്യ നന്ദിത  വാഹനാപകടത്തിൽ കൊല്ലപ്പെട്ടു. സ്വന്തം കാറിൽ യാത്ര ചെയ്യവേ അമിൻപൂർ മണ്ഡൽ ഏരിയയിലെ സുൽത്താൻപൂർ ഔട്ടർ റിംഗ് റോഡിൽ വച്ച് അവരുടെ കാർ നിയന്ത്രണം നഷ്ടപ്പെട്ട് ഡിവൈഡറിൽ ഇടിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ എംഎൽഎ ലാസ്യ നന്ദിത ചികിത്സയിലിരിക്കെയാണ് മരണപ്പെട്ടത്. എംഎൽഎയുടെ കാർ ഡ്രൈവർക്കും ഗുരുതരമായി പരിക്കേറ്റിട്ടുണ്ട്. ഇയാൾ ആശുപത്രിയിൽ ചികിത്സയിലാണ്. കാർ ഡ്രൈവർ അപകടനില തരണം ചെയ്തിട്ടില്ല എന്നാണ് റിപ്പോർട്ടുകൾ. ലാസ്യ നന്ദിതയുടെ ആകസ്മിക നിര്യാണത്തിൽ ബിആർഎസ് മേധാവി കെസിആർ അനുശോചനം രേഖപ്പെടുത്തി.
യുവ എംഎൽഎ എന്ന നിലയിൽ ഏറെ പ്രശസ്തയായിരുന്നു ലാസ്യ നന്ദിതയെന്നും അവരുടെ മരണം ഞെട്ടലുണ്ടാക്കിയെന്നും അദ്ദേഹം പറഞ്ഞു. ഈ സാഹചര്യത്തിൽ ലാസ്യ നന്ദിതയുടെ കുടുംബാംഗങ്ങളുടെ ദുഃഖത്തിൽ പങ്കുചേരുന്നുവെന്നും അദ്ദേഹം വ്യക്തമാക്കി. അതേസമയം യുവ എംഎൽഎയുടെ മരണത്തിൽ ദുഖം രേഖപ്പെടുത്തി തെലങ്കാന മുഖ്യമന്ത്രി രേവന്തി റെഡ്ഡി രംഗത്തെത്തി. സമൂഹമാധ്യമങ്ങളിലൂടെയാണ് അദ്ദേഹം പ്രതികരിച്ചത്.
 നന്ദിതയുടെ മരണത്തിൽ ദുഖം രേഖപ്പെടുത്തി കെടി രാമറാവുവും രംഗത്തെത്തി. എക്‌സിലൂടെയാണ് അദ്ദേഹം അനുശമാചനം അറിയിച്ചത്. ലാസ്യ നന്ദിതയുടെ വിയോഗം തന്നെ ഏറെ ഞെട്ടിച്ചുവെന്നും ഈ ദുഷ്‌കരമായ സമയത്ത് അദ്ദേഹത്തിൻ്റെ കുടുംബത്തോടും സുഹൃത്തുക്കളോടും എൻ്റെ അനുശോചനം രേഖപ്പെടുത്തുന്നുവെന്നും കെടിആർ കുറിച്ച് .
കഴിഞ്ഞ വർഷം നടന്ന നിയമസഭാ തെരഞ്ഞെടുപ്പിൽ ബിജെപി സ്ഥാനാർത്ഥിയെ പരാജയപ്പെടുത്തിയാണ് 37 കാരിയായ ലാസ്യ ആദ്യമായി സെക്കന്തരാബാദ് കാൻ്റി സീറ്റിൽ നിന്ന് എംഎൽഎയായത്. നന്ദിതയുടെ  പിതാവും ഇതേ സീറ്റിൽ നിന്ന് അഞ്ച് തവണയാണ് എംഎൽഎയായത്.