രാജ്യത്തെ എയർപ്പോർട്ടുകളിൽ നിന്ന്​ ടാക്​സി പെർമിറ്റില്ലാതെ യാത്രക്കാരെ കയറ്റികൊണ്ടുപോകുന്നവർക്ക് മുന്നറിയിപ്പുമായി പൊതുഗതാഗത അതോറിറ്റി.ഉത്തരവ് ലംഗിക്കുന്നവർക്ക് 5000 റിയാൽ പിഴ ചുമത്തുമെന്നാണ് അതോറിറ്റി പറയുന്നത് .അനധികൃത ടാക്​സികൾക്കെതിരെ പിഴ ചുമത്തൽ നടപടി ഗതാഗത അതോറിറ്റി ആരംഭിച്ചു​. ഇത്തരം സർവിസ്​ നടത്തുന്നവർ അവരുടെ വാഹനങ്ങൾ ടാക്​സി ലൈസൻസുള്ള ഏതെങ്കിലും കമ്പനികൾക്ക് കീഴിൽ ചേർക്കണ​മെന്നും അതോറിറ്റി ആവശ്യപ്പെട്ടു.

വ്യാജ ടാക്​സി സർവിസുകൾക്കെതിരെ ആഭ്യന്തര മന്ത്രാലയം, ഗസ്​റ്റ്​സ്​ ഓഫ് ഗോഡ് സർവിസ് പ്രോഗ്രാം, പബ്ലിക് പ്രോസിക്യൂഷൻ, ജനറൽ അതോറിറ്റി ഓഫ് സിവിൽ ഏവിയേഷൻ, എയർപോർട്ട് ഹോൾഡിങ്​ കമ്പനി എന്നിവയുമായി സഹകരിച്ച് സംയുക്ത ബോധവൽക്കരണ കാമ്പയിനും ആരംഭിച്ചിട്ടുണ്ട്​. ടാക്​സി പെർമിറ്റുള്ള വാഹനങ്ങളിലുള്ള യാത്ര സുരക്ഷിതത്വം ഉറപ്പുനൽകുമെന്ന് അതോറിറ്റി പറഞ്ഞു.

സുരക്ഷയുടെയും ഗുണനിലവാരത്തി​ൻ്റെയും മാനദണ്ഡങ്ങൾക്കനുസൃതമായി യാത്രക്കാർക്ക് സുഗമമായ ഗതാഗത അനുഭവം ഉറപ്പാക്കുന്നു. ഏകദേശം 2000 ടാക്​സികൾ, 55ലധികം കാർ റെൻറൽ ഓഫീസുകൾ, പൊതുഗതാഗത ബസുകൾ, ലൈസൻസ്​ഡ്​ ടാക്​സി ആപ്പുകൾ എന്നിവയിലൂടെ യാത്രക്കാർക്ക്​ ആവശ്യമായ ഗതാഗത സൗകര്യം സൗദിയി​ലെ വിമാനത്താവളങ്ങളിൽനിന്ന്​ ലഭ്യമാണ്​​. ജിദ്ദയിലെ കിങ്​ അബ്​ദുൽ അസീസ് അന്താരാഷ്ട്ര വിമാനത്താവളത്തിൽ ഹറമൈൻ എക്​സ്​പ്രസ്​ ട്രയിനുമുണ്ട്​.വിമാനത്താവളങ്ങളിൽ ഉയർന്ന നിലവാരമുള്ള ഗതാഗത സേവനങ്ങൾ നൽകുന്നത്​ യാത്രക്കാരുടെ അനുഭവം മെച്ചപ്പെടുത്തുന്നതിനുള്ള പ്രധാന ഘടകമാണെന്നും അതോറിറ്റി പറഞ്ഞു.