ആടുജീവിതത്തിലെ എആർ റഹ്മാനൊരുക്കിയ രണ്ട് പാട്ടുകളും ഓസ്കർ അന്തിമ പട്ടികയിൽ നിന്ന് പുറത്ത്. ചിത്രത്തിലെ രണ്ട് ഗാനവും പശ്ചാത്തല സംഗീതവുമായിരുന്നു പ്രാഥമിക പട്ടികയിൽ ഇടംപിടിച്ചത്. എന്നാൽ ചൊവ്വാഴ്ച അക്കാദമി ഓഫ് മോഷൻ പിക്ചർ ആൻഡ് ആർട്‌സ് 10 വിഭാഗങ്ങളിലെ ഷോർട്ട് ലിസ്റ്റ് പുറത്തുവിട്ടപ്പോൾ അതിൽ ആടുജീവിതത്തിലെ ഗാനങ്ങൾക്ക് ഇടംപിടിക്കാനായില്ല.

-------------------aud------------------------------

ഒറിജിനൽ സ്‌കോർ വിഭാഗത്തിലും ഗാന വിഭാഗത്തിലുമായിരുന്നു ആടുജീവിതത്തിന്റെ പ്രാഥമിക പട്ടിക. ഒറിജിനിൽ സ്‌കോർ വിഭാഗത്തിൽ ഫെഡി അൽവാറസ് സംവിധാനം ചെയ്ത എലിയൻ റോമുലസ് ഉൾപ്പെടെ 20 സിനിമകൾ ഇടംപിടിച്ചു. 15 ഗാനങ്ങളാണ് സംഗീത വിഭാഗത്തിൽ ഇടംപിടിച്ചത്. 86 ഗാനങ്ങളും 146 സ്‌കോറുകളുമാണ് ഓസ്‌കർ പുരസ്‌കാരത്തിന്റെ പ്രാഥമിക പട്ടികയിൽ ഇടംപിടിച്ചിരുന്നത്.
കഴിഞ്ഞ വർഷത്തെ അപേക്ഷിച്ച് പാട്ടുകളുടെ പട്ടികയിൽ അഞ്ചെണ്ണം കുറവായിരുന്നു. ഡിസംബർ ഒമ്പതിന് ആരംഭിച്ച വോട്ടിങ് 13ന് ആണ് അവസാനിച്ചത്. അടുത്തിടെ ഹോളിവുഡ് മ്യൂസിക് ഇൻ മീഡിയ പുരസ്‌കാരം ആടുജീവിതം നേടിയിരുന്നു. വിദേശഭാഷാ ചിത്രങ്ങളുടെ വിഭാഗത്തിൽ മികച്ച പശ്ചാത്തല സംഗീതത്തിനായുള്ള പുരസ്‌കാരമായിരുന്നു ചിത്രത്തിന് ലഭിച്ചത്. ഓസ്‌കർ പ്രാഥമിക പട്ടികയിലും ഇടംപിടിച്ചതോടെ ആരാധകർ വലിയ പ്രതീക്ഷയിലുമായിരുന്നു. ചിത്രത്തിന്റെ സൗണ്ട് ട്രാക്ക് ഗ്രാമി പരിഗണനയ്ക്കായി അയച്ചിരുന്നുവെങ്കിലും പരിഗണിക്കപ്പെട്ടിരുന്നില്ല. ബ്ലെസി സംവിധാനം ചെയ്ത ചിത്രത്തിൽ പൃഥ്വിരാജ് ആയിരുന്നു പ്രധാന കഥാപാത്രമായെത്തിയത്.