പാ.രഞ്ജിത്ത് സംവിധാനം ചെയ്ത കോളിവുഡ് ആക്ഷൻ-അഡ്വഞ്ചർ ചരിത്ര സിനിമ വളരെ നീണ്ട കാലത്തെ നിർമ്മാണത്തിന് ശേഷമാണ് റിലീസായത്. ഏതാണ്ട് 135 കോടി ബജറ്റിലാണ് ചിത്രം നിർമ്മിച്ചതെന്നാണ് വിവരം. ചിത്രം ആഗോളതലത്തിൽ നൂറുകോടിയെന്ന് അവകാശപ്പെടുന്ന വാർത്തകൾ വന്നെങ്കിലും വിവിധ ട്രേഡ് അനലിസ്റ്റുകൾ 70 മുതൽ 80 കോടി കളക്ഷനാണ് ചിത്രം നേടിയത് എന്നാണ് പറയുന്നത്.
ചിയാൻ വിക്രമിന് ചിത്രത്തിൽ പ്രതിഫലമായി ലഭിച്ചത് 25 കോടിയാണെന്നാണ് വിവരം.
ചിയാൻ വിക്രമിൻറെ പ്രകടനം തങ്കലനിൽ പ്രശംസിക്കപ്പെട്ടപ്പോൾ. തങ്കലൻ പൊതുവിൽ നിരൂപകർക്കിടയിൽ സമ്മിശ്ര സ്വീകാര്യതയാണ് ലഭിച്ചത്.
പുതിയ വിവരം അനുസരിച്ച് ചിത്രത്തിൻറെ ഒടിടി റിലീസിനായി കാത്തിരിക്കേണ്ടിവരും. ചിത്രം കഴിഞ്ഞ മാസം നെറ്റ്ഫ്ലിക്സിൽ പ്രീമിയർ ചെയ്യേണ്ടിയിരുന്നു, പക്ഷേ ഇതുവരെ നെറ്റ്ഫ്ലിക്സ് ചിത്രം ഇട്ടിട്ടില്ല. നെറ്റ്ഫ്ലിക്സ് പ്രതിഫല തുകയുടെ പേരിൽ നിർമ്മാതാക്കളുമായി ഉണ്ടാക്കിയ ഡീൽ റദ്ദാകാൻ പോകുന്നു എന്നാണ് പുതിയ വിവരം കോളിവുഡിൽ പരക്കുന്നത്.
35 കോടിയിൽ ഉറപ്പിച്ച ഒടിടി കരാർ നെറ്റ്ഫ്ലിക്സ് റദ്ദാക്കാൻ പോകുകയാണെന്ന അഭ്യൂഹമാണ് ഇപ്പോൾ തമിഴ് മാധ്യമങ്ങൾ പുറത്തുവിടുന്നത്. എന്നാൽ ഇതിന് പിന്നാലെ യഥാർത്ഥ കാരണം എന്താണെന്ന് വ്യക്തമല്ല. ഔദ്യോഗികമായി സ്ഥിരീകരണവും വന്നിട്ടില്ല. പക്ഷെ തങ്കലാനൊപ്പം ഇറങ്ങിയ പടങ്ങൾ ഒടിടിയിൽ എത്തിയിട്ടും ഈ ചിത്രം എത്താത്തത് ഈ അഭ്യൂഹത്തിൻറെ വ്യപ്തി കൂട്ടിയിട്ടുണ്ട്. ഗ്രീൻ സ്റ്റുഡിയോസും, പാ രഞ്ജിത്തിൻറെ നീലം പ്രൊഡക്ഷൻസുമാണ് ചിത്രം നിർമ്മിച്ചത്.