ഇന്ത്യയുടെ മത്സരങ്ങൾ നടത്തുന്നതു സംബന്ധിച്ച വിവാദങ്ങൾ അവസാനിച്ച് ചാംപ്യൻസ് ട്രോഫി പോരാട്ടങ്ങൾക്കു ടീമുകൾ ഒരുങ്ങുന്നു. ഇപ്പോൾ പുതിയ വിവാദമാണ് ഉയരുന്നത്. ചാംപ്യൻസ് ട്രോഫി പോരാട്ടങ്ങൾക്കുള്ള ജേഴ്‌സിയിൽ ആതിഥേയ രാജ്യമായ പാകിസ്ഥാന്റെ പേര് പ്രിന്റ് ചെയ്യരുതെന്ന ആവശ്യവുമായി ബിസിസിഐ രംഗത്തെത്തി. പിന്നാലെ ഇതിനെ എതിർത്ത് പാകിസ്ഥാൻ ക്രിക്കറ്റ് ബോർഡും വന്നതോടെയാണ് പുതിയ വിവാദം ഉയർന്നിരിക്കുന്നത്.

-------------------aud------------------------------

'ബിസിസിഐ ക്രിക്കറ്റിലേക്ക് രാഷ്ട്രീയം കൊണ്ടുവരുന്നു. ഇത് കളിയ്ക്ക് ഒട്ടും നല്ലതല്ല. ഇന്ത്യൻ ടീം പാകിസ്ഥാനിലേക്ക് വരാൻ വിസമ്മതിച്ചു. ഉദ്ഘാടന ചടങ്ങിന് ഇന്ത്യ ക്യാപ്റ്റനെ അയയ്ക്കാൻ ആഗ്രഹിക്കുന്നില്ല. ഇപ്പോൾ ഇന്ത്യൻ ജേഴ്സിയിൽ ആതിഥേയ രാജ്യത്തിന്റെ (പാകിസ്ഥാൻ) പേര് അച്ചടിക്കാനും അവർ ആഗ്രഹിക്കുന്നില്ല എന്ന റിപ്പോർട്ടുകൾ ഉണ്ട്. ഐസിസി ഇക്കാര്യം അനുവദിക്കില്ല എന്നാണ് പ്രതീക്ഷിക്കുന്നത്. ഐസിസി പാകിസ്ഥാനെ പിന്തുണയ്ക്കുമെന്നും ഞങ്ങൾ വിശ്വസിക്കുന്നു'- ഒരു പിസിബി അംഗം പ്രതികരിച്ചു.പാകിസ്ഥാനിൽ കളിക്കില്ലെന്ന ഇന്ത്യയുടെ തീരുമാനത്തിൽ മാറ്റം വന്നിരുന്നില്ല. ഇതോടെ ഇന്ത്യയുടെ മത്സരങ്ങൾ യുഎഇയിലാണ് അരങ്ങേറുന്നത്. ഹൈബ്രിഡ് മോഡലിനെ പാകിസ്ഥാൻ എതിർത്തെങ്കിലും ഐസിസി അതിനു പരിഗണന നൽകിയില്ല. ഇതോടെ പാകിസ്ഥാനു ഇക്കാര്യത്തിൽ വഴങ്ങേണ്ടി വന്നിരുന്നു.