ബ്രിട്ടന്‍ അഭിമുഖീകരിക്കുന്ന ഗുരുതരമായ പ്രതിസന്ധികളില്‍ ഒന്നാണ് എന്‍ എച്ച് എസ്സിലെ ജീവനക്കാരുടെ ക്ഷാമം. അത് പരിഹരിക്കാന്‍ നിരവധി നടപടികള്‍ ഇതിനോടകം ഉണ്ടായെങ്കിലും, പൂര്‍ണ്ണമായും പ്രശ്നം പരിഹരിക്കാന്‍ കഴിഞ്ഞിട്ടില്ല. ഈ സാഹചര്യത്തിലാണ് എന്‍ എച്ച് എസ്സിലെ ജീവനക്കാരുടെ കുറവ് പരിഹരിക്കാന്‍ ലേബര്‍ പാര്‍ട്ടി പരിഗണിക്കുന്ന നയത്തിന് പ്രാധാന്യമേറുന്നത്. പുതിയതായി യോഗ്യത ചെയ്ത, ഇംഗ്ലണ്ടിലെ ഡോക്ടര്‍മാരുടെയും നഴ്സുമാരുടെയുംവിദ്യാഭ്യാസ വായ്പകള്‍ എഴുതി തള്ളുന്ന കാര്യമാണ് ലേബര്‍ പാര്‍ട്ടി പരിഗണിക്കുന്നത്. എന്‍ എച്ച് എസ്സിലേക്ക് തദ്ദേശിയരായ ഡോക്ടര്‍മാരെയും ജീവനക്കാരെയും കൂടുതലായി റിക്രൂട്ട് ചെയ്യുന്നതിനും, ജോലി ചെയ്യുന്നവര്‍ എന്‍ എച്ച് എസ് വിട്ടുപോകുന്നതിന് തടയിടുന്നതിനുമായാണ് ഷഡോ ഹെല്‍ത്ത് സെക്രട്ടറി വെസ് സ്ട്രീറ്റിംഗ് ഇത്തരത്തില്‍ ഒരു പദ്ധതി ആവിഷ്‌കരിച്ചിരിക്കുന്നത്. കഴിഞ്ഞയാഴ്ച്ച ലണ്ടനിലെ ഹോഴ്സ്നി ആന്‍ഡ് വുഡ് ഗ്രീന്‍ ലേബര്‍ പാര്‍ട്ടി സമ്മേളനത്തില്‍, എന്‍ എച്ച് എസ്സിലെ ജീവനക്കാരെ പ്രോത്സാഹിപ്പിക്കുന്നതിനായി സാമ്പത്തിക ഇന്‍സെന്റീവുകള്‍ കോണ്ടുവരുന്ന കാര്യം ആലോചിക്കുന്നതായി സ്ട്രീറ്റിംഗ് പറഞ്ഞിരുന്നു.
സാമ്പത്തിക ഇന്‍സെന്റീവുകളോ മറ്റൊ നല്‍കിയാല്‍, അത് ലഭിക്കുന്ന ജീവനക്കാര്‍ ഒരു നിശ്ചിതകാലത്തേക്ക് എന്‍ എച്ച് എസ്സില്‍ ജോലിചെയ്യേണ്ടത് നിര്‍ബന്ധമാക്കുമോ എന്ന ചോദ്യത്തിന് പ്രതികരണമായിട്ടായിരുന്നു അദ്ദേഹം അത് പറഞ്ഞത്. പുതിയതായി നിയമിക്കപ്പെടുന്നവരെ നിശ്ചിത കാലത്തേക്ക് എന്‍ എച്ച് എസ്സില്‍ ജോലി ചെയ്യാന്‍ നിര്‍ബന്ധിക്കുകയില്ലഎന്ന് അദ്ദേഹം വ്യക്തമാക്കുകയും ചെയ്തു. എന്നിരുന്നാലും, ലേബര്‍ പാര്‍ട്ടിയുടെ നയം, ആരോഗ്യ വിദഗ്ധരും, യൂണിയന്‍ നേതാക്കളും പറയുന്നത് പോലെ എന്‍ എച്ച് എസ്സില്‍ നിന്നുള്ള കൊഴിഞ്ഞുപോക്ക് കുറയ്ക്കാന്‍ സഹായിക്കുമെന്നും സ്ട്രീറ്റിംഗ് പറഞ്ഞു.
© Copyright 2023. All Rights Reserved
