പാക്കിസ്ഥാനിലെ പൊതു തിരഞ്ഞെടുപ്പിൽ പാക്കിസ്ഥാൻ തെഹ്രീകെ ഇൻസാഫ് നടത്തിയ മുന്നേറ്റത്തിനു പിന്നാലെ ആർട്ടിഫിഷ്യൽ ഇന്റലിജൻസ് ഉപയോഗിച്ചു മുൻ പ്രധാനമന്ത്രി ഇമ്രാൻ ഖാൻ്റെ വിജയ സന്ദേശം പുറത്തിറക്കി. ജയിലിൽനിന്ന് ഇമ്രാൻ ഖാൻ എഴുതി നൽകിയ കുറിപ്പ് എഐ ഉപയോഗിച്ചു വിഡിയോ ആക്കുകയായിരുന്നു. പൊതുതെരഞ്ഞെടുപ്പിൽ വിജയം തങ്ങളുടെ പാർട്ടിക്കാണെന്ന് പ്രഖ്യാപിച്ചു കൊണ്ടാണ് ഇമ്രാൻ ഖാൻ രംഗത്ത് എത്തിയത്.
പാകിസ്ഥാൻ തിരഞ്ഞെടുപ്പ് ഫലങ്ങൾ സംഭവബഹുലമായി മുന്നേറുകയാണ് . തിരഞ്ഞെടുപ്പിൽ വിജയിച്ചതായി പാകിസ്ഥാൻ മുസ്ലീം ലീഗ് -നവാസിൻ്റെ മുൻ പ്രധാനമന്ത്രി നവാസ് ഷെരീഫിൻ്റെ പ്രസ്താവനയ്ക്ക് പിന്നാലെ ജയിലിൽ കിടക്കുന്ന നേതാവും മുൻ പ്രധാനമന്ത്രിയുമായ ഇമ്രാൻ ഖാൻ്റെ വിജയപ്രസംഗം പാകിസ്ഥാൻ തെഹ്രീകെ ഇൻസാഫ് പാർട്ടി പുറത്തുവിട്ടിരിക്കുകയാണ് . വ്യാഴാഴ്ച നടന്ന പൊതുതെരഞ്ഞെടുപ്പിൽ വിജയം തങ്ങളുടെ പാർട്ടിക്കാണെന്ന് പ്രഖ്യാപിച്ചു കൊണ്ടാണ് ഇമ്രാൻ ഖാൻ രംഗത്ത് എത്തിയത്. ആർട്ടിഫിഷ്യൽ ഇൻറലിജൻസിൻ്റെ സഹായത്തോടെയാണ് ഇമ്രാൻഖാൻ്റെ പ്രസംഗം തയ്യാറാക്കിയിരിക്കുന്നത്. പോളിംഗ് ദിവസം വലിയ രീതിയിൽ വോട്ടർമാർ തിരഞ്ഞെടുപ്പ് പ്രക്രിയയിൽ പങ്കാളികളായെന്നും അതുകൊണ്ടുതന്നെ നവാസ് ഷെരീഫിൻ്റെ `ലണ്ടൻ പദ്ധതി´ പരാജയപ്പെട്ടുവെന്നും എഐ സൃഷ്ടിച്ച പ്രസംഗത്തിൽ ഇമ്രാൻ ഖാൻ പറഞ്ഞു. "നിങ്ങളുടെ വോട്ടുകൾ കാരണം ലണ്ടൻ പദ്ധതി പരാജയപ്പെട്ടു... ഒരു പാകിസ്ഥാനിയും അദ്ദേഹത്തെ അതായത് നവാസ് ഷെരീഫ്നെ വിശ്വസിക്കുന്നില്ല... ലോകം മുഴുവൻ നിങ്ങളുടെ വോട്ടിൻ്റെ ശക്തി കണ്ടു. നിങ്ങൾ നൽകിയ വോട്ടുകൾ സംരക്ഷിക്കുവാനുള്ള കഴിവാണ് ഇനി കാട്ടേണ്ടത്´-എന്നും - ഇമ്രാൻ ഖാൻ പ്രസംഗത്തിൽ പറഞ്ഞു. ജനാധിപത്യ അവകാശം´ വിനിയോഗിച്ചുകൊണ്ട് പൗരന്മാരുടെ അവകാശങ്ങൾക്കുള്ള സ്വാതന്ത്ര്യം പുനഃസ്ഥാപിക്കുന്നതിന് ജനങ്ങൾ അടിത്തറയിട്ടിരിക്കുന്നുവെന്നും അദ്ദേഹം കൂട്ടിച്ചേർത്തു. തിരഞ്ഞെടുപ്പിൽ മികച്ച വിജയം നേടാൻ ഞങ്ങളെ സഹായിച്ചതിന് ജനങ്ങളെ ഇമ്രാൻ ഖാൻ അഭിനന്ദിക്കുകയും ചെയ്തു.
വ്യാഴാഴ്ച നടന്ന തിരഞ്ഞെടുപ്പിൽ നവാസ് ഷെരീഫിൻ്റെ പാർട്ടി ഒറ്റക്കക്ഷി അടിസ്ഥാനത്തിൽ ഏറ്റവും കൂടുതൽ സീറ്റുകൾ നേടി. അതേസമയം പാർട്ടിയെ തിരഞ്ഞെടുപ്പിൽ മത്സരിക്കുന്നതിൽ നിന്ന് വിലക്കിയതിനെ തുടർന്ന് ഒറ്റ ബ്ലോക്കായി മത്സരിക്കുന്നതിന് പകരം സ്വതന്ത്രരായി മത്സരിച്ച ഇമ്രാൻ ഖാൻ്റെ അനുയായികൾ കൂടുതൽ സീറ്റുകൾ നേടിയിരിക്കുകയാണ്.
© Copyright 2023. All Rights Reserved