മത്സരത്തിൽ പങ്കെടുക്കാനുള്ള പ്രായപരിധി എടുത്തുകളഞ്ഞു. 70 വർഷമായുള്ള മിസ് യുണിവേഴ്‌സ് ചരിത്രത്തിൽ ആദ്യമായാണ് ഇങ്ങനൊരു പ്രഖ്യാപനം. 28 വയസായിരുന്നു ഇതുവരെ മത്സരത്തിൽ യോഗ്യത നേടാനുള്ള പ്രായപരിധി.

ചൊവ്വാഴ്ച സ്പ്രിംഗ് 2024 ന്യൂയോർക്ക് ഫാഷൻ വീക്കിൽ ടാനി ഫ്ലെച്ചറുടെ ബ്യൂട്ടി പേജന്റ് ഷോയ്ക്കിടെയാണ് ചരിത്രപരമായ ഈ തീരുമാനം പ്രഖ്യാപിച്ചത്. 18 വയസ്സിന് മുകളിൽ പ്രായമുള്ള ഏതൊരു സ്ത്രീക്കും മത്സരത്തിൽ യോഗ്യത നേടാനും മത്സരിക്കാനും ഇനി മുതൽ അവസരമുണ്ട്. ‘മിസ് യൂണിവേഴ്‌സ് ഓർഗനൈസേഷൻ മിസ് യൂണിവേഴ്‌സുമായി ബന്ധപ്പെട്ട മത്സരങ്ങളിൽ ഉടനീളം എല്ലാ പ്രായപരിധികളും ഒഴിവാക്കുന്നതായി പ്രഖ്യാപിക്കുന്നു. ഈ മാറ്റം ആഗോളതലത്തിലുള്ള എല്ലാ മത്സരങ്ങൾക്കും ബാധകമായിരിക്കും’- ഔദ്യോഗിക ഇൻസ്റ്റാഗ്രാം പേജിലൂടെ മത്സര സംഘടന അറിയിച്ചു. ‘ഒരു സ്ത്രീക്ക് മത്സരിക്കാനും മഹത്വം കൈവരിക്കാനുമുള്ള കഴിവിന് പ്രായം ഒരു തടസ്സമല്ല’ എന്ന് ഫാഷൻ ഇവന്റിൽ സംസാരിച്ച മിസ് യൂണിവേഴ്സ് 2022 ആർ ബോണി ഗബ്രിയേൽ പറഞ്ഞു. മിസ്സ് യൂണിവേഴ്‌സ് എല്ലാവരേയും ഉൾക്കൊള്ളാനും അവർ രൂപകൽപ്പന ചെയ്ത പ്ലാറ്റ്‌ഫോമിന് അനുസൃതമായി ജീവിക്കാനുമുള്ള വഴികൾ തുറക്കുന്നുവെന്നും അവർ കൂട്ടിച്ചേർത്തു.

2022 ൽ മിസ് യൂണിവേഴ്‌സായി തിരഞ്ഞെടുക്കപ്പെട്ടപ്പോൾ 28 വയസായിരുന്നു ആർ ബോണി ഗബ്രിയേലിന്റെ പ്രായം. ന്യൂ ഓർലിയാൻസിൽ നടന്ന മത്സരത്തിൽ നടന്ന ചോദ്യോത്തര റൗണ്ടിനിടെ, സംഘടനയുടെ നിയമങ്ങളിൽ എന്ത് മാറ്റങ്ങൾ വരുത്തുമെന്ന് ചോദിച്ചപ്പോൾ, അവസരം ലഭിച്ചാൽ പ്രായപരിധി ഉയർത്തുമെന്ന് അവർ പറഞ്ഞിരുന്നു.