കൗമാരക്കൊലപാതകങ്ങൾ . കഴിഞ്ഞ ദിവസം രാത്രി ബ്രിസ്റ്റോളിലെ നോൽ വെസ്റ്റിലുള്ള ലിമിൻസ്റ്റർ അവന്യൂവിൽ 15, 16 വയസുള്ള രണ്ട് കൗമാരക്കാരെ ബസ് യാത്രക്കാരുടെ മുന്നിലിട്ടു കുത്തി കൊലപ്പെടുത്തി. ഒരു സംഘം ആളുകൾ രണ്ട് കൗമാരക്കാരെ ആക്രമിക്കുകയായിരുന്നു . കൊലപാതകത്തിനു ശേഷം അക്രമികൾ ഒരു കാറിൽ കയറി സ്ഥലം വിടുകയും ചെയ്തു. മുറിവേറ്റ ഇരുവരെയും ആശുപത്രിയിൽ എത്തിച്ചെങ്കിലും, മരണമടയുകയായിരുന്നു.
സംഭവവുമായി ബന്ധപ്പെട്ട് ഒരു 44 കാരനെയും ഒരു 15 കാരനെയും അറസ്റ്റ് ചെയ്തതായി ആവോൺ ആൻഡ് സോമർസെറ്റ് പോലീസ് സ്ഥിരീകരിച്ചു. ഇരുവരും ഇപ്പോൾ പോലീസ് കസ്റ്റഡിയിൽ തുടരുകയാണ്. ഈ ഇരട്ടക്കൊലപാതകത്തിൽ കൂടുതൽ പേർക്ക് പങ്കുണ്ടെന്നാണ് പോലീസ് സംശയിക്കുന്നത്. അവർക്കായുള്ള തിരച്ചിൽ തുടരുകയാണെന്ന് പോലീസ് അറിയിച്ചു.മരണപ്പെട്ടവർക്കായി ഇന്നലെ സംഭവസ്ഥലത്ത് അശ്രുപൂജ നടന്നു. പുഷ്പചക്രങ്ങളും മെഴുകുതിരികളുമായി നിരവധി പേർ ആദരാഞ്ജലികൾ അർപ്പിക്കാൻ എത്തിയിരുന്നു. നിരത്തിന്റെവശത്തു വെച്ചായിരുന്നു കൊലപാതകം നടന്നത്. ഇത് നടക്കുമ്പോൾ എത്തിയ ഒരു ഡബിൾ ഡെക്കർ ബസ്സ് ഇൽമിൻസ്റ്റർ അവന്യൂവിൽ പാർക്ക് ചെയ്തിരുന്നു. അതിലെ യാത്രക്കാരുടെ മുൻപിൽ വെച്ചായിരുന്നു കൊലപാതകം നടന്നതെന്ന് പോലീസ് പറയുന്നു. സംഭവം നടക്കുമ്പോൾ ബസ്സിൽ ഉണ്ടായിരുന്ന യാത്രക്കാരുമായും പോലീസ് സംസാരിച്ചു വരികയാണ്.ഇതിനോടകം തന്നെ നിരവധി ദൃക്സാക്ഷികളെ ലഭിച്ചിട്ടുണ്ട്. ഈ കേസിന്റെ അന്വേഷണത്തിൽ ഒരു തെളിവും തള്ളിക്കളയാതെ, വ്യാപകമായ അന്വേഷണമായിരിക്കും നടക്കുക എന്ന് പോലീസ് അറിയിച്ചിട്ടുണ്ട്. മാത്രമല്ല, അധികം വൈകാതെ തന്നെ ഇതിൽ ഉൾപ്പെട്ട മുഴുവൻ പേരെയും പിടികൂടുമെന്ന ആത്മവിശ്വാസവും പോലീസ് പ്രകടിപ്പിക്കുന്നു. ശനിയാഴ്ച വൈകിട്ട് നടന്ന സംഭവത്തിൽ കുത്തേറ്റവരെ ബ്രിസ്റ്റോൾ റോയൽ ഹോസ്പിറ്റൽ ഫോർ ചിൽഡ്രനിലേക്ക് മാറ്റിയിരുന്നു. ഞായറാഴ്ചയായിരുന്നു അവർ മരണമടഞ്ഞത്.
© Copyright 2023. All Rights Reserved