പി എസ് ജിയിൽ ഫ്രാൻസ് സൂപ്പർ താരം കിലിയൻ എംബാപ്പെയുമായി തനിക്കുള്ള ബന്ധം ഊഷ്മളമായിരുന്നില്ലെന്ന് തുറന്നു പറഞ്ഞ് ബ്രസീലിയൻ താരം നെയ്മർ. പി എസ് ജിയിൽ മെസി എത്തുന്നതുവരെ എംബാപ്പെയുമായി നല്ല ബന്ധമായിരുന്നെങ്കിലും മെസി എത്തിയതോടെയാണ് അത് മോശമായതെന്ന് നെയ്മർ മുൻ ബ്രസീലിയൻ താരം റൊമാരിയോയുടെ പോഡ്കാസ്റ്റിൽ പറ‍ഞ്ഞു.

-------------------aud------------------------------

2017ലാണ് ബാഴ്സലോണയിൽ നിന്ന് നെയ്മർ റെക്കോർഡ് ട്രാൻസ്ഫർ തുകയ്ക്ക് പി എസ് ജിയിലെത്തിയത്. 2021ലായിരുന്നു മെസി ബാഴ്സലോണ വിട്ട് പി എസ് ജിയിൽ ചേരുന്നത്. പിന്നീട് 2023ൽ പി എസ് ജി വിട്ട മെസി യുഎസ് മേജർ സോക്കർ ലീഗ് ക്ലബ്ബായ ഇൻറർ മയാമിയിലേക്ക് പോയപ്പോൾ നെയ്മർ സൗദി പ്രോ ലീഗ് ടീമായ അൽ ഹിലാലിൽ ചേർന്നിരുന്നു. കഴിഞ്ഞ സീസണിൽ പി എസ് ജി വിട്ട എംബാപ്പെയാകട്ടെ റയൽ മാഡ്രിഡിലുമെത്തി. പി എസ് ജിയിൽ ചേർന്ന സമയത്ത് എംബാപ്പെയുമായി തനിക്ക് വ്യക്തിപരമായ പ്രശ്നങ്ങളുണ്ടായിരുന്നുവെന്ന് നെയ്മർ വെളിപ്പെടുത്തി. പക്ഷെ അന്ന് അവൻ ചെറിയ പയ്യനായിരുന്നു. കരിയർ തുടങ്ങിയിട്ടേ ഉണ്ടായിരുന്നുള്ളു. അതിൻറേതായ പ്രശ്നങ്ങളായിരുന്നു അതൊക്കെ. പിന്നീട് പ്രശ്നങ്ങളെല്ലാം പരിഹരിച്ച് ഞങ്ങൾ സൗഹൃദത്തിലായി. നീ ലോകത്തിലെ ഏറ്റവും മികച്ച താരമാകുമെന്നും അതിന് നിന്നെ സഹായിക്കാമെന്നുപോലും ഞാൻ അവനോട് പറഞ്ഞിട്ടുണ്ട്. അവനുമായി തമാശകൾ പങ്കിടുമായിരുന്നു. എൻറെ വീട്ടിലേക്ക് അവൻ വരികയും ഞങ്ങൾ ഒരുമിച്ചിരുന്ന് അത്താഴം കഴിക്കുകയുമെല്ലാം ചെയ്തിരുന്നു.
എന്നാൽ 2021ൽ മെസി പി എസ് ജിയിലെത്തിയതോടെ അവൻറെ സ്വഭാവം മാറി തുടങ്ങി. ഞാനും മെസിയും തമ്മിൽ ബാഴ്സ കാലം മുതലെ അടുത്ത സുഹൃത്തുക്കളാണ്. അതുകൊണ്ട് തന്നെ മെസിയെത്തിയപ്പോൾ ഞങ്ങളുടെ ബന്ധത്തിൽ അവന് അസൂയായി. അതിനുശേഷം അവൻ എന്നോട് കാര്യങ്ങൾ ഒന്നും തുറന്നു പറയാതെയായി. അതിനുശേഷമാണ് ഞങ്ങൾ തമ്മിലുള്ള അടി തുടങ്ങിയത്. ഞാനും മെസിയും എംബാപ്പെയും ഉണ്ടായിട്ടും പി എസ് ജിക്ക് ചാമ്പ്യൻസ് ലീഗ് കിരീടം നേടാനാകാത്തതിന് കാരണം ഞങ്ങൾക്കിടയിലെ ഈ ഭിന്നതയായിരുന്നു. നിങ്ങൾക്ക് ഒരിക്കലും ഗ്രൗണ്ടിൽ ഒറ്റക്ക് പന്ത് പാസ് ചെയ്തു കൊണ്ടുപോയി ഗോളടിക്കാനാവില്ല. ഞാനാണ് ഏറ്റവും മികച്ചവനെന്നൊക്കെ കരുതാം. പക്ഷെ അപ്പോഴും ഗോളടിക്കാൻ ആരെങ്കിലും പന്ത് പാസ് ചെയ്തു തരണമല്ലോ. അതിന് മറ്റ് താരങ്ങളും ടീമിൽ വേണം. എല്ലാവരുടെയും ഈഗോ ആണ് പി എസ് ജിക്ക് വലിയ നേട്ടങ്ങൾ ഇല്ലാതാവാൻ കാരണമായത്. ഒരു ടീമിലെ കളിക്കാർ തമ്മിൽ പരസ്പരം സഹായിക്കുന്നില്ലെങ്കിൽ പിന്നെ ആ ടീമിന് കിരീടങ്ങൾ നേടുക അസാധ്യമാണെന്നും നെയ്മർ പറഞ്ഞു.
ബ്രസീലിയൻ ലിഗിലേക്ക് തിരിച്ചുവരുമോ എന്ന ചോദ്യത്തിന് നെയ്മർ വ്യക്തമായ മറുപടി നൽകിയില്ല. സൗദിയിൽ ഇപ്പോൾ സന്തുഷ്ടനാണെന്നും അടുത്ത ആറ് മാസത്തിനുള്ളിൽ കരിയറിൽ വലിയ മാറ്റങ്ങളുണ്ടാകുമെന്നും പരിക്കുമൂലം വിശ്രമിക്കുന്ന നെയ്മർ പറ‍ഞ്ഞു.