യുകെയിൽ കാലാവസ്ഥ താറുമാറാക്കാൻ സംഹാരരൂപം പൂണ്ട് 'ഇയോവിൻ; കൊടുങ്കാറ്റ് . ബ്രിട്ടീഷ് ദ്വീപുകളിലേക്ക് വമ്പൻ കാറ്റുമായി ഇയോവിൻ രംഗപ്രവേശനം ചെയ്തു. ജീവൻ അപകടത്തിലാക്കുന്ന ഗുരുതരമായ ഭീഷണിയാണ് കൊടുങ്കാറ്റ് ഉയർത്തുന്നത്. ഇതോടെ റെഡ് അലേർട്ട് പുറപ്പെടുവിക്കാൻ മെറ്റ് ഓഫീസ് തയ്യാറായി.

-------------------aud--------------------------------

പുലർച്ചെ 2 മണിയോടെ അയർലണ്ടിന്റെ വെസ്റ്റ് ഭാഗത്തുള്ള കൗണ്ടി ഗാൽവേയിൽ കൊടുങ്കാറ്റിന്റെ ആദ്യ ആഘാതം ഏറ്റുവാങ്ങുന്നതായി വിൻഡ് ട്രാക്കറുകൾ വ്യക്തമാക്കുന്നു. 80 മൈൽ വേഗത്തിലാണ് ഇവിടെ കാറ്റ് വീശുന്നത്. സില്ലി ദ്വീപിലെ സെന്റ് മേരീസിൽ 75 മൈൽ വേഗത്തിലാണ് കാറ്റ്. അതേസമയം മുന്നറിയിപ്പ് നൽകിയിട്ടുള്ള മറ്റ് മേഖലകളിൽ കാറ്റിന്റെ വേഗത 80 മുതൽ 90 മൈൽ വരെ നീളുമെന്നാണ് മുന്നറിയിപ്പ്. കൊടുങ്കാറ്റിന്റെ സഞ്ചാരപാതയിലുള്ള ജനങ്ങൾ ജാഗ്രത പാലിക്കണമെന്നാണ് നിർദ്ദേശം. അടുത്ത വർഷങ്ങൾക്കിടെ യുകെ കണ്ട ഏറ്റവും ശക്തമായ കാലാവസ്ഥാ സിസ്റ്റങ്ങളിൽ ഒന്നാണ് ഇതെന്നാണ് പ്രവചനം.
നോർത്തേൺ അയർലണ്ടിൽ വെള്ളിയാഴ്ച ഉച്ചകഴിഞ്ഞ് 2 വരെയാണ് മെറ്റ് ഓഫീസ് അപൂർവ്വമായ റെഡ് അലേർട്ട് പുറപ്പെടുവിച്ചിരിക്കുന്നത്. വെസ്റ്റേൺ, സെൻഡ്രൽ സ്‌കോട്ട്‌ലണ്ട് മേഖലകളിൽ രാവിലെ 10 മുതൽ വൈകുന്നേരം 5 വരെയും മുന്നറിയിപ്പ് നിലവിലുണ്ടാകും.
നോർത്തേൺ അയർലണ്ട്, സ്‌കോട്ട്‌ലണ്ടിന്റെ സതേൺ പകുതി, നോർത്തേൺ ഇംഗ്ലണ്ട്, നോർത്ത് വെയിൽസ് എന്നിവിടങ്ങളിൽ വെള്ളിയാഴ്ച രാവിലെ 6 മുതൽ രാത്രി 9 വരെയും, സ്‌കോട്ട്‌ലണ്ടിന്റെ നോർത്തേൺ ഭാഗങ്ങളിൽ വെള്ളിയാഴ്ച ഉച്ചയ്ക്ക് 1 മുതൽ ശനിയാഴ്ച രാവിലെ 6 വരെ ആംബർ കാറ്റ് മുന്നറിയിപ്പാണുള്ളത്. ഈ പ്രദേശങ്ങളിൽ കാറ്റ് 70 മൈൽ വരെ വേഗത കൈവരിക്കാമെന്നാണ് മുന്നറിയിപ്പ്.
യുകെയിലെ ഭൂരിഭാഗം മേഖലകൾക്കും വെള്ളിയാഴ്ച കാറ്റിനുള്ള മഞ്ഞ ജാഗ്രതയാണ് നൽകിയിരിക്കുന്നത്. സ്‌കോട്ട്‌ലണ്ടിൽ രാവിലെ 6 മുതൽ അർദ്ധരാത്രി വരെ മഞ്ഞിനുള്ള മഞ്ഞ ജാഗ്രതയും, സൗത്ത് വെസ്റ്റ് ഇംഗ്ലണ്ടിലും, വെയിൽസിലും രാവിലെ 9 വരെ മഴ മുന്നറിയിപ്പും നൽകിയിട്ടുണ്ട്.