വയനാട് ദുരന്തത്തിൽ സംസ്ഥാന സർക്കാരിനെ കുറ്റപ്പെടുത്തിയതിന് അമിത് ഷാക്കെതിരെ അവകാശ ലംഘനത്തിന് രാജ്യസഭയിൽ അവകാശ ലംഘന നോട്ടീസ് നൽകി. സന്തോഷ് കുമാർ എം പി യാണ് നോട്ടീസ് നൽകിയത്. കാലാവസ്ഥ മുന്നറിയിപ്പ് സംബന്ധിച്ച് സഭയിൽ തെറ്റിദ്ധരിപ്പിക്കുന്ന പ്രസ്താവന നടത്തിയെന്ന് കാണിച്ചാണ് നോട്ടീസ് നൽകിയിരിക്കുന്നത്.

-------------------aud--------------------------------

ഉരുൾപൊട്ടൽ മുന്നറിയിപ്പ് നൽകിയിരുന്നില്ലെന്ന് മാധ്യമങ്ങൾ വസ്തുതകൾ നിരത്തി റിപ്പോർട്ട് ചെയ്തിരുന്നതാണെന്നും പരാതിയിൽ പറയുന്നുണ്ട്. സഭയെ തെറ്റിദ്ധരിപ്പിച്ചത് അവകാശലംഘനമാണെന്നും ഇതിൽ നടപടി വേണമെന്നും ചൂണ്ടിക്കാട്ടിയിട്ടുണ്ട്. കോൺഗ്രസ് നേതാക്കളായ ജയറാം രമേശ്, ദ്വിഗ് വിജയ് സിങ്, പ്രമോദ് തിവാരി എന്നിവരും ഇതേ വിഷയത്തിൽ നോട്ടീസ് നൽകിയിട്ടുണ്ട്. മൂന്ന് തവണ കേരളത്തിന് ദുരന്ത മുന്നറിയിപ്പ് നൽകിയിരുന്നുവെന്നാണ് ആഭ്യന്തരമന്ത്രി അമിത്ഷാ ലോക്‌സഭയിലും രാജ്യസഭയിലും വ്യക്തമാക്കിയത്. ജൂലൈ 18, 23, 25 തീയതികളിൽ മുന്നറിയിപ്പ് നൽകിയിരുന്നു. 26ന് 20 സെന്റിമീറ്ററിലധികം മഴ പെയ്യുമെന്നും, ശക്തമായ മണ്ണിടിച്ചിലിന് സാധ്യതയുണ്ടെന്നും മുന്നറിയിപ്പിലുണ്ടായിരുന്നു. മണ്ണിടിച്ചിൽ സാധ്യത കണ്ട് തന്റെ നിർദ്ദേശപ്രകാരമാണ് എൻഡിആർഎഫിന്റെ 9 സംഘത്തെ വയനാട്ടിലേയ്ക്ക് അയച്ചതെന്നും കേരളം എന്ത് ചെയ്‌തെന്നുമാണ് അമിത് ഷാ ചോദിച്ചത്. എന്നാൽ ദുരന്തമേഖലയിൽ ഓറഞ്ച് അലർട്ടാണ് കേന്ദ്രം നൽകിയിരുന്നതെന്നും ദുരന്തം സംഭവിച്ചതിന് ശേഷം പുലർച്ചെയാണ് റെഡ് അലെർട്ട് നൽകിയതെന്നുമാണ് മുഖ്യമന്ത്രി പിണറായി വിജയന്റെ പ്രതികരണം.