അഫ്ഗാൻറെ അതിർത്തി പ്രദേശങ്ങൾ കടന്ന് പാക് വ്യോമ സേന നടത്തിയ ആക്രമണത്തിൽ എട്ട് മരണം. ഇന്നലെ (18.3.2024) പുലർച്ചെയാണ് അഫ്ഗാനിസ്ഥാൻറെ അതിർത്തി കടന്ന് പാകിസ്ഥാൻ വ്യോമാക്രമണം നടത്തിയത്. മൂന്ന് കുട്ടികളും അഞ്ച് സ്ത്രീകളുമാണ് ആക്രമണത്തിൽ കൊല്ലപ്പെട്ടതെന്ന് റിപ്പോർട്ടുകൾ പറയുന്നു.
പാകിസ്ഥാൻറെ അതിർത്തി ചെക്ക് പോസ്റ്റ് ആക്രമിച്ച് ഏഴ് സൈനികരെ കൊലപ്പെടുത്തിയതിൻറെ പ്രതികാരമാണ് പാക് നടപടിയെന്ന് വിലയിരുത്തപ്പെടുന്നു. അതേസമയം രാജ്യത്തിൻറെ പരമാധികാരത്തെ വെല്ലുവിളിച്ച പാകിസ്ഥാൻ ആക്രമണത്തിന് വില നൽകേണ്ടിവരുമെന്ന് താലിബാൻ സർക്കാർ വക്താവ് സബീഹുള്ള മുജാഹിദ് പറഞ്ഞു. പാകിസ്ഥാൻറെ ആക്രമണത്തിന് പിന്നാലെ അതിർത്തിയിൽ ഇരുവശത്ത് നിന്നും ആക്രമണങ്ങൾ ശക്തമാക്കിയെന്നും റിപ്പോർട്ടുകൾ പറയുന്നു. പാകിസ്ഥാൻറെ കുഴപ്പങ്ങൾക്കും രാജ്യത്തെ അക്രമങ്ങൾ നിയന്ത്രിക്കുന്നതിലുള്ള പരാജയത്തിനും അഫ്ഗാനിസ്ഥാനെ കുറ്റം പറയരുത്. അത്തരം നടപടികൾ മോശം ഫലം ചെയ്യുമെന്നും സബീഹുള്ള കൂട്ടിച്ചേർത്തു. പുലർച്ചെ മൂന്ന് മണിയോടെ പാക് വ്യോമ സേന സാധാരണക്കാരുടെ വീടുകൾക്ക് നേരെ ബോംബിടുകയായിരുന്നു. പാക് ആക്രമണത്തിൽ അഫ്ഗാനിസ്ഥാനിലെ പക്തിക മേഖലയിലെ ബർമൽ ജില്ലയിൽ മൂന്ന് സ്ത്രീകളും നിരവധി കുട്ടികളും ഖോസ്ത് മേഖലയിൽ രണ്ട് സ്ത്രീകളും കൊല്ലപ്പെട്ടെന്നും വക്താവ് കൂട്ടിച്ചേർത്തു. പാകിസ്താനിലെ തെക്കൻ വസീറിസ്ഥാൻ ജില്ലയുമായി അതിർത്തി പങ്കിടുന്ന പ്രദേശമാണ് പക്തിക. വടക്കൻ വസീറിസ്ഥാനോട് ചേർന്ന പ്രദേശമാണ് ഖോസ്ത് പ്രവിശ്യ. ഇൻറലിജൻസ് വിവരത്തെ തുടർന്ന് അഫ്ഗാൻ അതിർത്തിയോട് ചേർന്ന് ഇന്നലെ അതിരാവിലെ വ്യോമാക്രമണം നടത്തിയെന്ന് പാകിസ്ഥാൻ വിദേശകാര മന്ത്രാലയം അറിയിച്ചു. ഹഫിസ് ഗുൽ ബഹാദുർ ഗ്രൂപ്പിലെ തീവ്രവാദി സംഘത്തിന് നേരെയായിരുന്നു ആക്രമണമെന്നും പാക് വിദേശകാര്യ മന്ത്രാലയം അറിയിച്ചു. ഒപ്പം പാക് ഭൂമിയിൽ നൂറ് കണക്കിന് ആളുകളുടെ മരണത്തിന് കാരണക്കാരായ തെഹ്രിക് ഇ താലിബാൻ (ടിടിഇ) തീവ്രവാദി സംഘത്തെയും ലക്ഷ്യം വച്ചതായും മന്ത്രാലയം അവകാശപ്പെട്ടു. രണ്ടാം താലിബാൻ സർക്കാർ അഫ്ഗാനിസ്ഥാൻറെ പരമാധികാരം കൈയാളിതയതിന് പിന്നാലെ പാകിസ്ഥാനും താലിബാനും തമ്മിലുള്ള ബന്ധം വളഷായിരുന്നു. ഇതിൻറെ തുടർച്ചായാണ് ആക്രമണങ്ങളുമെന്ന് കരുതുന്നു. ഈ വർഷം ഇതിനകം ഇറാൻ രണ്ടോ തവണയോളം പാകിസ്ഥാൻറെ ബലൂച്ച് മേഖലയിലേക്ക് അതിക്രമിച്ച് കയറി വ്യോമാക്രമണം നടത്തിയിരുന്നു. ഇറാൻറെ മണ്ണിൽ തീവ്രവാദ പ്രവർത്തനത്തിന് പാകിസ്ഥാൻ സഹായം നൽകുന്നുവെന്ന് ആരോപിച്ചായിരുന്നു അത്. പിന്നാലെ പാകിസ്ഥാനും ഇറാനിലേക്ക് മിസൈൽ ആക്രമണം നടത്തിയിരുന്നു.