ബ്രിട്ടനിൽ മോർട്ട്ഗേജ് നിരക്കുകൾ ഉയർന്ന് നിൽക്കുകയാണ്. ഇത് മൂലം പലരും വീട് വാങ്ങാനുള്ള തീരുമാനങ്ങൾ അൽപ്പം നീട്ടിവെയ്ക്കുന്നുണ്ട്. രാജ്യത്തെ ശരാശരി വീട് വിലകളും ഉയർന്ന നിലയിലാണ്. എങ്കിലും മഹാമാരിക്ക് ശേഷമുള്ള കുതിപ്പിൽ അൽപ്പം ആശ്വാസവും വന്നിട്ടുണ്ട്.
-------------------aud--------------------------------
ഈ ഘട്ടത്തിലാണ് സുപ്രധാനമായ ഒരു പ്രവചനം പുറത്തുവരുന്നത്. അടുത്ത അഞ്ച് വർഷത്തിൽ ശരാശരി ഭവനവിലയിൽ 61,500 പൗണ്ട് വർധനവ് ഉണ്ടാകുമെന്നാണ് എസ്റ്റേറ്റ് ഏജന്റ് സാവിൽസിന്റെ പ്രവചനം. 2028 അവസാനത്തോടെ ബ്രിട്ടനിലെ ശരാശരി വീടിന്റെ മൂല്യം 21.6 ശതമാനം വർധിക്കുമെന്നാണ് ഇവർ കണക്കാക്കുന്നത്.
കഴിഞ്ഞ വർഷം നവംബറിൽ 17.9% വർദ്ധന പ്രവചിച്ച ഇടത്താണ് എസ്റ്റേറ്റ് ഏജന്റ് നിരക്ക് പുതുക്കിയിരിക്കുന്നത്. വാർഷിക വർദ്ധന 2024 വർഷത്തിൽ 2.5 ശതമാനം ഉയരുമെന്നും സാവിൽസ് പ്രവചിക്കുന്നു. ഈ വർഷം 3 ശതമാനം ഭവനവില താഴുമെന്നാണ് ഇവർ നേരത്തെ പ്രതീക്ഷിച്ചിരുന്നത്. എന്നാൽ മോർട്ട്ഗേജ് കടമെടുപ്പിന്റെ ചെലവുകൾ പുനർനിർണ്ണയിക്കപ്പെട്ട സാഹചര്യത്തിൽ ഈ പ്രവചനം പുതുക്കുകയായിരുന്നു.
ഈ വർഷം ഭവന ഇടപാടുകളുടെ എണ്ണം 1.05 മില്ല്യൺ എത്തിച്ചേരുമെന്നും സാവിൽസ് പറയുന്നു. അതേസമയം കടമെടുപ്പ് ചെലവ്, രാഷ്ട്രീയ അനിശ്ചിതത്വം എന്നിങ്ങനെ ബാഹ്യമായ വിഷയങ്ങൾ മൂലം ഹൗസിംഗ് വിപണിയിൽ ചാഞ്ചാട്ടം നേരിടുമെന്ന് ഇവർ കൂട്ടിച്ചേർത്തു. മോർട്ട്ഗേജ് ചെലവുകളിൽ നിലവിൽ സംഭവിച്ച ചെറിയ ഇടിവാണ് ഭവനവില ഉയരുന്നതിലേക്ക് സംഭാവന ചെയ്യുന്നതെന്നാണ് സാവിൽസ് വിശദീകരണം.
© Copyright 2023. All Rights Reserved