2028 ആകുമ്പോഴേക്കും നികുതി വകയില് 40 ബില്യണ് പൗണ്ട് പ്രതിവര്ഷം യുകെ ജനത അടക്കേണ്ടി വരുമെന്ന് തിങ്ക് ടാങ്കായ ദി റെസല്യൂഷന് ഫൗണ്ടേഷന് നടത്തിയ പുതിയ വിശകലനം. രാജ്യത്തെ പണപ്പെരുപ്പവും പഴ്സണല് ടാക്സ് ത്രെഷോള്ഡ് മരവിപ്പിച്ചതുമാണ് ഇതിന് പ്രധാന കാരണങ്ങളെന്നും ദി റെസല്യൂഷന് ഫൗണ്ടേഷന് അഭിപ്രായപ്പെടുന്നു. നികുതി പരിധികള് മരവിപ്പിക്കാനുള്ള സര്ക്കാരിന്റെ നയം കാരണം രാജ്യത്ത് 50 വര്ഷങ്ങള്ക്കിടെയുള്ള ഏറ്റവും വലിയ നികുതി വര്ധനവാണിതിലൂടെയുണ്ടാകാന് പോകുന്നതെന്നും ദി റെസല്യൂഷന് ഫൗണ്ടേഷന് എടുത്ത് കാട്ടുന്നു. ഇന്കം ടാക്സ്, നാഷണല് ഇന്ഷൂറന്സ് എന്നിവയ്ക്കുള്ള ത്രെഷോള്ഡുകള് 2028 വരെ മരവിപ്പിക്കാനുള്ള നയമാണ് സര്ക്കാര് സ്വീകരിച്ചിരിക്കുന്നത്. ഇതിനെ തുടര്ന്ന് മില്യണ് കണക്കിന് പേര് ഉയര്ന്ന ടാക്സ് ബാന്ഡുകളിലേക്ക് വലിക്കപ്പെടും. മറ്റൊരു വിധത്തില് പറഞ്ഞാല് നിരവധിപേര് തങ്ങളുടെ ശമ്പളത്തിന്റെ നല്ലൊരു ഭാഗം നികുതിയായി നല്കാന് നിര്ബന്ധിതരാകും. പ്രത്യേകിച്ചും സുരക്ഷിതമായ രീതിയില് ശമ്പളം വര്ധനവുണ്ടാകുന്നവര് വര്ധിച്ച നികുതി നല്കേണ്ടി വരും.
നികുതി വര്ധിപ്പിക്കുന്നതിനെതിരെ വിവിധ കോണ് കളില് നിന്ന് ശക്തമായ പ്രതിഷേധമുയരുന്നുണ്ട്. എന്നാല് മറ്റ് പ്രമുഖ യൂറോപ്യന് രാജ്യങ്ങളുമായി താരതമ്യപ്പെടുത്തുമ്പോള് യുകെയിലെ നികുതികള് വളരെ കുറവാണെന്നാണ് ട്രഷറി പറയുന്നത്. രാജ്യത്ത് ജീവിതച്ചെലവ് വര്ധിക്കുന്നതിന് അനുസരിച്ച് മിക്ക വര്ക്കര്മാര്ക്കും ശമ്പളത്തില് ക്രമാനുഗതമായ വര്ധനവുണ്ടാകുന്നുണ്ട്. തല്ഫലമായി അവര് വര്ധിച്ച നികുതി നല്കാന് നിര്ബന്ധിതരാകുന്ന സാഹചര്യവുമുണ്ട്.
ശമ്പളം വര്ധിക്കുന്നതിനെ തുടര്ന്ന് നിരവധി പേരാണ് ഉയര്ന്ന ടാക്സ് ബാന്ഡുകളിലേക്ക് വലിച്ചിഴയ്ക്കപ്പെടുന്നത്. ഇതിനെ തുടര്ന്ന് തങ്ങളുടെ സമ്പാദ്യത്തിന്റെ നല്ലൊരു ഭാഗം നികുതിയായി നല്കാന് അവര് നിര്ബന്ധിതരാകുകയും ചെയ്യുന്നു. 2027-28 വര്ഷത്തില് ബ്രിട്ടീഷുകാര് 30 ബില്യണ് പൗണ്ട് നികുതിയായി നല്കേണ്ടി വരുമെന്നായിരുന്നു നേരത്തെ ദി റെസല്യൂഷന് ഫൗണ്ടേഷന് പ്രവചിച്ചിരുന്നത്. എന്നാല് ബാങ്ക് ഓഫ് ഇംഗ്ലണ്ടിന്റെ പണപ്പെരുപ്പ പ്രവചനത്തെക്കുറിച്ച് സൂക്ഷ്മമായി പഠിച്ച ശേഷം ഈ പ്രവചനത്തില് ഫൗണ്ടേഷന് മാറ്റം വരുത്തുകയും ഇത് പ്രകാരം 2028 ആകുമ്പോഴേക്കും 40 ബില്യണ് നികുതിയായി നല്കേണ്ടി വരുമെന്ന പുതിയ നിഗമനത്തിലെത്തിച്ചേരുകയുമായിരുന്നു.
© Copyright 2023. All Rights Reserved