കോട്ടയത്ത് കേരള കോൺഗ്രസ് നേതാവ് ഫ്രാൻസിസ് ജോർജ് യുഡിഎഫ് സ്ഥാനാർത്ഥിയാകും. കേരള കോൺഗ്രസ് ജോസഫ് ഗ്രൂപ്പ് ചെയർമാൻ പി ജെ ജോസഫ് ഔദ്യോഗിക പ്രഖ്യാപനം നടത്തും. ലോക്‌സഭയിലേക്ക് കോട്ടയത്ത് കേരള കോൺഗ്രസ് സ്ഥാനാർത്ഥികൾ പരസ്പരം ഏറ്റുമുട്ടുന്നത് നാലുപതിറ്റാണ്ടിന് ശേഷമാണ്. കേരള കോൺഗ്രസ് ജോസഫ് വിഭാഗം ഡെപ്യൂട്ടി ചെയർമാനാണ്. 1980 ലാണ് കോട്ടയത്ത് കേരള കോൺഗ്രസ് മാണി ഗ്രൂപ്പും കേരള കോൺഗ്രസ് ജോസഫ് വിഭാഗവും അവസാനമായി ഏറ്റുമുട്ടിയത്. അന്ന് സിറ്റിങ്ങ് എംപി ജോർജ് ജെ മാത്യുവിനെ ഇറക്കി കേരള കോൺഗ്രസ് എം വിജയം നേടിയിരുന്നു. കേരള കോൺഗ്രസ് സ്ഥാപക നേതാവ് കെ എം ജോർജിന്റെ മകനാണ് ഫ്രാൻസിസ് ജോർജ്. ഇടുക്കിയിൽ നിന്നും ഫ്രാൻസിസ് ജോർജ് നേരത്തെ രണ്ടു തവണ ലോക്‌സഭാംഗമായിട്ടുണ്ട്. കോട്ടയത്ത് കേരള കോൺഗ്രസ് എം നേതാവും നിലവിലെ എംപിയുമായ തോമസ് ചാഴികാടനെ തന്നെ മത്സരിപ്പിക്കാൻ ഇടതുമുന്നണി തീരുമാനിച്ചിട്ടുണ്ട്. തോമസ് ചാഴികാടന്റെ സ്ഥാനാർത്ഥിത്വം കേരള കോൺഗ്രസ് എം ചെയർമാൻ ജോസ് കെ മാണി പ്രഖ്യാപിച്ചിരുന്നു. എൻഡിഎ സ്ഥാനാർത്ഥിയായി ബിഡിജെഎസ് അധ്യക്ഷൻ തുഷാർ വെള്ളാപ്പള്ളി എത്തുമെന്നാണ് സൂചന.