ചാൾസ് രാജാവിന്റെ ചിത്രം ആലേഖനം ചെയ്ത നോട്ടുകൾ പുറത്തിറങ്ങുന്നു. ജൂൺ അഞ്ചിന് ആയിരിക്കും പുതിയ നോട്ടുകൾ പുറത്തിറക്കുക. പുതിയ രൂപകൽപനയിലുള്ള നോട്ടുകൾ സ്വീകരിക്കുവാൻ, നോട്ടുകൾ കൈകാര്യം ചെയ്യുന്ന മെഷിനുകളെ പ്രാപ്തമാക്കണമെന്ന് ബാങ്ക് ഓഫ് ഇംഗ്ലണ്ട് ബിസിനസ്സ് സ്ഥാപനങ്ങളോട് ആവശ്യപ്പെട്ടു.
നിലവിൽ യു കെയിൽ പ്രാബല്യത്തിലുള്ള അഞ്ചു പൗണ്ട്, 10 പൗണ്ട്, 20 പൗണ്ട്, 50 പൗണ്ട് എന്നീ നാലു നോട്ടുകളിലും രാജാവിന്റെ ചിത്രം ആലേഖനം ചെയ്തുവരും. നോട്ടിന്റെ മുൻ ഭാഗത്തും സീത്രൂ സെക്യുരിറ്റി വിൻഡോയിലും ഈ ചിത്രം ഉണ്ടാകും. ഇതല്ലാതെ മറ്റ് മാറ്റങ്ങൾ ഒന്നും തന്നെ നിലവിലുള്ള നോട്ടുകളുടെ ഡിസൈനിൽ ഉണ്ടാവുകയില്ല.
എന്നാൽ, പ്രതീക്ഷിച്ചതിലും സാവധാനത്തിലായിരിക്കും ഈ നോട്ടുകൾ പ്രചാരണത്തിൽ വരുത്തുക. രാജാവിന്റെ പരിസ്ഥിതി സംരക്ഷണത്തിലെ താത്പര്യം കൂടി കണക്കിലെടുത്താണ് ഈ നടപടി. 1970 -ൽ 21 വയസ്സുള്ളപ്പോൾ അദ്ദേഹം പ്ലാസ്റ്റിക്കിന്റെയും രാസ മലിനീകരണത്തിന്റെയും അനന്തരഫലങ്ങളെ കുറിച്ച് ഒരു പ്രഭാഷണം നടത്തിയിരുന്നു. നിലവിൽ കീറുകയും മറ്റും ചെയ്ത നോട്ടുകൾക്ക് പകരം വയ്ക്കാൻ മാത്രമായിരിക്കും പുതിയ നോട്ടുകൾ അച്ചടിക്കുക എന്ന് ബാങ്ക് ഓഫ് ഇംഗ്ലണ്ട് പറഞ്ഞിട്ടുണ്ട്.
നോട്ടുകളുടെ രൂപ കൽപനയിൽ ഉണ്ടാകുന്ന മാറ്റം മൂലമുണ്ടാകുന്ന സാമ്പത്തികബാദ്ധ്യതകളും, പാരിസ്ഥിതിക പ്രശ്നങ്ങളും കുറയ്ക്കുന്നതിനായി, രാജകുടുംബത്തിന്റെ നിർദ്ദേശ പ്രകാരമാണ് പുതിയ നോട്ടുകളുടെ പ്രചാരണം മന്ദഗതിയിലാക്കുന്നതെന്ന് ബാങ്ക് ഓഫ് ഇംഗ്ലണ്ട് വക്താവ് അറിയിച്ചു. ബ്രിട്ടനിലെ 320 വർഷത്തെ കടലാസ് നോട്ടുകളുടെ പ്രചാരണത്തിന് അറുതി വരുത്തിക്കൊണ്ട് 2016-ൽ ആയിരുന്നു ബാങ്ക് ഓഫ് ഇംഗ്ലന്റ് പോളിമർ ബാങ്ക് നോട്ടുകൾ പുറത്തിറക്കിയത്.
പുതിയ നോട്ടുകൾക്കൊപ്പം, രാജ്ഞിയുടെ ചിത്രം ആലേഖനം ചെയ്ത പഴയ നോട്ടുകളും പ്രചാരത്തിൽ ഉണ്ടായിരിക്കും. ഇവയ്ക്കും പുതിയ നോട്ടുകൾക്കുള്ള നിയമ സാധുത ഉണ്ടായിരിക്കുന്നതാണ്. മൊത്തത്തിൽ ഏതാണ്ട് 81 ബില്യൺ പൗണ്ട് മൂല്യം വരുന്ന, രാജ്ഞിയുടെ ചിത്രം ആലേഖനം ചെയ്ത 4.6 ബില്യൺ സ്റ്റെർലിംഗ് ബാങ്ക് നോട്ടുകളാണ് ഇപ്പോൾ ബ്രിട്ടനിൽ പ്രചാരത്തിലുള്ളത്.
© Copyright 2023. All Rights Reserved