ദക്ഷിണ കൊറിയയിലെ  പ്രതിപക്ഷ നേതാവിനെതിരെ അക്രമം. അക്രമത്തിൽ ദക്ഷിണ കൊറിയൻ പ്രതിപക്ഷ നേതാവ് ലീ ജേ-മ്യുങിന് പരിക്കേറ്റു. ലീയുടെ  ബുസാൻ സന്ദർശനത്തിനിടെയാണ് അജ്ഞാതനായ അക്രമി അദ്ദേഹത്തെ ആക്രമിച്ചത്. അക്രമി കത്തി ഉപയോഗിച്ച് ലീയെ ആക്രമി്കകയായിരുന്നു എന്നാണ് ദൃക്സാക്ഷികൾ പറയുന്നത്. ആക്രമണത്തിൽ പരിക്കേറ്റ ലീ ജേ-മ്യുങ്ങിനെ ഉടൻ തന്നെ ആശുപത്രിയിൽ പ്രവേശിപ്പിച്ചു. അദ്ദേഹത്തിൻ്റെ ആരോഗ്യ നില ഗുരുതരമായി തുടരുകയാണെന്നാണ് റിപ്പോർട്ടുകൾ. അദ്ദേഹത്തിന് വിദഗ്ധ ചികിത്സ നൽകി വരികയാണെന്ന് ഡോക്ടർമാർ അറിയിച്ചു.

ദക്ഷിണ കൊറിയയിലെ പ്രധാന പ്രതിപക്ഷമായ ഡെമോക്രാറ്റിക് പാർട്ടിയുടെ തലവനാണ് ലീ ജെ-മ്യുങ്. ഇദ്ദേഹം ബുഹാനിൽ വച്ച് മാധ്യമപ്രവർത്തകരോട് സംസാരിക്കുന്നതിനിടെയാണ് ആക്രമണം നടന്നത്. മാധ്യമപ്രവർത്തകരുടെ ചില ചോദ്യങ്ങൾക്ക് ഉത്തരം നൽകിക്കൊണ്ടിരിക്കവേ അക്രമി ലീയെ കത്തി ഉപയോഗിച്ച് ആക്രമിക്കുകയായിരുന്നുവെന്ന് വാർത്താ ഏജൻസി യോൻഹാപ്പ് വ്യക്തമാക്കുന്നു. ആക്രമണത്തിൽ കഴുത്തിൻ്റെ ഇടതുഭാഗത്താണ് ലീയ്ക്ക് പരിക്കേറ്റത്.
പ്രതിപക്ഷ നേതാവ് ലീ ജെ മ്യുങ്ങിനെ ആക്രമിച്ച പ്രതിയെ സംഭവസ്ഥലത്തു വച്ചുതന്നെ അറസ്റ്റ് ചെയ്തതായി വാർത്ത ഏജൻസി അറിയിച്ചു. അതേസമയം ലീ ജെയ്-മ്യുങ്ങിൻ്റെ പരിക്കിനെക്കുറിച്ച് കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല. അതേസമയം ആക്രമണത്തിന് ഇരയായ ലീയുടെ ചിത്രങ്ങൾ സമൂഹമാധ്യമങ്ങളിൽ വൈറലായിട്ടുണ്ട്. ചിത്രങ്ങളിൽ ലീ കണ്ണടച്ച് തറയിൽ കിടക്കുന്നതും ഒരു കൂട്ടം ഉദ്യോഗസ്ഥർ അദ്ദേഹത്തിന് ചുറ്റും നിൽക്കുന്നതും കാണാൻ സാധിക്കുന്നുണ്ട്. പരിക്കേറ്റു കിടക്കുന്ന ലീയുടെ കഴുത്തിൽ ഒരു തുണി ചുറ്റിയിട്ടിരിക്കുന്നതും ചിത്രത്തിൽ കാണാൻ സാധിക്കുന്നുണ്ട്.ബുസാനിലെ ഗാദിയോക് ദ്വീപിൽ നിർമ്മാണത്തിലിരിക്കുന്ന പുതിയ വിമാനത്താവളം ലീ സന്ദർശിച്ചിരുന്നു. അതിന് പിന്നാലെയാണ് ആക്രമണം നടന്നത്. ദക്ഷിണ കൊറിയയിലെ പ്രധാന പ്രതിപക്ഷമായ ഡെമോക്രാറ്റിക് പാർട്ടിയുടെ തലവൻ കൂടിയാണ് ലീ ജേ-മ്യുങ്.