ഇന്ത്യയുടെ ബാറ്റിങ് യുവതാരം യശസ്വി ജയ്സ്വാളിനോട് ടീമിനുവേണ്ടി ബൗളിങ്ങിലും സംഭാവന ചെയ്യാൻ ആവശ്യപ്പെട്ട് സ്പിൻ ഇതിഹാസം അനിൽ കുംബ്ലെ. ബാറ്റിംഗിൽ കത്തിക്കയറുമ്പോഴും യശസ്വിക്ക് ഒരു ഉപദേശമെന്ന നിലയ്ക്കാണ് കുംബ്ലെ ഇക്കാര്യം വ്യക്തമാക്കുന്നത്.
തുടർച്ചയായ രണ്ട് മത്സരങ്ങളിൽ ഇരട്ട സെഞ്ച്വറി നേടി മിന്നുംഫോമിൽ നിൽക്കുകയാണ് താരം. വിശാഖപട്ടണം, രാജ്കോട്ട് ടെസ്റ്റുകളിലായിരുന്നു യശസ്വിയുടെ ഡബിൾ സെഞ്ച്വറികൾ. ട്രെയിനിങ് സെഷനിടെ ജയ്സ്വാൾ സ്പിൻ ബൗളെറിയുന്നത് സാധാരണമാണ്.
'നിങ്ങളുടെ ബാറ്റിങ് നന്നായിരുന്നു. എന്നാൽ നിങ്ങളുടെ സ്വാഭാവികമായ ലെഗ് സ്പിൻ പന്തുകൾ കൂടി എനിക്ക് കാണണം എന്നുണ്ട്. അതിനാൽ ഉപേക്ഷിക്കരുത്. കാരണം അത് എപ്പോഴാണ് നിങ്ങൾക്ക് പ്രയോജനപ്പെടുകയെന്ന് നിങ്ങൾക്കറിയില്ല. നടുവേദന ഉണ്ടായിട്ടുണ്ടെന്നറിയാം. എന്നാലും പരിശ്രമിക്കുക. ക്യാപ്റ്റനോട് കുറച്ച് ഓവർ എറിയാൻ തരാൻ ആവശ്യപ്പെടുക'-കുംബ്ലെ ഒരഭിമുഖത്തിൽ ജയ്സ്വാളിനോട് പറഞ്ഞു. വിശാഖപട്ടണത്ത് നടന്ന രണ്ടാം ടെസ്റ്റിന്റെ ആദ്യ ഇന്നിംഗ്സിൽ 209 റൺസെടുത്ത ജയ്സ്വാൾ രാജ്കോട്ടിലെ മൂന്നാം ടെസ്റ്റിന്റെ രണ്ടാം ഇന്നിംഗ്സിൽ പുറത്താവാതെ 214റൺസ് അടിച്ചുകൂട്ടുകയായിരുന്നു. അഞ്ച് ടെസ്റ്റുകളുടെ പരമ്പരയിലെ മൂന്ന് കളികൾ പൂർത്തിയായപ്പോൾ 109 ബാറ്റിംഗ് ശരാശരിയിൽ 545 റൺസുമായി ജയ്സ്വാളാണ് റൺവേട്ടയിൽ മുന്നിൽ.
ഈ മാസം 23ന് റാഞ്ചിയിലെ ജാർഖണ്ഡ് ക്രിക്കറ്റ് അസോസിയേഷൻ സ്റ്റേഡിയത്തിലാണ് നാലാം ടെസ്റ്റ്. രാജ്കോട്ടിൽ നടന്ന മൂന്നാം ടെസ്റ്റിൽ നാലാംദിനംതന്നെ ഇന്ത്യ ജയിച്ചിരുന്നു. 434 റൺസിൻ്റെ റെക്കോഡ് ജയമാണ്. ഇന്ത്യ നേടിയിരുന്നത്.
© Copyright 2023. All Rights Reserved