ബ്രിട്ടീഷ് മുൻ ഉപപ്രധാനമന്ത്രിയും ലേബർ പാർടിയുടെ നേതാവുമായിരുന്ന ജോൺ പെസ്കോട്ട് (86) അന്തരിച്ചു. അൽഷൈമേഴ്സ് ബാധിതനായിരുന്ന പെസ്കോട്ട് ഒരു കെയർഹോമിൽ വച്ചാണ് അന്തരിച്ചതെന്ന് കുടുംബാം​ഗങ്ങൾ വ്യക്തമാക്കി. നാലു പതിറ്റാ​​ണ്ടോളം വടക്കൻ ഇംഗ്ലണ്ടിലെ ‘ഹള്ളി’ൽ നിന്നുള്ള പാർലമെൻറ് അംഗമായിരുന്നു. മുൻ പ്രധാനമന്ത്രി ടോണി ബ്ലെയറിന് കീഴിലാണ് 1997- 2007 കാലയളവിൽ ഉപപ്രധാനമന്ത്രിയായിരുന്നത്.

-------------------aud--------------------------------
ട്രേഡ് യൂണിയൻ പ്രസ്‌ഥാനത്തിലൂടെ രാഷ്ട്രീയത്തിലെത്തിയ പ്രെസ്കോട്ട് തൻ്റെ തൊഴിലാളി വർഗ പശ്ചാത്തലത്തിൽ അഭിമാനിച്ചിരുന്നു. കാലാവസ്‌ഥാ വ്യതിയാനം സംബന്ധിച്ച 1997 ലെ ക്യോട്ടോ ഉടമ്പടി തയാറാക്കുന്നതിൽ അന്നത്തെ യുഎസ് വൈസ് പ്രസിഡന്റ് അൽ ഗോറിനൊപ്പം പ്രശംസനീയമായ പങ്കുവഹിച്ചു. 2 ജാഗ്വർ വണ്ടികൾ സ്വന്തമായുണ്ടായിരുന്നതിനാൽ അദ്ദേഹത്തിന് 'ടു ജാഗ്‌സ്' എന്ന വിളിപ്പേരുണ്ടായിരുന്നു. ചെറുപ്പത്തിൽ ബോക്സർ ആയിരുന്ന പ്രെസ്കോട്ട് 2001 ലെ തിരഞ്ഞെടുപ്പു പ്രചാരണത്തിനിടെ തനിക്കു നേരെ മുട്ടയെറിഞ്ഞയാളെ ഇടിച്ച സംഭവമുണ്ടായി. ഇതോടെ 'ടു ജാബ്‌സ്' എന്ന വിളിപ്പേരും കിട്ടി.യുഎസിനൊപ്പം ചേർന്ന് 2003 ൽ നടത്തിയ ഇറാഖ് അധിനിവേശം തെറ്റായിരുന്നുവെന്ന് തുറന്നുപറഞ്ഞ പ്രെസ്കോട്ട് അത്തരമൊരു 'ദാരുണ തീരുമാനം' എടുക്കേണ്ടിവന്നതിന്റെ പാപഭാരത്തോടെയായിരിക്കും തൻ്റെ ശിഷ്‌ടകാല ജീവിതമെന്നും പറഞ്ഞതു ശ്രദ്ധേയമായിരുന്നു. ഇറാഖ് അധിനിവേശത്തിന് കാരണക്കാരൻ ടോണി ബ്ലെയർ ആയിരുന്നുവെന്നാണ് സംഭവത്തെപ്പറ്റി അന്വേഷണം നടത്തിയ ജോൺ ചിൽക്കോട്ട് കമ്മിഷൻ കണ്ടെത്തിയത്.