പറവൂരിൽ രണ്ട് യുവഡോക്ടർമാരുടെ മരണത്തിന് ഇടയാക്കിയ അപകടം നടന്നത് ഗൂഗിൾ മാപ്പിന് പറ്റിയ പിഴവാണെന്ന തരത്തിൽ സമുഹമാധ്യമങ്ങളിലും മറ്റും ചർച്ചകൾ ഉയർന്നു വന്നിരുന്നു. എന്നാൽ അന്വേഷണത്തിൽ യുവഡോക്ടർമാരുടെ മരണത്തിന് വഴിവച്ചത് ഗൂഗിൾ മാപ്പല്ലെന്നാണ് പൊലീസ് പറയുന്നത്. വടക്കേക്കര പൊലീസ് ഇക്കാര്യം സ്ഥിരീകരിക്കുകയും ചെയ്തിട്ടുണ്ട്. ഗൂഗിൾ മാപ്പ് നോക്കി യാത്ര ചെയ്തതാണ് അപകടകാരണമെന്ന് സമൂഹമാദ്ധ്യമങ്ങളിൽ വ്യാപകമായ പ്രചാരണം ഉണ്ടായതിന്യു പിന്നാലെ, ഗൂഗിൾ മാപ്പ് നോക്കിയുള്ള യാത്രകൾ ഒഴിവാക്കണമശന്ന നിർദ്ദേശവുമായി പൊലീസും രംഗത്തെത്തിയിരുന്നു. എന്നാൽ മരണങ്ങൾ സംബന്ധിച്ചുള്ള കൂടുതൽ അന്വഷണത്തിലാണ് മരണകാരണം ഗൂഗിൾ മാപ്പിന് സംബന്ധിച്ച പിഴവല്ലെന്ന് വ്യക്തമാകുന്നത്.

യുവ ഡോക്ടർമാർ വീണു മരിച്ച പുഴ എത്തുന്നതിനുമുമ്പ് ഹോളിക്രോസ് എൽപി സ്കൂളിന് സമീപത്തുനിന്ന് ഇടത്തേക്ക് വഴിയുണ്ട്. ഈ വഴിയാണ് പോകാനുള്ളതും. ഈ വഴി ഗൂഗിൾ മാപ്പിൽ കൃത്യമായി കാണിക്കുന്നുമുണ്ട്. എന്നാൽ യുവാക്കൾ കാർ ഓടിച്ചത് അതുവഴിയില്ല. ഇടത്തേക്ക് തിരിയാതെ മുന്നോട്ടു പോകുകയായിരുന്നു. മുന്നോട്ടുപോയാൽ റോഡ് അവസാനിക്കുകയാണെന്ന് ഗുഗിൾ മാപ്പിൽ വ്യക്തമാക്കുന്നുമുണ്ട്. എന്നാൽ കാർ ഓടിച്ചവർ ഇക്കാര്യം ശ്രദ്ധിച്ചില്ലെന്നാണ് പൊലീസ് വിലയിരുത്തൽ. ഇക്കാരണങ്ങൾ കൊണ്ടാകാം യുവ ഡോക്ടർമാർ അപകടത്തിൽപ്പെട്ടതെന്ന് പൊലീസ് കരുതുന്നത്.

കടൽവാതുരുത്ത് കവലയിൽനിന്ന് ഇടത്തേക്കുതിരിഞ്ഞ് 400 മീറ്ററോളം സഞ്ചരിച്ചാലേ പുഴയുടെ സമീപമെത്തുകയുള്ളു. കടൽവാതുരുത്ത് കവലയുടെയും പുഴയുടെയും ഇടയിലുള്ളവഴി യാത്രക്കാർ കാണാതെ പോയതാകാം അപകടത്തിന് കാരണമെന്നാണ് പൊലീസിന്റെ നിഗമനം. മാത്രമല്ല ഡോക്ടർമാരുടെ കാർ പോകുന്നത് മറ്റുള്ളവരും കണ്ടിരുന്നില്ല. അതുകൊണ്ടുതന്നെ അപകട മുന്നറിയിപ്പ് ഡോക്ടർമാർക്ക് ലഭിച്ചില്ലെന്നും പൊലീസ് കരുതുന്നു. അതേസമയം റോഡ് അവസാനിക്കുകയാണെന്നും മുന്നിൽ പുഴയാണെന്നുമുള്ള മുന്നറിയിപ്പ് ബോർഡുകൾ റോഡിലില്ല എന്ന ആരോപണവും ഉയർന്നിട്ടുണ്ട്. റോഡ് അവസാനിക്കുന്നതിന് മുമ്പും പുഴയോട് ചേർന്നുള്ള ഭാഗത്തും റോഡ് അവസാനിക്കുന്നതായുള്ള മുന്നറിയിപ്പ് ബോർഡുകൾ ഉണ്ടായിരുന്നില്ലെന്നാണ് ഇപ്പോൾ ആരോപണം ഉയർന്നിരിക്കുന്നത്. പൊതുമരാമത്ത് വകുപ്പിന്റെ കീഴിലുള്ള ഈ റോഡിൽ മറ്റുള്ള എല്ലാ മുന്നറിയിപ്പ് ബോർഡുകളും സ്ഥാപിച്ചിട്ടുണ്ടെങ്കിലും ഈ അറിയിപ്പ് ഇല്ല. അതുകൊണ്ടുതന്നെ ഡോക്ടർമാർ കാറുമായി മുന്നോട്ടു പോഎകുകയായിരുന്നു എന്നാണ് പൊലീസ് വിലയിരുത്തൽ. റോഡ് അവസാനിക്കുന്ന ഭാഗത്ത് സ്ഥിരമായുള്ള ബാരിക്കേടുകളും സ്ഥാപിക്കാറുണ്ട്. എന്നാൽ സംഭവ സ്ഥലത്ത് അത്തരം ബാരിക്കേഡുകളൊന്നും ഇല്ലായിരുന്നു എന്നും നാട്ടുകാർ പറയുന്നു.

വാഹനം പുഴയിൽ വീണ് യുവഡോക്ടർമാർ മരണപ്പെട്ടതിനു പിന്നാലെ ഈ സംഭവം നാട്ടിൽ വലിയ രീതിയിൽ ചർച്ചയായിരുന്നു. അതിനുപിന്നാലെ ഗോതുരുത്ത് ദി സ്പോർട്സ് ആൻഡ് ആർട്സ് ക്ലബ് ഇവിടെ കമ്പിവേലി കെട്ടി മറയ്ക്കുകയായിരുന്നു. തുടർന്ന് പൊതുമരാമത്ത് വകുപ്പ് അധികൃതർ താത്കാലിക ബാരിക്കേഡും സ്ഥാപിച്ചിട്ടുണ്ട്. നേരത്തെ ഓട്ടോറിക്ഷ പുഴയിലേക്ക് വീണ് അപകടമുണ്ടായിരുന്നു. അന്നും ഇവിടെ സുരക്ഷാവേലി സ്ഥാപിക്കണമെന്ന് നാട്ടുകാർ ആവശ്യപ്പെട്ടിരുന്നു. എന്നാൽ അധികൃതർ ഇക്കാര്യം ചെവിക്കൊണ്ടിരുന്നില്ലെന്ന ആരോപണം ഉയരുന്നുണ്ട്.