സ്വവർഗ വിവാഹത്തിന് നിയമപരമായ അംഗീകാരം നൽകാത്ത സുപ്രീം കോടതി വിധിക്കെതിരെ പുനപരിശോധനാ ഹർജി. സ്വവർഗ വിവാഹ കേസിലെ ഹരജിക്കാരിൽ ഒരാളാണ് ഭരണഘടന ബെഞ്ചിന്റെ വിധിക്കെതിരെ സുപ്രീം കോടതിയിൽ പുനപരിശോധനാ ഹർജി നൽകിയത്.
ഒക്‌ടോബർ 17ന്, സ്വവർഗ വിവാഹങ്ങൾക്ക് നിയമപരമായ അംഗീകാരം നൽകാൻ സുപ്രീം കോടതി വിസമ്മതിച്ചിരുന്നു, അതിനായി നിയമങ്ങൾ ഉണ്ടാക്കേണ്ടത് പാർലമെന്റാണെന്ന് പരമോന്നത കോടതി വ്യക്തമാക്കിയിരുന്നു. അഞ്ചംഗ ഭരണഘടനാ ബെഞ്ചിന്റെ ഏകകണ്ഠമായ തീരുമാനത്തിൽ, വിവാഹം മൗലികാവകാശമല്ലെന്ന് പറഞ്ഞിരുന്നു.
എന്നാൽ, ഇന്ത്യയുടെ ചീഫ് ജസ്‌റ്റിസ് ഡിവൈ ചന്ദ്രചൂഡും, ജസ്‌റ്റിസ് സഞ്ജയ് കിഷൻ കൗളും സ്വവർഗ പങ്കാളിത്തത്തിന്റെ അംഗീകാരത്തിനായി വാദിച്ചു, കൂടാതെ LGBTQIA + വ്യക്തികളുടെ അവകാശങ്ങൾ സംരക്ഷിക്കുന്നതിനായി വിവേചനപരമല്ലാത്ത നിയമങ്ങൾ വേണമെന്നും ചൂണ്ടിക്കാട്ടിയിരുന്നു.
എന്നാൽ ദത്തെടുക്കൽ, ക്വിയർ ദമ്പതികൾക്കുള്ള അംഗീകാരം എന്നിവയിൽ അഞ്ചംഗ ബെഞ്ച് യോജിപ്പ് പ്രകടിപ്പിച്ചില്ല. ഭരണഘടനാ ബെഞ്ചിന്റെ നാല് വ്യത്യസ്‌ത വിധിന്യായങ്ങളിൽ ദത്തെടുക്കലിനെതിരെ രണ്ടിനെതിരെ മൂന്ന് ജഡ്‌ജിമാരുടെ പ്രതികൂല വിധിയാണ് പുറപ്പെടുവിച്ചത്.
ഇതിന് പുറമെ ക്വിയർ ബന്ധത്തിലെ വ്യക്തികളുടെ അവകാശങ്ങൾ പരിശോധിക്കാൻ ഒരു കമ്മിറ്റി രൂപീകരിക്കാൻ സുപ്രീം കോടതി കേന്ദ്ര സർക്കാരിനോട് നിർദ്ദേശിച്ചു. അവരുടെ ബന്ധത്തെ "വിവാഹം" ആയി നിയമപരമായി അംഗീകരിക്കാതെയായിരുന്നു ഈ നിർദ്ദേശം.
© Copyright 2025. All Rights Reserved
