ഇന്ത്യയും ഉസ്ബെക്കിസ്ഥാനും തമ്മിലുള്ള തന്ത്രപ്രധാനമായ ഉഭയകക്ഷി ബന്ധം കൂടുതൽ മേഖലകളിലേക്ക് വ്യാപിപ്പിക്കാൻ തീരുമാനിച്ചു. നാല് ദിവസത്തെ സന്ദർശനത്തിനായി ഇന്ത്യയിലെത്തിയ ഉസ്ബെക്കിസ്ഥാൻ വിദേശകാര്യ മന്ത്രി ബഖ്തിയോർ സെയ്ദോവും ഇന്ത്യൻ വിദേശകാര്യ മന്ത്രി ഡോ. എസ്. ജയശങ്കറും ന്യൂഡൽഹിയിൽ നടത്തിയ കൂടിക്കാഴ്ചയിലാണ് ഈ തീരുമാനം. ഊർജ്ജം, ഖനനം, വാണിജ്യം, പ്രതിരോധം, വിദ്യാഭ്യാസം എന്നീ സുപ്രധാന മേഖലകളിൽ സഹകരണം ശക്തമാക്കും. ഡിജിറ്റൽ സാങ്കേതികവിദ്യ, ആരോഗ്യം തുടങ്ങിയ മേഖലകളിലേക്കും ഇരുരാജ്യങ്ങളും തമ്മിലുള്ള ബന്ധം വളർന്നതായി ഡോ. എസ്. ജയശങ്കർ എടുത്തുപറഞ്ഞു. ഇന്ത്യയുടെ വിപുലീകൃത അയൽപക്ക നയത്തിൽ ഉസ്ബെക്കിസ്ഥാന് വലിയ പ്രാധാന്യമുണ്ടെന്നും അദ്ദേഹം വ്യക്തമാക്കി.  

ഉസ്ബെക്കിസ്ഥാൻ വിദേശകാര്യ മന്ത്രി രാഷ്ട്രപതി ദ്രൗപതി മുർമുവുമായും കൂടിക്കാഴ്ച നടത്തി. ഇരു രാജ്യങ്ങളും തമ്മിലുള്ള ചരിത്രപരവും സാംസ്കാരികവുമായ ബന്ധം രാഷ്ട്രപതി ഊന്നിപ്പറഞ്ഞു. ഖനന മേഖലയിലും പ്രത്യേകിച്ച് അപൂർവ്വ ഭൂമിയിലെ ധാതുക്കളുടെ  പര്യവേഷണത്തിലും ഒരുമിച്ചു പ്രവർത്തിക്കാനുള്ള സാധ്യതകൾ രാഷ്ട്രപതി ചൂണ്ടിക്കാട്ടി. കാർഷികം, ഫാർമസ്യൂട്ടിക്കൽസ്, ഐ.ടി മേഖലകളിലും സഹകരണം വർദ്ധിപ്പിക്കാൻ യോഗത്തിൽ തീരുമാനമായി. ഭീകരവാദം, മയക്കുമരുന്ന് കടത്ത് എന്നിവയ്ക്കെതിരെയുള്ള പോരാട്ടത്തിൽ ഇരു രാജ്യങ്ങൾക്കും ഒരേ നിലപാടാണുള്ളതെന്നും വിദേശകാര്യ മന്ത്രി ജയശങ്കർ വ്യക്തമാക്കി.