യുകെയിലെ വ്യവസായ മേഖലയുടെ ആത്മവിശ്വാസം കഴിഞ്ഞ പതിനേഴ് മാസത്തെ ഏറ്റവും താഴ്ന്ന നിരക്കിലേക്ക് കൂപ്പുകുത്തിയതായി പുതിയ റിപ്പോർട്ട്. പ്രമുഖ ധനകാര്യ സ്ഥാപനമായ ലോയ്ഡ്സ് ബാങ്ക് ഇന്ന് പുറത്തുവിട്ട സർവേ ഫലങ്ങളിലാണ് ഈ ഞെട്ടിക്കുന്ന വിവരങ്ങളുള്ളത്. 2025 ഏപ്രിൽ മാസത്തിന് ശേഷം ബ്രിട്ടീഷ് കമ്പനികൾക്കിടയിൽ രേഖപ്പെടുത്തുന്ന ഏറ്റവും കുറഞ്ഞ ബിസിനസ്സ് കോൺഫിഡൻസ് ആണിത്. പശ്ചിമേഷ്യയിൽ ഇറാനും അമേരിക്കയും തമ്മിൽ നടക്കുന്ന യുദ്ധവും അതിനെത്തുടർന്ന് ആഗോള വിപണിയിലുണ്ടായ ഇന്ധനവില വർദ്ധനവുമാണ് ഇതിന് പ്രധാന കാരണം. സാമ്പത്തിക അനിശ്ചിതത്വം നിലനിൽക്കുന്നതിനാൽ വരും മാസങ്ങളിൽ തങ്ങളുടെ വ്യാപാരം വലിയ പ്രതിസന്ധി നേരിടുമെന്ന് ഭൂരിഭാഗം സംരംഭകരും ഭയപ്പെടുന്നു. ആഗോള ഊർജ്ജ വില കുതിച്ചുയരുന്നത് ഉൽപ്പാദന ചെലവ് വർദ്ധിപ്പിക്കുകയും കമ്പനികളുടെ ലാഭവിഹിതം കുത്തനെ കുറയ്ക്കുകയും ചെയ്തിട്ടുണ്ട്. കമ്പനികൾക്ക് വരും വർഷത്തെ ഡിമാൻഡിനെക്കുറിച്ചും പ്രവർത്തനങ്ങളെക്കുറിച്ചും വലിയ ആശങ്കകളുണ്ടെന്ന് ലോയ്ഡ്സ് കൊമേഴ്സ്യൽ ബാങ്കിംഗിലെ സീനിയർ ഇക്കണോമിസ്റ്റ് ഹാൻ-ജു ഹോ വ്യക്തമാക്കി. ചെറിയ, ഇടത്തരം ബിസിനസ്സ് സ്ഥാപനങ്ങളെയാണ് ഈ സാമ്പത്തിക പ്രതിസന്ധി ഏറ്റവും കൂടുതൽ ബാധിക്കാൻ പോകുന്നത്. പണപ്പെരുപ്പം വീണ്ടും ഉയരാൻ സാധ്യതയുള്ളതിനാൽ ജീവനക്കാർക്ക് ശമ്പള വർദ്ധനവ് നൽകാൻ സാധിക്കില്ലെന്ന് പല കമ്പനികളും ഇതിനകം ജീവനക്കാരെ അറിയിച്ചിട്ടുണ്ട്. പുതിയ ജോലിക്കാരെ നിയമിക്കുന്നതും വികസന പ്രവർത്തനങ്ങൾക്കായി ബാങ്കുകളിൽ നിന്ന് വായ്പ എടുക്കുന്നതും കമ്പനികൾ താൽക്കാലികമായി നിർത്തിവെച്ചു. ഇറാൻ പ്രതിസന്ധി നീളുകയാണെങ്കിൽ ബ്രിട്ടനിലെ വ്യവസായ മേഖലയ്ക്ക് സർക്കാർ പ്രത്യേക സാമ്പത്തിക പാക്കേജുകൾ പ്രഖ്യാപിക്കേണ്ടി വരും. വരാനിരിക്കുന്ന ശൈത്യകാലത്ത് ഊർജ്ജ ഉപഭോഗം വർദ്ധിക്കുമ്പോൾ വ്യവസായ ശാലകൾ വലിയ കറന്റ് ബില്ലുകൾ അടക്കേണ്ടി വരുമെന്നത് ആശങ്ക വർദ്ധിപ്പിക്കുന്നു. ബ്രെക്സിറ്റിന് ശേഷം കയറ്റുമതി മേഖല നേരിടുന്ന തിരിച്ചടികളും ഈ ആത്മവിശ്വാസക്കുറവിന് ഒരു കാരണമായി ചൂണ്ടിക്കാണിക്കപ്പെടുന്നുണ്ട്. സാമ്പത്തിക സ്ഥിരത വീണ്ടെടുക്കാൻ ബാങ്ക് ഓഫ് ഇംഗ്ലണ്ടും ട്രഷറിയും സംയുക്തമായി പുതിയ നയങ്ങൾ രൂപീകരിക്കണമെന്ന് വ്യാപാരി വ്യവസായി സംഘടനകൾ ആവശ്യപ്പെട്ടു. സാമ്പത്തിക മാന്ദ്യത്തിലേക്കുള്ള ഒരു സൂചനയാണിതെന്നും അടിയന്തര ഇടപെടലുകൾ ഉണ്ടായില്ലെങ്കിൽ രാജ്യത്തിന്റെ ജിഡിപി നിരക്ക് താഴുമെന്നും സാമ്പത്തിക വിദഗ്ദ്ധർ മുന്നറിയിപ്പ് നൽകുന്നു.