യൂറോപ്പിലെ വിദ്യാഭ്യാസ സ്ഥാപനങ്ങളെ ലക്ഷ്യമിട്ട് ലഭിച്ച ബോംബ് ഭീഷണി സന്ദേശങ്ങളെക്കുറിച്ചുള്ള അന്വേഷണം ഇറ്റലിയിൽ ശക്തമാക്കി. രാജ്യത്തെ ആയിരക്കണക്കിന് സ്കൂളുകൾക്ക് ഇ-മെയിൽ വഴി ഭീഷണി സന്ദേശങ്ങൾ ലഭിച്ചതായി റിപ്പോർട്ടുകൾ വ്യക്തമാക്കുന്നു. ഇറ്റാലിയൻ വിദ്യാഭ്യാസ മന്ത്രാലയത്തിന്റെ കണക്കനുസരിച്ച് ആറായിരത്തിലധികം സ്കൂളുകൾക്ക് സന്ദേശം ലഭിച്ചിട്ടുണ്ട്. ഭീഷണിയെ തുടർന്ന് ബുധനാഴ്ച രാജ്യത്തിന്റെ വിവിധ ഭാഗങ്ങളിൽ സ്കൂളുകൾ ഒഴിപ്പിച്ചിരുന്നു. കുറഞ്ഞത് മുന്നൂറോളം സ്കൂളുകളിൽ വിദ്യാർഥികളെയും അധ്യാപകരെയും സുരക്ഷിത സ്ഥാനങ്ങളിലേക്ക് മാറ്റിയതായി അധികൃതർ നേരത്തെ അറിയിച്ചു. സന്ദേശങ്ങളിൽ ബോംബ് സ്ഫോടനം നടത്തുമെന്ന ഭീഷണിയാണ് ഉണ്ടായിരുന്നത്. എന്നാൽ പ്രാഥമിക പരിശോധനകളിൽ യഥാർഥ അപകടസാധ്യത കണ്ടെത്താനായിട്ടില്ലെന്ന് പ്രധാനമന്ത്രി ജോർജിയ മെലോണി വ്യക്തമാക്കി. വിദ്യാലയങ്ങളിൽ ബോംബ് കണ്ടെത്തിയതായോ സ്ഫോടനം നടന്നതായോ റിപ്പോർട്ടില്ല. ഭീഷണിയുടെ ഉറവിടം കണ്ടെത്തുന്നതിനായി ഇറ്റാലിയൻ പൊലീസ് അന്വേഷണം തുടരുകയാണ്. യൂറോപ്പിലെ മറ്റ് രാജ്യങ്ങളിലേക്കും സമാനമായ സന്ദേശങ്ങൾ എത്തിയിട്ടുണ്ട്. അയർലൻഡ്, സ്കോട്ട്ലൻഡ്, വടക്കൻ അയർലൻഡ് എന്നിവിടങ്ങളിലെ സ്കൂളുകൾക്കും ഭീഷണി സന്ദേശങ്ങൾ ലഭിച്ചതായി റിപ്പോർട്ടുണ്ട്. എന്നാൽ അവിടങ്ങളിൽ സ്കൂളുകൾ അടച്ചിടേണ്ട സാഹചര്യമുണ്ടായില്ലെന്നാണ് അധികൃതർ അറിയിച്ചത്. സ്കോട്ട്ലൻഡിലെയും ഇറ്റലിയിലെയും പൊലീസ് സന്ദേശങ്ങളെ വിശ്വസനീയമായ ഭീഷണികളായി കണക്കാക്കിയിട്ടില്ല. ഇറ്റലിയിൽ ലഭിച്ച ഇ-മെയിലിൽ പ്രധാനമന്ത്രി മെലോണിക്കെതിരെയും ഭീഷണിയുണ്ടായിരുന്നുവെന്നാണ് റിപ്പോർട്ട്. യൂറോപ്പിലെ മാധ്യമ സ്ഥാപനങ്ങൾക്കും പൊതുസേവന സംവിധാനങ്ങൾക്കും നേരെ നേരത്തെയും സമാനമായ ഭീഷണികളും സൈബർ ആക്രമണങ്ങളും ഉണ്ടായിട്ടുണ്ട്. സൂപ്പർമാർക്കറ്റുകൾ, രക്തബാങ്കുകൾ, വ്യോമഗതാഗത സംവിധാനങ്ങൾ, ടെലിവിഷൻ സ്ഥാപനങ്ങൾ എന്നിവയെ ലക്ഷ്യമിട്ടുള്ള ആക്രമണങ്ങളും യൂറോപ്യൻ സുരക്ഷാ ഏജൻസികളുടെ ശ്രദ്ധയിൽപ്പെട്ടിട്ടുണ്ട്. ഇത്തരം സംഭവങ്ങൾ ജനങ്ങളിൽ ഭീതിയും ആശയക്കുഴപ്പവും സൃഷ്ടിക്കാനുള്ള ആസൂത്രിത ശ്രമങ്ങളാകാമെന്നാണ് ഇറ്റാലിയൻ പ്രധാനമന്ത്രിയുടെ വിലയിരുത്തൽ. എന്നാൽ ആക്രമണങ്ങൾക്ക് പിന്നിൽ ഏതെങ്കിലും വിദേശ രാജ്യമോ സംഘടനയോ ആണെന്ന് സ്ഥിരീകരിച്ചിട്ടില്ല. യൂറോപ്യൻ രാജ്യങ്ങൾ പരസ്പരം സഹകരിച്ച് ഭീഷണിയുടെ ഉറവിടം കണ്ടെത്താനുള്ള നടപടികളിലാണ്.