ഇന്ത്യൻ ടീമിലെ ഏറ്റവും മികച്ച ഫോമിലുള്ള ബാറ്ററായ ശുഭ്മാൻ ഗിൽ അസുഖബാധിതനായത് ടീമിന് വലിയ തിരിച്ചടിയായിരിക്കുകയാണ്. ചെന്നൈയിൽ ഇന്ത്യയുടെ ആദ്യമത്സരത്തിന് മുന്നോടിയായാണ് താരത്തിന് പരിക്കേറ്റത്. ഓസ്ട്രേലിയക്കെതിരെ ഗില്ലിന് പകരം യുവതാരം ഇഷാൻ കിഷനെയാണ് ഇന്ത്യ രോഹിത് ശർമക്കൊപ്പം ഓപ്പണറായി കളിപ്പിച്ചത്. അഫ്ഗാനിസ്താനെതിരെ നടക്കുന്ന ലോകകപ്പ് മത്സരത്തിലും ഗിൽ കളിക്കില്ലെന്നുറപ്പാണ്. കൂടാതെ പാകിസ്താനെതിരെ ശനിയാഴ്ച നടക്കാൻ പോവുന്ന പോരാട്ടത്തിലും താരം പുറത്തിരിക്കേണ്ടി വരും. ഡെങ്കിപ്പനിയാണ് ഗില്ലിനെ കുഴപ്പത്തിലാക്കിയത്. അസുഖം പൂർണമായും മാറി താരം എപ്പോൾ പഴയ ആരോഗ്യത്തോടെ തിരിച്ചെത്തുമെന്ന് പറയാൻ സാധിക്കില്ല. അതിനാൽ തന്നെ, താൽക്കാലികമായെങ്കിലും ഗില്ലിന് പകരക്കാരനെ പ്രഖ്യാപിക്കാൻ ആലോചിക്കുകയാണ് ബിസിസിഐ. സഞ്ജു സാംസണിനെ ടീമിലേക്ക് വിളിക്കണമെന്ന ആവശ്യം ചില കോണുകളിൽ നിന്ന് ഉയരുന്നുണ്ട്. എന്നാൽ ഓപ്പണറായ ഗില്ലിന് പകരം വിക്കറ്റ് കീപ്പറും മധ്യനിര ബാറ്ററുമായ സഞ്ജുവിനെ പരിഗണിക്കാനുള്ള സാധ്യതകൾ വളരെ കുറവാണ്.

പ്രധാനമായും രണ്ട് കളിക്കാരെയാണ് ഗില്ലിൻെറ സ്ഥാനത്തേക്ക് പരിഗണിക്കുന്നത്. ഏഷ്യൻ ഗെയിംസിൽ ഇന്ത്യൻ ടീമിനെ നയിച്ച ഋതുരാജ് ഗെയ്ക്വാദാണ് ഒന്നാമത്തെയാണ്. ഋതുരാജ് ഓസ്ട്രേലിയക്കെതിരെ ഇന്ത്യക്കായി കളിച്ചിരുന്നു. ഏഷ്യൻ ഗെയിസിലും മികച്ച ഫോമിലാണ് കളിച്ചത്. വലങ്കയ്യൻ ബാറ്റർ കൂടിയായതിനാൽ ഗില്ലിന് പറ്റിയ പകരക്കാരനാണ് ഋതുരാജ് ഗെയ്ക്വാദ്. ഋതുരാജിന് വെല്ലുവിളിയാവാൻ പോവുന്നത് സഹതാരവും ഐപിഎല്ലിൽ രാജസ്ഥാൻ റോയൽസിൻെറ സൂപ്പർതാരവുമായ യശസ്വി ജെയ്സ്വാളാണ് . കഴിഞ്ഞ ഐപിഎൽ മുതൽ മിന്നുന്ന ഫോം തുടരുകയാണ് യശസ്വി. ടെസ്റ്റിൽ ഇന്ത്യക്കായി അരങ്ങേറ്റം നടത്തിയ താരം കന്നിമത്സരത്തിൽ തന്നെ സെഞ്ചുറി നേടിയിരുന്നു. ഏഷ്യൻ ഗെയിംസിൽ നേപ്പാളിനെതിരെ സെഞ്ചുറി നേടിയും യശസ്വി തൻെറ ക്ലാസ് തെളിയിച്ചിട്ടുണ്ട്.

ഇരുവരും മികച്ച ഫോമിൽ കളിക്കുന്ന ബാറ്റർമാരാണ്. ഏകദിനത്തിലെ പരിചയ സമ്പത്തും സീനിയോരിറ്റിയും പരിഗണിക്കുമ്പോൾ ഋതുരാജിന് നറുക്ക് വീഴാൻ തന്നെയാണ് സാധ്യത. എന്നാൽ അന്തിമ തീരുമാനം സെലക്ടർമാർ പ്രഖ്യാപിക്കും. താൽക്കാലികമായാണോ അതോ സ്ഥിരമായി ലോകകപ്പിൽ നിന്ന് ഗില്ലിനെ ഒഴിവാക്കുമോയെന്നതും ചർച്ചകൾക്ക് ശേഷമായിരിക്കും വ്യക്തമാക്കുക. ഗില്ലിനെപ്പോലൊരു കളിക്കാരനെ പരമാവധി കളിപ്പിക്കാൻ തന്നെയായിരിക്കും ടീം മാനേജ്മെൻറ് ശ്രമിക്കുക. എന്നാൽ താരം എത്ര വേഗത്തിൽ ആരോഗ്യസ്ഥിതി വീണ്ടെടുക്കുമെന്നതാണ് പ്രധാനം. പാകിസ്താനെതിരായ മത്സരത്തിന് ശേഷമോ അല്ലെങ്കിൽ ഏറ്റവും കൂടിയത് നോക്കൌട്ട് ഘട്ടത്തിലെങ്കിലും ഗിൽ ടീമിൽ മടങ്ങിയെത്തുമെന്ന് തന്നെയാണ് പ്രതീക്ഷ.

ലോകകപ്പ് ടീമിലേക്ക് നേരത്തെ പരിഗണിക്കപ്പെട്ടിരുന്നതിനാലാണ് സഞ്ജുവിൻെറ പേര് ഉയർന്നു കേൾക്കുന്നത്. ശ്രേയസ് അയ്യർ, കെഎൽ രാഹുൽ എന്നിവർ പരിക്കിൻെറ പിടിയിലായിരുന്നപ്പോൾ സഞ്ജു പരിഗണനയിലുണ്ടായിരുന്നു. എന്നാൽ ഇപ്പോൾ സാഹചര്യം മാറി. ഋതുരാജിനെയും യശസ്വിയെയും മറികടന്ന് സഞ്ജു വരാനുള്ള സാധ്യതകൾ ഇല്ലെന്ന് തന്നെ ഉറപ്പിച്ച് പറയാവുന്നതാണ്.