നവംബറിൽ അഞ്ച് സംസ്ഥാനങ്ങളിൽ നടക്കുന്ന അസംബ്ലി തിരഞ്ഞെടുപ്പുകളിൽ മൂന്നിടങ്ങളിൽ കോൺഗ്രസ്സിന് മുന്നേറ്റമുണ്ടാക്കാൻ കഴിയുമെന്ന് എബിപി-സിവോട്ടർ അഭിപ്രായ സർവ്വേ. മധ്യപ്രദേശ്, തെലങ്കാന, ഛത്തീസ്ഗഢ് എന്നീ സംസ്ഥാനങ്ങളിലാണ് കോൺഗ്രസ് നേട്ടമുണ്ടാക്കുക. രാജസ്ഥാൻ ബിജെപി പിടിച്ചെടുക്കും. മിസോറമിൽ തൂക്കു മന്ത്രിസഭയ്ക്കാണ് സാധ്യതയെന്ന് സർവ്വേ പ്രവചിക്കുന്നു. ഇവിടെ ആർക്കും ഭൂരിപക്ഷമുണ്ടാക്കാൻ കഴിയില്ല. നവംബർ 17നാണ് മധ്യപ്രദേശിൽ വോട്ടെടുപ്പ് നടക്കുക. സംസ്ഥാനത്ത് അധികാരമാറ്റമുണ്ടാകുമെന്നാണ് എബിപി - സി വോട്ടർ അഭിപ്രായ സർവ്വേ പ്രവചിക്കുന്നത്. കേവലഭൂരിപക്ഷം ഒറ്റയ്ക്ക് നേടാൻ കോൺഗ്രസ്സിനാകും. 113 മുതൽ 125 വരെ സീറ്റുകളാണ് കോൺഗ്രസ്സിന് പ്രവചിക്കപ്പെടുന്നത്. ബിജെപിക്ക് 104 സീറ്റ് മുതൽ 116 സീറ്റ് വരെ ലഭിച്ചേക്കും. ബിഎസ്പി രണ്ട് സീറ്റിൽ വിജയിക്കാൻ സാധ്യതയുണ്ട്. മറ്റുള്ളവർ 3 സീറ്റുകളും സ്വന്തമാക്കിയേക്കും. തെലങ്കാന
സംസ്ഥാന രൂപീകരണത്തിനു ശേഷം ഇതാദ്യമായി കെ ചന്ദ്രശേഖര റാവുവിന്റെ കൈയിൽ നിന്ന് സംസ്ഥാനഭരണം പോകുമെന്ന സൂചനയാണ് എബിപി - സി വോട്ടർ സർവ്വേ ഫറലം നൽകുന്നത്. കോൺഗ്രസ് 48 മുതൽ 60 വരെ സീറ്റുകൾ പിടിച്ചേക്കും. എന്നാൽ കെസിആറിന്റെ ഭാരത് രാഷ്ട്ര സമിതിക്ക് 43 മുതൽ 55 വരെ സീറ്റുകളേ പിടിക്കാനാകൂ. സംസ്ഥാനം പിടിച്ച് ദക്ഷിണേന്ത്യൻ രാഷ്ട്രീയത്തിൽ മുന്നേറ്റമുണ്ടാക്കാൻ തയ്യാറെടുക്കുന്ന ബിജെപിക്ക് 5 മുതൽ 11 വരെ സീറ്റുകളേ നേടാനാകൂ. സാരമായ തോതിൽ വോട്ടുവിഹിതം ഉയർത്താൻ ബിജെപിക്ക് കഴിയുമെന്നും സർവ്വേ പറയുന്നുണ്ട്.   മിസോറമിൽ നിലവിൽ ഭരണത്തിലിരിക്കുന്ന എംഎൽഎഫ് (മിസോ നാഷണൽ ഫ്രണ്ട്) കൂടുതൽ സീറ്റുകൾ നേടുമെങ്കിലും കേവല ഭൂരിപക്ഷത്തിലേക്ക് എത്തില്ല. തൂക്കുസഭയ്ക്കാണ് സാധ്യത. 13 മുതൽ 17 വരെ സീറ്റുകൾ എംഎൽഎഫ് പാർട്ടി കൊണ്ടുപോകുമെന്നാണ് എബിപി - സി വോട്ടർ അഭിപ്രായ സർവ്വേ പറയുന്നത്.  ഛത്തീസ്ഗഢ്ൽ ബിജെപിക്ക് ഇത്തവണ വോട്ടുവിഹിതം ഉയർത്താൻ കഴിഞ്ഞേക്കുമെങ്കിലും അധികാരം കോൺഗ്രസ് നിലനിർത്തുമെന്നാണ് എബിപി - സി വോട്ടർ അഭിപ്രായ സർവ്വേ പറയുന്നത്. 45 മുതൽ 51 വരെ സീറ്റുകൾ ലഭിച്ചേക്കും കോൺഗ്രസ്സിന്. ബിജെപിക്ക് 39 മുതൽ 45 വരെ സീറ്റുകളാണ് പ്രവചിക്കപ്പെടുന്നത്.  അവസാനിക്കാത്ത ആഭ്യന്തരക്കുഴപ്പങ്ങളിൽ കുടുങ്ങിയ രാജസ്ഥാൻ കോൺഗ്രസ്സിന് അധികാരത്തിനു പുറത്തിറങ്ങിയ ശേഷം കുഴപ്പങ്ങൾ തുടരാനുള്ള അവസരമുണ്ടാകുമെന്നാണ് എബിപി - സിവോട്ടർ അഭിപ്രായ സർവ്വേ ഫലം പറയുന്നത്. ബിജെപി 127നും 137നും ഇടയിൽ സീറ്റുകൾ സമാഹരിച്ച് അധികാരത്തിലെത്തുമെന്നാണ് സർവ്വേഫലം. 46 ശതമാനത്തോളം വോട്ടുവിഹിതവും ബിജെപി സ്വന്തമാക്കും. അതെസമയം കോൺഗ്രസ് 59നും 69നും ഇടയിൽ സീറ്റുകളിലേക്ക് ചുരുങ്ങും. വോട്ടുവിഹിതം 42 ശതമാനമാകും. അശോക് ഗെലോട്ടിന്റെ സർക്കാർ കടുത്ത ഭരണവിരുദ്ധ വികാരം നേരിടുന്നുണ്ടെന്നാണ് സർവ്വേ പറയുന്നത്.