പശ്ചിമേഷ്യൻ സംഘർഷവും ഉയർന്ന ഊർജവിലയും ആഗോള സമ്പദ്‌വ്യവസ്ഥയ്ക്ക് വെല്ലുവിളി ഉയർത്തുന്നതിനിടെ, നടപ്പുവർഷത്തെ ആഗോള സാമ്പത്തിക വളർച്ചാ പ്രവചനം 3.1 ശതമാനമായി ഉയർത്തി അന്താരാഷ്ട്ര നാണയനിധി. നേരത്തേ ജൂലൈയിൽ പ്രവചിച്ചിരുന്ന മൂന്ന് ശതമാനത്തിൽനിന്നാണ് നേരിയ വർധന വരുത്തിയത്. കൃത്രിമബുദ്ധി മേഖലയിലെ വൻ നിക്ഷേപമാണ് ഈ വളർച്ചയ്ക്ക് പ്രധാന പിന്തുണയാകുന്നതെന്ന് ഐഎംഎഫ് വ്യക്തമാക്കി. 2025-ൽ ആഗോള സാമ്പത്തിക വളർച്ച 3.5 ശതമാനമായിരുന്നു. 2027-ൽ 3.4 ശതമാനം വളർച്ചയാണ് സംഘടന പ്രതീക്ഷിക്കുന്നത്.

ബാങ്കോക്കിൽ നടക്കുന്ന ഐഎംഎഫിന്റെയും ലോകബാങ്കിന്റെയും വാർഷിക യോഗങ്ങളുടെ പശ്ചാത്തലത്തിലാണ് പുതിയ സാമ്പത്തിക വിലയിരുത്തൽ പുറത്തുവന്നത്. പശ്ചിമേഷ്യയിലെ യുദ്ധം ദീർഘകാലം തുടരുകയാണെങ്കിൽ എണ്ണവിലയും പണപ്പെരുപ്പവും വീണ്ടും ഉയരാൻ സാധ്യതയുണ്ടെന്ന് റിപ്പോർട്ട് മുന്നറിയിപ്പ് നൽകുന്നു. എണ്ണവില ബാരലിന് 100 ഡോളറിനു മുകളിലുള്ള സാഹചര്യം വിവിധ രാജ്യങ്ങളുടെ സാമ്പത്തിക നിലയെ ബാധിക്കുന്നുണ്ട്. കൃത്രിമബുദ്ധി സാങ്കേതികവിദ്യയിൽ നിക്ഷേപം നടത്തുന്ന രാജ്യങ്ങൾക്കാണ് നിലവിൽ കൂടുതൽ നേട്ടമുണ്ടാകുന്നത്. ഇന്ത്യയുടെ 2026-ലെ സാമ്പത്തിക വളർച്ച ഏഴ് ശതമാനമായിരിക്കുമെന്നാണ് ഐഎംഎഫിന്റെ പ്രവചനം. അമേരിക്കയ്ക്ക് 2.3 ശതമാനവും ചൈനയ്ക്ക് 4.5 ശതമാനവും വളർച്ചയാണ് പ്രതീക്ഷിക്കുന്നത്.

യൂറോ മേഖലയിലെ വളർച്ചാ പ്രവചനം 1.1 ശതമാനമായി ഉയർത്തിയിട്ടുണ്ട്. അതേസമയം, എണ്ണവിലയിലെ വർധനയും ആഭ്യന്തര ആവശ്യകതയിലെ ദൗർബല്യവും ചൈനയുടെ വളർച്ചയെ ബാധിക്കാമെന്നാണ് വിലയിരുത്തൽ. സൗദി അറേബ്യ ഉൾപ്പെടെയുള്ള ഗൾഫ് രാജ്യങ്ങളിൽ യുദ്ധത്തിന്റെ സാമ്പത്തിക പ്രത്യാഘാതം രൂക്ഷമാകാമെന്നും റിപ്പോർട്ട് ചൂണ്ടിക്കാട്ടുന്നു. ആഗോള ഉപഭോക്തൃ പണപ്പെരുപ്പം 2026-ൽ 4.7 ശതമാനത്തിലെത്തുമെന്നാണ് കണക്ക്. ഉയർന്ന പൊതുകടവും കാലാവസ്ഥാ ദുരന്തങ്ങളും വളർച്ചയ്ക്ക് അധിക ഭീഷണിയാണ്. കൃത്രിമബുദ്ധി നിക്ഷേപത്തിൽ പ്രതീക്ഷിച്ച നേട്ടം ലഭിക്കാത്ത പക്ഷം സാമ്പത്തിക വളർച്ചയെ അത് പ്രതികൂലമായി ബാധിച്ചേക്കാം. ആഗോള സമ്പദ്‌വ്യവസ്ഥയുടെ പ്രതിരോധശേഷി നിലനിൽക്കുന്നുണ്ടെങ്കിലും അപകടസാധ്യതകൾ വർധിക്കുകയാണെന്ന് ഐഎംഎഫ് മുന്നറിയിപ്പ് നൽകി.