ലണ്ടൻ: അപ്രതീക്ഷിതമായ പ്രകൃതിദുരന്തങ്ങൾ, കടുത്ത കാലാവസ്ഥാ വ്യതിയാനങ്ങൾ, വൈദ്യുതി തടസ്സങ്ങൾ, സൈബർ ആക്രമണങ്ങൾ തുടങ്ങിയ അടിയന്തര സാഹചര്യങ്ങൾ നേരിടാൻ രാജ്യത്തെ ഓരോ കുടുംബവും തയ്യാറായിരിക്കണമെന്ന് ബ്രിട്ടീഷ് സർക്കാരിന്റെ മുന്നറിയിപ്പ്. ഇതിന്റെ ഭാഗമായി, അടിയന്തര സാഹചര്യമുണ്ടായാൽ കുറഞ്ഞത് 72 മണിക്കൂർ അഥവാ മൂന്ന് ദിവസം വീടിന് പുറത്തുനിന്നുള്ള സഹായമില്ലാതെ കഴിയാൻ ആവശ്യമായ അവശ്യസാധനങ്ങൾ മുൻകൂട്ടി കരുതിവെക്കണമെന്ന നിർദ്ദേശമാണ് അധികൃതർ മുന്നോട്ടുവെക്കുന്നത്.

സർക്കാരിന്റെ 'Be Ready' അടിയന്തര മുന്നൊരുക്ക ക്യാമ്പെയിനിൻെറ ഭാഗമായാണ് ഈ ആഹ്വാനം. യുകെയിൽ താമസിക്കുന്ന മലയാളി കുടുംബങ്ങൾ ഉൾപ്പെടെയുള്ള പൊതുജനങ്ങൾ അടിയന്തര സാഹചര്യങ്ങളെ ആത്മവിശ്വാസത്തോടെ നേരിടാൻ ആവശ്യമായ തയ്യാറെടുപ്പുകൾ നടത്തണമെന്നാണ് നിർദ്ദേശം.

പരിഭ്രാന്തി സൃഷ്ടിക്കുകയല്ല, മറിച്ച് മുൻകരുതൽ ഉറപ്പാക്കുകയാണ് ക്യാമ്പെയിനിൻെറ പ്രധാന ലക്ഷ്യം. ഒരുമിച്ച് വലിയ തുക ചെലവഴിച്ച് സാധനങ്ങൾ വാങ്ങുന്നതിനുപകരം, പതിവ് പലചരക്ക് ഷോപ്പിംഗിനൊപ്പം ഓരോന്നായി ആവശ്യമായ സാധനങ്ങൾ വാങ്ങി വീട്ടിൽ കരുതിവെക്കാനാണ് നിർദ്ദേശം.

72 മണിക്കൂർ കരുതൽ ശേഖരത്തിൽ ഉൾപ്പെടുത്തേണ്ട പ്രധാന സാധനങ്ങൾ:

ഒരാൾക്ക് പ്രതിദിനം ഏകദേശം മൂന്ന് ലിറ്റർ വെള്ളം എന്ന കണക്കിൽ മൂന്ന് ദിവസത്തേക്ക് കുറഞ്ഞത് ഒമ്പത് ലിറ്റർ കുടിവെള്ളം കരുതണം. കുടിക്കാനും പാചകത്തിനും ആവശ്യമായ വെള്ളത്തിന്റെ ലഭ്യത ഉറപ്പാക്കേണ്ടതുണ്ട്.

ഭക്ഷണത്തിനായി ഫ്രിഡ്ജിന്റെ സഹായമില്ലാതെ സൂക്ഷിക്കാവുന്ന ടിൻ ഭക്ഷണങ്ങൾ, ടിൻ ചെയ്ത മീൻ, ഇറച്ചി, പച്ചക്കറികൾ, ഡ്രൈ ഫ്രൂട്ട്സ്, എനർജി ബാറുകൾ തുടങ്ങിയവ കരുതണം. ഇവയ്ക്കൊപ്പം മാന്വൽ ടിൻ ഓപ്പണറും ഉണ്ടായിരിക്കണം.

വൈദ്യുതി തടസ്സപ്പെട്ടാൽ ഉപയോഗിക്കാൻ അധിക ബാറ്ററികളോടുകൂടിയ ടോർച്ച്, ആവശ്യത്തിന് ബാറ്ററികൾ, കട്ടിയുള്ള വസ്ത്രങ്ങൾ, പുതപ്പുകൾ, സ്ലീപ്പിംഗ് ബാഗുകൾ എന്നിവയും തയ്യാറാക്കണം.

ആശയവിനിമയ സംവിധാനങ്ങൾ തടസ്സപ്പെട്ടാൽ ഔദ്യോഗിക വിവരങ്ങൾ അറിയാൻ ബാറ്ററിയിലോ വൈൻഡപ്പ്ലോ പ്രവർത്തിക്കുന്ന റേഡിയോയും മൊബൈൽ ഫോൺ ചാർജ് ചെയ്യാൻ പവർ ബാങ്കും കരുതേണ്ടതാണ്.

ആരോഗ്യസുരക്ഷയ്ക്കായി പ്രഥമശുശ്രൂഷാ കിറ്റ്, ബാൻഡേജുകൾ, ആന്റിസെപ്റ്റിക്, ഹാൻഡ് സാനിറ്റൈസർ, വെറ്റ് വൈപ്പുകൾ എന്നിവയ്ക്കൊപ്പം പതിവായി ഉപയോഗിക്കുന്ന ആവശ്യമായ മരുന്നുകളും കരുതണം.

ഡിജിറ്റൽ പേയ്‌മെന്റ് സംവിധാനങ്ങൾ പ്രവർത്തനരഹിതമായാൽ ഉപയോഗിക്കാൻ ചെറിയ തുക പണമായി സൂക്ഷിക്കുന്നതും പ്രധാനമാണ്. പ്രധാനപ്പെട്ട രേഖകളുടെ പകർപ്പുകളും അടിയന്തരമായി ബന്ധപ്പെടേണ്ട ഫോൺ നമ്പറുകളും സുരക്ഷിതമായി സൂക്ഷിക്കണം.

കുട്ടികളുള്ള കുടുംബങ്ങൾ ബേബി ഫോർമുല, റെഡി-ടു-ഫീഡ് പാൽ, ഡയപ്പറുകൾ തുടങ്ങിയവയും വളർത്തുമൃഗങ്ങളുള്ളവർ അവയ്ക്കാവശ്യമായ ഭക്ഷണവും മറ്റ് അവശ്യസാധനങ്ങളും കരുതേണ്ടതുണ്ട്.

ഇതിനുപുറമെ, ഓരോ കുടുംബത്തിന്റെയും പ്രത്യേക ആവശ്യങ്ങൾ പരിഗണിച്ച് ആവശ്യമായ അധിക സാധനങ്ങളും കരുതൽ ശേഖരത്തിൽ ഉൾപ്പെടുത്തണം.

സാധനങ്ങളുടെ കാലാവധി കൃത്യമായി പരിശോധിക്കണം

കരുതിവെക്കുന്ന ഭക്ഷണസാധനങ്ങളുടെയും മരുന്നുകളുടെയും കാലാവധി കൃത്യമായ ഇടവേളകളിൽ പരിശോധിക്കേണ്ടതും പ്രധാനമാണ്. ആറുമാസത്തിലൊരിക്കൽ കരുതൽ ശേഖരം പരിശോധിച്ച് കാലാവധി കഴിഞ്ഞവ മാറ്റി പുതിയവ ഉൾപ്പെടുത്തുന്നത് ശീലമാക്കണം.

അടിയന്തര സാഹചര്യങ്ങൾ എപ്പോൾ വേണമെങ്കിലും സംഭവിക്കാമെന്നതിനാൽ അവസാന നിമിഷത്തെ പരിഭ്രാന്തി ഒഴിവാക്കി മുൻകൂട്ടി തയ്യാറെടുക്കുകയാണ് ഏറ്റവും ഉചിതമായ മാർഗം.

യുകെയിലെ മലയാളി കുടുംബങ്ങൾ ഉൾപ്പെടെയുള്ള എല്ലാ പൊതുജനങ്ങളും ഈ നിർദ്ദേശങ്ങൾ ഗൗരവമായി കാണണമെന്നും സ്വന്തം വീടുകളിൽ 72 മണിക്കൂർ അടിയന്തര കരുതൽ ശേഖരം ഒരുക്കണമെന്നും മാഗ്നവിഷൻ ടിവി ന്യൂസ് ഓർമ്മിപ്പിക്കുന്നു.