ലോകമെമ്പാടുമുള്ള വാനനിരീക്ഷകരെ ആവേശത്തിലാഴ്ത്തിക്കൊണ്ട് ആകാശത്ത് ഇന്ന് ഒരു അപൂർവ്വ പ്രതിഭാസം അരങ്ങേറി. ആറ് ഗ്രഹങ്ങൾ ഒരേ നിരയിൽ അണിനിരന്ന അപൂർവ്വ ഗ്രഹസംഗമത്തിനാണ് ഇന്ന് പുലർച്ചെ ആകാശം സാക്ഷ്യം വഹിച്ചത്. ബുധൻ, വ്യാഴം, ചൊവ്വ, ശനി, യുറാനസ്, നെപ്റ്റ്യൂൺ എന്നീ ആറ് ഗ്രഹങ്ങളാണ് ഒറ്റവരിയിലായി ദൃശ്യമായത്. ഇന്ന് പുലർച്ചെ സൂര്യോദയത്തിന് 30 മുതൽ 60 മിനിറ്റ് മുൻപുള്ള സമയത്താണ് ഈ ഗ്രഹസംഗമം ഏറ്റവും വ്യക്തമായി കാണാൻ കഴിഞ്ഞത്. ഭൂമിയിൽ നിന്നും നോക്കുമ്പോൾ ഈ ഗ്രഹങ്ങൾ ഒരു നേർരേഖയിൽ അണിനിരക്കുന്നതുപോലെയാണ് തോന്നുക. എന്നാൽ ഇത് ഗ്രഹങ്ങൾ യഥാർത്ഥത്തിൽ ഒരു നേർരേഖയിൽ വരുന്നതല്ലെന്നും സൗരയൂഥത്തിന്റെ ജ്യാമിതീയ പ്രത്യേകത കൊണ്ടാണെന്നും നാസ വിശദീകരിച്ചു. വ്യാഴം, ചൊവ്വ, ശനി എന്നീ ഗ്രഹങ്ങളെ നഗ്നനേത്രങ്ങൾ കൊണ്ട് തന്നെ കാണാൻ സാധിച്ചു എന്നതായിരുന്നു ഇതിലെ ഏറ്റവും വലിയ പ്രത്യേകത. ബുധൻ ഗ്രഹം ചക്രവാളത്തോട് വളരെ ചേർന്ന് നിന്നതിനാൽ അതിനെ പെട്ടെന്ന് കണ്ടെത്താൻ അല്പം ബുദ്ധിമുട്ടായിരുന്നു. അതേസമയം യുറാനസ്, നെപ്റ്റ്യൂൺ എന്നീ ഗ്രഹങ്ങളെ കാണാൻ മികച്ച ബൈനോക്കുലറുകളോ ദൂരദർശിനികളോ ആവശ്യമായി വന്നു. പെഴ്സ്യൂഡ് ഉൽക്കാവർഷം അതിന്റെ പാരമ്യത്തിൽ നിൽക്കുന്ന സമയത്താണ് ഈ ഗ്രഹസംഗമവും നടന്നത് എന്നത് മറ്റൊരു സവിശേഷതയാണ്. ആകാശത്ത് ഉൽക്കകൾ മിന്നിമറയുന്നതിനൊപ്പം ഗ്രഹങ്ങളെയും കാണാൻ കഴിഞ്ഞത് ശാസ്ത്രലോകത്തിന് വലിയൊരു പുതിയ അനുഭവമായി. കഴിഞ്ഞ ദിവസം നടന്ന സൂര്യഗ്രഹണത്തിന് തൊട്ടുപിന്നാലെയാണ് ഈ അപൂർവ്വ പ്രതിഭാസവും ഉണ്ടായിരിക്കുന്നത് എന്നത് ശ്രദ്ധേയമാണ്. കിഴക്കൻ ആകാശത്ത് മേഘങ്ങളില്ലാത്ത തെളിഞ്ഞ കാലാവസ്ഥയുള്ള പ്രദേശങ്ങളിൽ ഇത് വളരെ വ്യക്തമായി കാണാൻ കഴിഞ്ഞു. ലോകത്തിന്റെ വിവിധ ഭാഗങ്ങളിൽ നിന്നുള്ള ആസ്ട്രോ ഫോട്ടോഗ്രാഫർമാർ ഈ മനോഹരമായ കാഴ്ച തങ്ങളുടെ ക്യാമറകളിൽ പകർത്തിയിട്ടുണ്ട്. പ്രപഞ്ചത്തിന്റെ വിസ്മയങ്ങൾ വീണ്ടും മനുഷ്യനെ അത്ഭുതപ്പെടുത്തുന്നു എന്നതിന്റെ ഏറ്റവും പുതിയ ഉദാഹരണമായി ഈ സംഭവം മാറി.