ലോക് താന്ത്രിക് ജനതാദളും രാഷ്ട്രീയ ജനതാദളും തമ്മിലുള്ള ലയനം ഒക്ടോബർ 12ന് നടക്കും. കോഴിക്കോട് വെച്ചാണ് എൽജെഡി - ആർജെഡി ലയനസമ്മേളനം നടക്കുക. ഇതിനുള്ള ഒരുക്കങ്ങൾ പൂർത്തിയായതായി എൽജെഡി സംസ്ഥാന അധ്യക്ഷൻ എംവി ശ്രേയാംസ്കുമാർ അറിയിച്ചു. വൈകീട്ട് നാലിനാണ് പരിപാടി നടക്കുക. ബിഹാർ ഉപമുഖ്യമന്ത്രി തേജസ്വി യാദവ് ഉൾപ്പെടെയുള്ള പ്രമുഖർ പങ്കെടുക്കും. ആരോഗ്യപ്രശ്‌നങ്ങളില്ലെങ്കിൽ ലാലുപ്രസാദ് യാദവും പങ്കെടുക്കുമെന്നും ശ്രേയാംസ്‌കുമാർ അറിയിച്ചു. ആർജെഡിയിലേക്കാണ് ലയനം.
അതെസമയം ശ്രേയാംസ് കുമാറിന്റെ കൂടെ ചേരുന്നതിനോട് യോജിപ്പില്ലാത്ത ആർജെഡിയിലെ ഒരു വിഭാഗം പുതിയ പാർട്ടി രൂപീകരിച്ചാണ് പ്രതികരിച്ചിരിക്കുന്നത്. നാഷണൽ ജനതാദൾ എന്നാണ് ഈ പാർട്ടിയുടെ പേര്. ആർജെഡിയെ എൽ‍ജെഡി വിലകൊടുത്ത് വാങ്ങിയെന്ന് നാഷണൽ ജനതാദൾ പ്രസിഡണ്ട് ജോൺ ജോൺ പ്രതികരിച്ചു. സംസ്ഥാന നേതൃത്വത്തോട് ചർച്ച നടത്താതെയാണ് ശ്രേയാംസ് കുമാർ പാർട്ടിയിലേക്ക് ലയിച്ചിരിക്കുന്നത്. യുഡിഎഫിനൊപ്പമാണ് നാഷണൽ ജനതാദൾ നിലയുറപ്പിക്കുക. മെയ് 28 മുതൽ 31 വരെ കൽപ്പറ്റ റിസോർട്ടിലുണ്ടായിരുന്ന ബിഹാർ ഉപമുഖ്യമന്ത്രി തേജസ്വി യാദവിന് എന്താണ് സംഭവിച്ചതെന്ന് കണ്ടെത്തണമെന്ന് ജോൺ ജോൺ പറഞ്ഞു. ബിഹാർ സർക്കാരിന്റെ ചെലവിൽ ചാർട്ടേഡ് വിമാനത്തിലാണ് തേജസ്വി വന്നത്. അദ്ദേഹത്തെ എങ്ങനെയാണ് ബ്ലാക്മെയിൽ ചെയ്തതെന്നാണ് അറിയേണ്ടതെന്ന് ജോൺ ജോൺ പ്രതികരിച്ചു. അതെസമയം നിലവിൽ പ്രതിസന്ധി നേരിടുന്ന ജെഡിഎസ്സിനെ ആർജെഡിയിലേക്ക് ശ്രേയാംസ് കുമാർ ക്ഷണിച്ചു. ജെഡിഎസ്സിന് എൻ‍ഡിഎയിലുള്ള ദേശീയ നേതൃത്വത്തിനൊപ്പം എങ്ങനെ തുടരാനാകുമെന്ന് അറിയില്ലെന്നും അദ്ദേഹം പറഞ്ഞു. കഴിഞ്ഞദിവസം സംസ്ഥാന നിർവ്വാഹക സമിതി യോഗം ചേർന്ന ജെഡിഎസ്, വ്യക്തമായ തീരുമാനങ്ങളൊന്നും പ്രഖ്യാപിച്ചിട്ടില്ല. ഈ മാസം 11ന് നടക്കുന്ന സംസ്ഥാന സമിതി യോഗത്തിൽ കുറെക്കൂടി വ്യക്തത കൈവന്നേക്കും. പുതിയൊരു പാർട്ടി രൂപീകരിക്കുന്നതിനെക്കുറിച്ച് ജെഡിഎസ് ഇപ്പോൾ ചിന്തിക്കുന്നില്ല. എന്നാൽ ഭാവിയിൽ ലയനമുണ്ടാകില്ലെന്ന് പറയാനാകില്ല.
എല്ലാക്കാലത്തും വർഗ്ഗീയശക്തികളോട് സന്ധി ചെയ്യാതെ നിന്നിട്ടുള്ള പാർട്ടിയാണ് ആർജെഡിയെന്ന് ശ്രേയാംസ് കുമാർ പറഞ്ഞു. ഇക്കാരണത്താലാണ് ആർജെഡിയുമായി ലയിക്കാൻ തീരുമാനമെടുത്തത്. സമാനമനസ്ഥിതിയുള്ള കക്ഷികളെ തങ്ങൾ ഒപ്പംചേരാൻ ക്ഷണിക്കുന്നതായും അദ്ദേഹം വ്യക്തമാക്കി.