സംസ്ഥാനത്ത് വൈദ്യുതി പ്രതിസന്ധി രൂക്ഷമായി തുടരുന്ന സാഹചര്യത്തില്‍ യൂണിറ്റിന് 30 രൂപ നിരക്കിൽ വൈദ്യുതി വാങ്ങാനുള്ള തീരുമാനം കെ.എസ്.ഇ.ബി താത്കാലികമായി ഉപേക്ഷിച്ചു. എൻ.ടി.പി.സിയിൽ നിന്ന് 300 മെഗാവാട്ട് വൈദ്യുതി വാങ്ങാനായിരുന്നു നേരത്തെ കെ.എസ്.ഇ.ബി തീരുമാനിച്ചിരുന്നത്. ഉയർന്ന വിലയ്ക്ക് വൈദ്യുതി വാങ്ങുന്നത് ജനങ്ങൾക്ക് ഭാവിയിൽ താങ്ങാനാവാത്ത ബാധ്യതയാകുമെന്ന് കണ്ടാണ് സർക്കാരും ബോർഡും ഈ തീരുമാനത്തിൽ നിന്ന് പിന്നോട്ട് പോയത്. നിലവിൽ കേന്ദ്ര പൂളിൽ നിന്നുള്ള 150 മെഗാവാട്ട് വൈദ്യുതി മാത്രമാണ് സംസ്ഥാനത്തിന് ലഭിക്കാൻ ഉറപ്പായിട്ടുള്ളത്. മഴയുടെ കുറവും ഉയർന്ന താപനിലയും കാരണം സംസ്ഥാനത്തെ വൈദ്യുതി ഉപഭോഗം ഈ മാസങ്ങളിൽ റെക്കോർഡ് നിലയിലെത്തിയിരിക്കുകയാണ്. പ്രതിദിന ഉപഭോഗം 94.76 ദശലക്ഷം യൂണിറ്റ് വരെ ഉയർന്നത് പ്രതിസന്ധിയുടെ ആഴം വീണ്ടും വർദ്ധിപ്പിച്ചു. ഡാമുകളിലെ ജലനിരപ്പ് മുൻവർഷത്തെക്കാൾ ഗണ്യമായി കുറഞ്ഞതും ജലവൈദ്യുത ഉൽപ്പാദനത്തെ സാരമായി ബാധിച്ചിട്ടുണ്ട്. മറ്റ് സംസ്ഥാനങ്ങളിൽ നിന്നുള്ള ദീർഘകാല പവർ പർച്ചേസ് കരാറുകൾ മുൻ എൽ.ഡി.എഫ് സർക്കാർ റദ്ദാക്കിയതാണ് ഇപ്പോഴത്തെ പ്രതിസന്ധിക്ക് കാരണമെന്ന് മുഖ്യമന്ത്രി വി.ഡി സതീശൻ ആവർത്തിച്ച് വ്യക്തമാക്കി. എന്നാൽ ഈ ആരോപണം അടിസ്ഥാനരഹിതമാണെന്ന് പറഞ്ഞ് സി.പി.എമ്മും പ്രതിപക്ഷവും രംഗത്തെത്തിയത് വലിയ രാഷ്ട്രീയ വാക്പോരിന് കാരണമായിട്ടുണ്ട്. തുടർച്ചയായ ദിവസങ്ങളിൽ അനുഭവപ്പെടുന്ന അപ്രഖ്യാപിത പവർ കട്ട് ജനജീവിതം വലിയ രീതിയിൽ ദുസ്സഹമാക്കിയിരിക്കുകയാണ്. വൈകുന്നേരങ്ങളിലെ വൈദ്യുതി നിയന്ത്രണങ്ങൾക്കെതിരെ സി.പി.ഐ ഇന്ന് സംസ്ഥാന വ്യാപകമായി കെ.എസ്.ഇ.ബി ഓഫീസുകൾക്ക് മുന്നിൽ പ്രതിഷേധം സംഘടിപ്പിക്കുന്നുണ്ട്. വാണിജ്യ സ്ഥാപനങ്ങളെയും വിദ്യാർത്ഥികളുടെ പഠനത്തെയും ഇത് വളരെ ദോഷകരമായി ബാധിച്ചിട്ടുണ്ട്. പ്രതിസന്ധി പരിഹരിക്കാൻ സർക്കാരിന്റെ ഭാഗത്തുനിന്നും അടിയന്തര ഇടപെടലുകൾ ഉണ്ടാകണമെന്നാണ് പൊതുസമൂഹത്തിന്റെ വലിയ ആവശ്യം. ഈ മാസം പകുതിയോടെ പ്രതിസന്ധിക്ക് ശാശ്വത പരിഹാരം കാണുമെന്ന് മുഖ്യമന്ത്രി നേരത്തെ ജനങ്ങൾക്ക് ഉറപ്പ് നൽകിയിരുന്നു. എന്നാൽ വൈദ്യുതി നിയന്ത്രണങ്ങൾ ഇനിയും കുറച്ചു നാൾ കൂടി തുടരാനാണ് സാധ്യതയെന്നാണ് പുറത്തുവരുന്ന സൂചനകൾ.