കാർഷിക മേഖലയിൽ മണ്ണിന്റെ ആരോഗ്യം സംരക്ഷിക്കുന്നതിനും സുസ്ഥിര കൃഷിരീതികൾ പ്രോത്സാഹിപ്പിക്കുന്നതിനുമായി കേന്ദ്ര സർക്കാർ പുതിയ രാജ്യവ്യാപക പ്രചാരണത്തിന് തുടക്കമിടുന്നു. ‘ഖേത് ബചാവോ അഭിയാൻ – റാബി 2026’ എന്ന പേരിലുള്ള ക്യാമ്പയിൻ ഇന്ന് ഹരിയാനയിലെ കർണാലിൽ കേന്ദ്ര കൃഷി-കർഷകക്ഷേമ മന്ത്രി ശിവരാജ് സിങ് ചൗഹാൻ ഉദ്ഘാടനം ചെയ്യുമെന്നാണ് ഔദ്യോഗിക അറിയിപ്പ്. ഒക്ടോബർ 22 മുതൽ നവംബർ 30 വരെയാണ് പ്രചാരണത്തിന്റെ കാലയളവ്. മണ്ണിന്റെ ആരോഗ്യം മെച്ചപ്പെടുത്തുന്നതാണ് പദ്ധതിയുടെ പ്രധാന ലക്ഷ്യങ്ങളിലൊന്ന്. മണ്ണുപരിശോധനയുടെ അടിസ്ഥാനത്തിൽ വളങ്ങൾ ഉപയോഗിക്കാൻ കർഷകരെ പ്രോത്സാഹിപ്പിക്കും. രാസവളങ്ങളുടെ സന്തുലിതമായ ഉപയോഗത്തെക്കുറിച്ചും ബോധവൽക്കരണം നടത്തും. പയർവർഗങ്ങൾ, എണ്ണക്കുരുക്കൾ, ഹോർട്ടികൾച്ചർ വിളകൾ എന്നിവയുടെ കൃഷിക്ക് പ്രാധാന്യം നൽകും. നെല്ല് കൊയ്ത്തിനുശേഷം ഉപയോഗിക്കാതെ കിടക്കുന്ന കൃഷിയിടങ്ങൾ ഫലപ്രദമായി വിനിയോഗിക്കുന്നതും പദ്ധതിയുടെ ലക്ഷ്യമാണ്. വിളകളുടെ അവശിഷ്ടങ്ങൾ കൈകാര്യം ചെയ്യുന്നതിനുള്ള ശാസ്ത്രീയ മാർഗങ്ങളും കർഷകർക്ക് പരിചയപ്പെടുത്തും. പ്രകൃതിദത്ത കൃഷിരീതികൾക്കും ജൈവവളങ്ങളുടെയും ജൈവാധിഷ്ഠിത ഉൽപ്പന്നങ്ങളുടെയും അനുയോജ്യമായ ഉപയോഗത്തിനും പ്രാധാന്യം നൽകും. ജലസംരക്ഷണം, മഴവെള്ള സംഭരണം, ഭൂഗർഭജല പുനർനിറവ് എന്നിവയും പ്രചാരണത്തിന്റെ ഭാഗമായിരിക്കും. കൃഷിവിജ്ഞാന കേന്ദ്രങ്ങളും കാർഷിക സർവകലാശാലകളും സംസ്ഥാന കൃഷിവകുപ്പുകളും പ്രവർത്തനങ്ങളിൽ പങ്കാളികളാകും. കർഷകർക്കായി പരിശീലന പരിപാടികൾ, കർഷക സംഗമങ്ങൾ, കൃഷിയിടങ്ങളിലെ പ്രദർശനങ്ങൾ എന്നിവ സംഘടിപ്പിക്കും. കാർഷിക യന്ത്രവൽക്കരണവും കാലാവസ്ഥാ വ്യതിയാനത്തെ അതിജീവിക്കാൻ സഹായിക്കുന്ന കൃഷിരീതികളും പ്രോത്സാഹിപ്പിക്കും. ഏകദേശം ഒരു കോടി ആളുകളിലേക്ക് പ്രചാരണത്തിന്റെ സന്ദേശം എത്തിക്കുകയാണ് ലക്ഷ്യമെന്ന് ഔദ്യോഗിക റിപ്പോർട്ട് വ്യക്തമാക്കുന്നു. മണ്ണിന്റെയും ജലത്തിന്റെയും സംരക്ഷണത്തിലൂടെ കൃഷിച്ചെലവ് കുറയ്ക്കാനും ദീർഘകാല കാർഷിക ഉൽപ്പാദനക്ഷമത മെച്ചപ്പെടുത്താനും പദ്ധതി സഹായിക്കുമെന്നാണ് പ്രതീക്ഷ.