ജപ്പാനിലെ ഐച്ചി-നഗോയയിൽ പുരോഗമിക്കുന്ന ഇരുപതാമത് ഏഷ്യൻ ഗെയിംസിൽ ഇന്ത്യയ്ക്ക് വീണ്ടും ചരിത്ര നേട്ടം. വനിതകളുടെ റിക്കർവ് അമ്പെയ്ത്തിൽ ഇന്ത്യൻ താരം കുങ്കും മോഹോദ് സ്വർണ്ണ മെഡൽ സ്വന്തമാക്കി രാജ്യത്തിന്റെ അഭിമാനമായി മാറി. ഏഷ്യൻ ഗെയിംസ് ചരിത്രത്തിൽ ആദ്യമായാണ് ഒരു ഇന്ത്യൻ വനിത റിക്കർവ് വ്യക്തിഗത ഇനത്തിൽ സ്വർണ്ണം നേടുന്നത്. ദക്ഷിണ കൊറിയൻ താരം ഓ യെജിനെതിരായ അതിവാശിയേറിയ ഫൈനൽ പോരാട്ടത്തിലാണ് കുങ്കും ഈ ചരിത്ര വിജയം കുറിച്ചത്. ആദ്യത്തെ രണ്ട് സെറ്റുകൾ പൂർത്തിയായപ്പോൾ ദക്ഷിണ കൊറിയൻ താരം മൂന്നിനെതിരെ ഒന്ന് പോയിന്റുകൾക്ക് മുന്നിലായിരുന്നു. എന്നാൽ വലിയ സമ്മർദ്ദങ്ങളെ അതിജീവിച്ച് അതിഗംഭീരമായ തിരിച്ചുവരവാണ് ഇന്ത്യൻ താരം പിന്നീട് നടത്തിയത്. നാലാം സെറ്റിൽ കൊറിയൻ താരം ലീഡ് നേടിയെങ്കിലും അഞ്ചാം സെറ്റിൽ മികച്ച പ്രകടനം പുറത്തെടുത്ത് കുങ്കും മത്സരം ഷൂട്ട്-ഓഫിലേക്ക് നീട്ടി. സ്വർണ്ണ മെഡൽ നിർണ്ണയിക്കുന്ന നിർണ്ണായക ഷൂട്ട്-ഓഫിൽ ഓ യെജിൻ എട്ട് പോയിന്റ് നേടിയപ്പോൾ കുങ്കും കൃത്യമായി പത്തിൽ അമ്പെയ്തു. ഈ വിജയത്തോടെ വരാനിരിക്കുന്ന ലോസ് ഏഞ്ചൽസ് ഒളിമ്പിക്സിനുള്ള യോഗ്യതയും കുങ്കും സ്വന്തമാക്കിയിട്ടുണ്ട്. നേരത്തെ വനിതകളുടെ റിക്കർവ് ടീം ഇനത്തിൽ സ്വർണ്ണവും മിക്സഡ് ടീം ഇനത്തിൽ വെള്ളിയും കുങ്കും നേടിയിരുന്നു. അതിനിടെ ഏഷ്യൻ ഗെയിംസ് ഗോൾഫ് കോഴ്സിലും ഇന്ത്യ മികച്ച മെഡൽ പ്രതീക്ഷയാണ് നൽകുന്നത്. വനിതകളുടെ വ്യക്തിഗത സ്ട്രോക്ക് പ്ലേയിൽ ഇന്ത്യൻ താരങ്ങളായ പ്രണവി ശരത് ഉർസ്, അതിഥി അശോക്, ദീക്ഷ ദാഗർ എന്നിവർ മികച്ച പ്രകടനം തുടരുന്നു. ഗോൾഫ് വനിതാ ടീം ഇനത്തിലും മികച്ച റാങ്കിംഗോടെ ഇന്ത്യ നിലവിൽ മെഡൽ നിലവാരത്തിലുണ്ട്. തായ്‌ക്വാൻഡോയിൽ ഇന്ത്യൻ താരം കശിഷ് മാലിക് ദക്ഷിണ കൊറിയൻ താരത്തോട് പരാജയപ്പെട്ട് പുറത്തായത് ഇന്ത്യയ്ക്ക് തിരിച്ചടിയായി. ഇന്ന് മറ്റ് കായിക ഇനങ്ങളിലും വലിയ വിജയങ്ങൾ നേടാൻ കഴിയുമെന്ന ആത്മവിശ്വാസത്തിലാണ് ഇന്ത്യൻ ടീം.