പ്രോസ്റ്റേറ്റ് കാൻസർ ചികിത്സാ രംഗത്ത് വലിയ കുതിച്ചുചാട്ടത്തിന് വഴിയൊരുക്കുന്ന ഒരു നിർണ്ണായക ഗവേഷണ പദ്ധതിക്ക് യുകെയിൽ തുടക്കമായി. എൻഎച്ച്എസ് ഇംഗ്ലണ്ടിന്റെ നേതൃത്വത്തിൽ നടക്കുന്ന ഈ മെഗാ പഠന പദ്ധതിയിലേക്ക് രാജ്യത്തെ അഞ്ച് ലക്ഷത്തോളം പുരുഷന്മാരെയാണ് ഇപ്പോൾ ക്ഷണിച്ചിരിക്കുന്നത്. പ്രോസ്റ്റേറ്റ് കാൻസർ അതിജീവിച്ചവരെയോ അല്ലെങ്കിൽ നിലവിൽ ഈ രോഗം ബാധിച്ചവരെയോ ആണ് പഠനത്തിനായി പ്രധാനമായും ലക്ഷ്യമിടുന്നത്. ഇവരെ ഈ റിസർച്ച് പ്രോഗ്രാമിലേക്ക് ക്ഷണിച്ചുകൊണ്ട് ആരോഗ്യ വകുപ്പ് ഇതിനോടകം തന്നെ കത്തുകളും ടെക്സ്റ്റ് മെസ്സേജുകളും അയച്ചു തുടങ്ങിയിട്ടുണ്ട്. ലോകത്തിലെ തന്നെ ഏറ്റവും വലിയ പ്രോസ്റ്റേറ്റ് കാൻസർ റിസർച്ച് ഡാറ്റാബേസുകളിൽ ഒന്ന് സൃഷ്ടിക്കുക എന്നതാണ് ഈ സംരംഭത്തിലൂടെ എൻഎച്ച്എസ് ലക്ഷ്യമിടുന്നത്. രോഗം വളരെ നേരത്തെ കണ്ടുപിടിക്കുന്നതിനും കൂടുതൽ ഫലപ്രദമായ ചികിത്സാ രീതികൾ വികസിപ്പിക്കുന്നതിനും ഈ പഠനം വലിയ രീതിയിൽ സഹായിക്കും. 'പ്രോസ്റ്റേറ്റ് പ്രോഗ്രസ്' എന്ന് പേരിട്ടിരിക്കുന്ന ഈ പഠന പരിപാടിയിൽ പങ്കെടുക്കുന്നവർ തങ്ങളുടെ അനുഭവങ്ങൾ പങ്കുവെക്കേണ്ടതുണ്ട്. ഇതിനായി പഠനത്തിൽ ചേരുന്നവർക്ക് ഓരോ കുറച്ചു മാസങ്ങൾ കൂടുമ്പോഴും തങ്ങളുടെ ആരോഗ്യ വിവരങ്ങൾ ചോദ്യാവലികൾ വഴി നൽകാൻ സാധിക്കും. കൂടാതെ തങ്ങളുടെ എൻഎച്ച്എസ് മെഡിക്കൽ റെക്കോർഡുകൾ ഗവേഷണ ആവശ്യങ്ങൾക്കായി സുരക്ഷിതമായി ബന്ധിപ്പിക്കാൻ ഇവർ അനുമതിയും നൽകണം. കാൻസർ ചികിത്സ രോഗികളുടെ ജീവിത നിലവാരത്തെയും ശാരീരിക അവസ്ഥയെയും എങ്ങനെ ബാധിക്കുന്നു എന്ന് കൃത്യമായി മനസ്സിലാക്കാൻ ഇതിലൂടെ ഡോക്ടർമാർക്ക് കഴിയും. യുകെയിൽ പുരുഷന്മാർക്കിടയിൽ കാണപ്പെടുന്ന കാൻസറുകളിൽ ഏറ്റവും കൂടുതലായി റിപ്പോർട്ട് ചെയ്യപ്പെടുന്നത് പ്രോസ്റ്റേറ്റ് കാൻസറാണ്. ഓരോ വർഷവും പതിനായിരക്കണക്കിന് ആളുകളെയാണ് ഈ കാൻസർ നേരിട്ടും അല്ലാതെയും ബാധിക്കുന്നതെന്ന് കണക്കുകൾ വ്യക്തമാക്കുന്നു. ഗവൺമെന്റിന്റെ നാഷണൽ കാൻസർ പ്ലാനിന്റെ ഭാഗമായി ഇത്തരം കാൻസർ ഗവേഷണങ്ങൾക്ക് കൂടുതൽ പ്രാധാന്യം നൽകുന്നുണ്ട്. കൃത്യമായ ഡാറ്റകളിലൂടെ ഭാവി തലമുറയ്ക്ക് കൂടുതൽ മികച്ച ചികിത്സ നൽകാൻ ഈ പദ്ധതിയിലൂടെ കഴിയുമെന്ന് ആരോഗ്യമന്ത്രി ജെയിംസ് ഫ്രിത്ത് പറഞ്ഞു. ക്ഷണക്കത്ത് ലഭിക്കുന്ന പുരുഷന്മാർ യാതൊരു മടിയും കൂടാതെ ഈ സുപ്രധാന ഗവേഷണ പദ്ധതിയുടെ ഭാഗമാകണമെന്ന് എൻഎച്ച്എസ് കാൻസർ ഡയറക്ടർ അഭ്യർത്ഥിച്ചു. കാൻസർ കോശങ്ങൾ അപകടകരമാകുന്നത് എന്തുകൊണ്ടാണെന്ന് കണ്ടെത്താനും വ്യക്തിഗത ചികിത്സകൾ നൽകാനും ഈ പഠനം സഹായിക്കുമെന്ന് ഗവേഷകർ വിലയിരുത്തുന്നു.