ഐപിഎൽ മിനി താരലേലത്തിൽ ഓസ്ട്രേലിയയുടെ ലോലകകപ്പ് ഹീറോ ട്രാവിസ് ഹെഡിനായി സൺറൈസേഴ്സ് ഹൈദരാബാദും ചെന്നൈ സൂപ്പർ കിംഗ്സും തമ്മിൽ വാശിയേറിയ ലേലം വിളി. രണ്ട് കോടി രൂപ അടിസ്ഥാനവിലയുണ്ടായിരുന്ന ഹെഡിനായി ഇരു ടീമുകളും ശക്തമായി രംഗത്തെത്തിയതോടെ ലേലത്തുക ഉയർന്നു. ഒടുവിൽ 6.80 കോടി രൂപയിലെത്തി. ഇതോടെ പേഴ്സിൽ പണം കുറവുള്ള ചെന്നൈ ഹൈദരാബാദിൻറെ സമ്മർദ്ദത്തിൽ ട്രാവിസ് ഹെഡിനെ സ്വന്തമാക്കാമമെന്ന മോഹം ഉപേക്ഷിച്ചു.

ലോകകപ്പിൽ ഓസീസിനായി കളിച്ച മുൻ നായകൻ സ്റ്റീവ് സ്മിത്തിന് ഇത്തവണ ആവശ്യക്കാരുണ്ടായിരുന്നില്ല. രണ്ട് കോടി രൂപ അടിസ്ഥാനവിലയുണ്ടായിരുന്നു സ്മിത്തിനായി ഒരു ടീമും രംഗത്തുവന്നില്ല. ഇന്ത്യൻ താരങ്ങളായ കരുൺ നായർ, മനീഷ് പാണ്ഡെ എന്നിവർക്കും ലേലത്തിൽ ആവശ്യക്കാരുണ്ടായില്ല. 50 ലക്ഷം രൂപയായിരുന്നു ഇരുവരുടെയും അടിസ്ഥാന വില. രണ്ട് കോടി രൂപ അടിസ്ഥാന വിലയുണ്ടായിരുന്ന വെസ്റ്റ് ഇൻഡീസ് നായകൻ റൊവ്മാൻ പവലിനെ 7.40 കോടി രൂപക്ക് സ്വന്തമാക്കിയ രാജസ്ഥാൻ റോയൽസാണ് ലേലത്തിന് മികച്ച തുടക്കമിട്ടത്. പവലിനെ സ്വന്തമാക്കിയതോടെ മധ്യനിരയിൽ വിൻഡീസ് കരുത്തും രാജസ്ഥാന് സ്വന്തമായി. ഷിമ്രോൺ ഹെറ്റ്മെയർക്കൊപ്പം കളി ഫിനിഷ് ചെയ്യാൻ കഴിയുന്ന ബാറ്റിംഗ് ഓൾ റൗണ്ടറെന്ന നിലയിൽ പവലിൻറെ സാന്നിധ്യം രാജസ്ഥാന് കരുത്താകുമെന്നാണ് കരുതുന്നത്.