ഇംഗ്ലണ്ടിലെ ആശുപത്രികളിലെ അത്യാഹിത വിഭാഗങ്ങളിൽ ചികിത്സയ്ക്കായി എത്തുന്ന കുട്ടികളുടെ ആരോഗ്യനില പെട്ടെന്ന് വഷളാകുന്നത് നേരത്തേ തിരിച്ചറിയാൻ പുതിയ മുന്നറിയിപ്പ് സംവിധാനം നടപ്പിലാക്കുന്നു. നാഷണൽ ഹെൽത്ത് സർവീസ് അഥവാ എൻ.എച്ച്.എസ് ആണ് ഇതുസംബന്ധിച്ച പ്രഖ്യാപനം നടത്തിയത്. നാഷണൽ പീഡിയാട്രിക് ഏർലി വാണിങ് സിസ്റ്റം എന്നറിയപ്പെടുന്ന പുതിയ സംവിധാനം ഇതിനകം ആശുപത്രികളിലെ കിടത്തിച്ചികിത്സാ വിഭാഗങ്ങളിൽ ഉപയോഗിക്കുന്നുണ്ട്. എന്നാൽ ആദ്യമായാണ് ഈ സംവിധാനം അത്യാഹിത വിഭാഗങ്ങളിലും വ്യാപകമായി നടപ്പിലാക്കുന്നത്. കുട്ടികളുടെ രക്തസമ്മർദം, ഹൃദയമിടിപ്പ്, ശ്വസനനിരക്ക്, രക്തത്തിലെ ഓക്സിജന്റെ അളവ്, ബോധനില എന്നിവ പരിശോധിച്ചായിരിക്കും ആരോഗ്യനില വിലയിരുത്തുക. ഈ പരിശോധനകളുടെ അടിസ്ഥാനത്തിൽ ഓരോ കുട്ടിക്കും ഒരു മുന്നറിയിപ്പ് സ്കോർ നൽകും. സ്കോർ ഉയരുന്നത് കുട്ടിയുടെ ആരോഗ്യനില വഷളാകുന്നതിന്റെ സൂചനയായിരിക്കും. ഇതുവഴി അടിയന്തര ചികിത്സ ആവശ്യമുള്ള കുട്ടികളെ ജീവനക്കാർക്ക് വേഗത്തിൽ തിരിച്ചറിയാൻ സാധിക്കും. തിരക്കേറിയ അത്യാഹിത വിഭാഗങ്ങളിൽ ചികിത്സ വൈകുന്നത് ഒഴിവാക്കുകയാണ് പദ്ധതിയുടെ പ്രധാന ലക്ഷ്യം. ഈ ശൈത്യകാലം മുതൽ ഇംഗ്ലണ്ടിലെ അത്യാഹിത വിഭാഗങ്ങളിൽ സംവിധാനം ഘട്ടംഘട്ടമായി നടപ്പിലാക്കുമെന്ന് എൻ.എച്ച്.എസ് അറിയിച്ചു. ലോകത്തിലെ ഏറ്റവും വലിയ ഏകീകൃത ശിശു ആരോഗ്യ മുന്നറിയിപ്പ് സംവിധാനമായി ഇത് മാറുമെന്നാണ് അധികൃതരുടെ വിലയിരുത്തൽ. ഇംഗ്ലണ്ടിൽ പ്രതിവർഷം ആറു ദശലക്ഷത്തിലധികം കുട്ടികളാണ് അത്യാഹിത വിഭാഗങ്ങളിൽ ചികിത്സ തേടുന്നത്. അതിനാൽ പുതിയ സംവിധാനം വലിയൊരു വിഭാഗം കുട്ടികൾക്ക് പ്രയോജനപ്പെടുമെന്നാണ് പ്രതീക്ഷ. അതേസമയം, ഡോക്ടർമാരുടെ പ്രൊഫഷണൽ വിലയിരുത്തലിന് പകരമാകാനല്ല ഈ സംവിധാനം രൂപകൽപ്പന ചെയ്തിരിക്കുന്നതെന്ന് അധികൃതർ വ്യക്തമാക്കി. മാതാപിതാക്കളുടെയും പരിചാരകരുടെയും കുട്ടികളുടെയും ആശങ്കകൾക്കും പരാതികൾക്കും തുടർന്നും പ്രാധാന്യം നൽകും. സ്കോർ കുറവാണെങ്കിലും മാതാപിതാക്കൾ ഗുരുതരമായ ആരോഗ്യപ്രശ്നം ചൂണ്ടിക്കാട്ടിയാൽ അടിയന്തര പരിശോധനയും ചികിത്സയും ഉറപ്പാക്കാൻ സംവിധാനമുണ്ടാകും. ആവശ്യമായ പരിശീലനവും ജീവനക്കാരുടെ ലഭ്യതയും ഉറപ്പാക്കിയാൽ കുട്ടികളുടെ ചികിത്സാസുരക്ഷ മെച്ചപ്പെടുത്താൻ ഈ പദ്ധതി സഹായിക്കുമെന്നാണ് ആരോഗ്യരംഗത്തെ വിദഗ്ധരുടെ വിലയിരുത്തൽ.