പ്രധാനമന്ത്രി നരേന്ദ്ര മോദി ഇന്ന് ഗുജറാത്തിൽ വിവിധ വികസന പദ്ധതികളുടെ ഉദ്ഘാടനത്തിനും തറക്കല്ലിടലിനുമായി എത്തും. രണ്ടുദിവസത്തെ ഗുജറാത്ത് സന്ദർശനത്തിന്റെ ഭാഗമായി ബനസ്‌കന്തയിലും ഏകതാനഗറിലുമാണ് പ്രധാന പരിപാടികൾ നടക്കുന്നത്. 14,000 കോടിയിലധികം രൂപയുടെ വികസന പദ്ധതികളാണ് ബനസ്‌കന്തയിൽ പ്രധാനമന്ത്രി രാജ്യത്തിന് സമർപ്പിക്കുകയും പുതിയ പദ്ധതികൾക്ക് തുടക്കം കുറിക്കുകയും ചെയ്യുന്നത്. രാവിലെ 9.30-ഓടെ ബനസ്‌കന്തയിലെ ഭാരത് ബോവൈൻ ബ്രീഡിങ് ആൻഡ് റിസർച്ച് സെന്ററും അതിന്റെ ആധുനിക ലബോറട്ടറിയും പ്രധാനമന്ത്രി സന്ദർശിക്കും. കന്നുകാലികളുടെ ജനിതകഗുണം മെച്ചപ്പെടുത്തുന്നതിനും മികച്ച ഇനങ്ങളുടെ പ്രജനനം പ്രോത്സാഹിപ്പിക്കുന്നതിനും ലക്ഷ്യമിട്ടുള്ളതാണ് ഈ സ്ഥാപനം. 127 ഏക്കർ സ്ഥലത്താണ് കേന്ദ്രം സ്ഥാപിച്ചിരിക്കുന്നത്. കാങ്ക്രേജ് ഇനം കന്നുകാലികളുടെ പ്രജനനത്തിനായി രാജ്യത്ത് ആരംഭിക്കുന്ന ആദ്യത്തെ പ്രത്യേക കേന്ദ്രമാണിത്.

രാവിലെ 10.30-ഓടെ വിവിധ വികസന പദ്ധതികളുടെ ഉദ്ഘാടനവും തറക്കല്ലിടലും നടക്കും. പ്രധാനമന്ത്രി കിസാൻ സമ്മാൻ നിധിയുടെ 24-ാം ഗഡുവും ഇന്ന് വിതരണം ചെയ്യും. ഏകദേശം 19,000 കോടി രൂപയാണ് ഈ പദ്ധതിയിലൂടെ കർഷകരിലേക്ക് നേരിട്ടുള്ള ആനുകൂല്യ കൈമാറ്റം വഴി എത്തിക്കുന്നത്. രാജ്യത്തെ 9.34 കോടിയിലധികം കർഷകർക്ക് ഈ തുകയുടെ പ്രയോജനം ലഭിക്കുമെന്നാണ് ഔദ്യോഗിക അറിയിപ്പ്. അഹമ്മദാബാദ് മെട്രോയുടെ വിമാനത്താവളത്തിലേക്കുള്ള വിപുലീകരണത്തിനും ഗിഫ്റ്റ് സിറ്റിയിലേക്കുള്ള പുതിയ പാതയ്ക്കും പ്രധാനമന്ത്രി തറക്കല്ലിടും. അഹമ്മദാബാദ്–മെഹ്‌സാന റോഡ് നാലുവരിയിൽനിന്ന് എട്ടുവരിയാക്കി വികസിപ്പിക്കുന്ന പദ്ധതിയും ഇതിൽ ഉൾപ്പെടുന്നു. ബനസ്‌കന്തയിൽ രണ്ട് ബയോ-സി.എൻ.ജി പ്ലാന്റുകൾക്കും തുടക്കമിടും. കാർഷിക അടിസ്ഥാനസൗകര്യ വികസന നിധിക്ക് കീഴിൽ പൂർത്തിയാക്കിയ 521 പദ്ധതികളും രാജ്യത്തിന് സമർപ്പിക്കും. കൂടാതെ, അഹമ്മദാബാദ്–വാരണാസി എക്സ്പ്രസ്, മെഹ്‌സാന–ബെച്ചരാജി–സബർമതി മെമു ട്രെയിൻ സർവീസുകൾക്ക് പ്രധാനമന്ത്രി ഫ്ലാഗ് ഓഫ് ചെയ്യും. വൈകുന്നേരം അഞ്ചുമണിയോടെ ഏകതാനഗറിൽ ഭാരത് പർവ് 2026 ഉദ്ഘാടനം ചെയ്യും. രാത്രി ഏകതാ പ്രകാശ് പർവിലും നർമദാ ആരതിയിലും പ്രധാനമന്ത്രി പങ്കെടുക്കും. ഒക്ടോബർ 31-ന് സർദാർ വല്ലഭ്ഭായ് പട്ടേലിന്റെ 151-ാം ജന്മവാർഷികത്തോടനുബന്ധിച്ചുള്ള രാഷ്ട്രീയ ഏകതാ ദിവസ് ആഘോഷങ്ങളിലും പ്രധാനമന്ത്രി പങ്കെടുക്കും.