ലാറ്റിനമേരിക്കയിലെ ഏറ്റവും വലിയ രാജ്യമായ ബ്രസീലിൽ പ്രസിഡന്റ് തിരഞ്ഞെടുപ്പിൽ ഇടതുപക്ഷ നേതാവ് ലൂയിസ് ഇനാസിയോ ലുല ദ സിൽവയ്ക്ക് നിർണായക വിജയം. വലതുപക്ഷ സ്ഥാനാർഥിയും സെനറ്ററുമായ ഫ്ലാവിയോ ബൊൾസൊനാരോയെ പരാജയപ്പെടുത്തിയാണ് ലുല വീണ്ടും അധികാരത്തിലെത്തുന്നത്. ഒക്ടോബർ 25-ന് നടന്ന രണ്ടാംഘട്ട വോട്ടെടുപ്പിന്റെ ഫലം ഇന്ന് പുറത്തുവന്നതോടെയാണ് ബ്രസീലിലെ രാഷ്ട്രീയ ചിത്രം വ്യക്തമായത്. 80 ശതമാനത്തിലധികം വോട്ടുകൾ എണ്ണിയ ഘട്ടത്തിൽ ലുലയ്ക്ക് 51 ശതമാനം വോട്ടുകൾ ലഭിച്ചതായി റിപ്പോർട്ടുകൾ വ്യക്തമാക്കുന്നു. എതിരാളിയായ ഫ്ലാവിയോ ബൊൾസൊനാരോയ്ക്ക് 48.68 ശതമാനം വോട്ടുകളാണ് ലഭിച്ചത്. ബ്രസീലിന്റെ സുപ്രീം തിരഞ്ഞെടുപ്പ് കോടതി ലുലയുടെ വിജയം പ്രഖ്യാപിച്ചതായാണ് അൽ ജസീറ റിപ്പോർട്ട് ചെയ്യുന്നത്. ആദ്യഘട്ട തിരഞ്ഞെടുപ്പിൽ പിന്നിലായിരുന്ന ലുലയുടെ തിരിച്ചുവരവ് രാജ്യാന്തര രാഷ്ട്രീയത്തിൽ വലിയ ശ്രദ്ധ നേടിയിട്ടുണ്ട്. ഒക്ടോബർ നാലിന് നടന്ന ആദ്യഘട്ടത്തിൽ ഫ്ലാവിയോ ബൊൾസൊനാരോയ്ക്ക് 47 ശതമാനവും ലുലയ്ക്ക് 45 ശതമാനവും വോട്ടുകൾ ലഭിച്ചിരുന്നു.

ആദ്യഘട്ടത്തിൽ ഭൂരിപക്ഷം നേടാൻ ഇരുവർക്കും കഴിയാത്തതോടെയാണ് രണ്ടാംഘട്ട വോട്ടെടുപ്പ് വേണ്ടിവന്നത്. ജീവിതച്ചെലവ് വർധിക്കുന്നതും സാധാരണ കുടുംബങ്ങളുടെ സാമ്പത്തിക പ്രതിസന്ധിയും ലുലയുടെ പ്രചാരണത്തിലെ പ്രധാന വിഷയങ്ങളായിരുന്നു. തൊഴിൽ സമയക്രമത്തിൽ മാറ്റം വരുത്തിയ ഭരണഘടനാ ഭേദഗതിയെയും അദ്ദേഹം പ്രചാരണത്തിൽ ഉയർത്തിക്കാട്ടി. വാരാന്ത്യങ്ങളിൽ സൗജന്യ പൊതുഗതാഗതം ഏർപ്പെടുത്താനുള്ള സാധ്യതയും അദ്ദേഹം മുന്നോട്ടുവച്ചിരുന്നു. എന്നാൽ രാജ്യത്തെ കുറ്റകൃത്യങ്ങൾ നിയന്ത്രിക്കുന്നതിലും സാമ്പത്തിക അസമത്വം കുറയ്ക്കുന്നതിലും ലുലയുടെ ഭരണത്തിന് മുന്നിൽ വെല്ലുവിളികൾ നിലനിൽക്കുന്നുണ്ട്. കുടുംബങ്ങളുടെ കടബാധ്യത വർധിച്ചതും ജീവിതനിലവാരം സംബന്ധിച്ച ആശങ്കകളും തിരഞ്ഞെടുപ്പിൽ പ്രധാന ചർച്ചകളായി. കനത്ത മഴയും ചില പ്രദേശങ്ങളിലെ പൊതുഗതാഗത തടസ്സങ്ങളും വോട്ടെടുപ്പിനെ ബാധിച്ചതായി റിപ്പോർട്ടുകളുണ്ട്. ഇതേത്തുടർന്ന് വോട്ടെടുപ്പ് സമയം നീട്ടണമെന്ന് ഇരുപക്ഷവും ആവശ്യപ്പെട്ടിരുന്നു. രാജ്യത്തെ ചില വോട്ടിംഗ് കേന്ദ്രങ്ങളിൽ വോട്ടെടുപ്പ് പ്രതീക്ഷിച്ചതിലും രണ്ട് മണിക്കൂർ വൈകിയാണ് അവസാനിച്ചത്. മുൻ പ്രസിഡന്റ് ജെയർ ബൊൾസൊനാരോയുടെ മകനാണ് ലുലയുടെ എതിരാളിയായ ഫ്ലാവിയോ ബൊൾസൊനാരോ. ബ്രസീലിൽ രാഷ്ട്രീയ ധ്രുവീകരണം ശക്തമായ സാഹചര്യത്തിലാണ് പുതിയ ജനവിധി പുറത്തുവന്നിരിക്കുന്നത്. 2027 ജനുവരി അഞ്ചിന് ലുല സത്യപ്രതിജ്ഞ ചെയ്ത് അധികാരമേൽക്കുമെന്നാണ് റിപ്പോർട്ട്. ഇതോടെ ബ്രസീലിന്റെ ജനാധിപത്യ ചരിത്രത്തിൽ നാലാം തവണയും പ്രസിഡന്റ് പദവിയിലെത്തുന്ന നേതാവെന്ന നേട്ടം ലുലയ്ക്ക് സ്വന്തമാകും. പുതിയ സർക്കാരിന്റെ സാമ്പത്തിക നയങ്ങളും പാർലമെന്റിലെ രാഷ്ട്രീയ സമവാക്യങ്ങളും ഇനി രാജ്യത്തിന്റെ ഭാവി നിർണയിക്കുന്നതിൽ നിർണായകമാകും.