ഇന്ത്യൻ സൂപ്പർ ലീഗ്  ഫുട്‌ബോൾ 2023 - 2024 സീസണിൽ ഏറ്റവും മികച്ച ഫോമിൽ കളിക്കുന്ന രണ്ട് ക്ലബ്ബുകളിൽ ഒന്നാണ് കേരളത്തിന്റെ സ്വന്തം കേരള ബ്ലാസ്‌റ്റേഴ്‌സ് എഫ് സി . സീസണിലെ ആദ്യ രണ്ട് മത്സരങ്ങളിലും കേരള ബ്ലാസ്‌റ്റേഴ്‌സ് എഫ് സി ജയം സ്വന്തമാക്കി. ബംഗളൂരു എഫ് സിക്കെതിരായ സീസൺ ഉദ്ഘാടന മത്സരത്തിൽ 2 - 1നും രണ്ടാം മത്സരത്തിൽ ജംഷഡ്പുർ എഫ് സിക്ക് എതിരെ 1 - 0 നുമായിരുന്നു കേരള ബ്ലാസ്റ്റേഴ്‌സ് എഫ് സിയുടെ ജയം. ആരാധകരെ ആവേശത്തിലാറാടിക്കാൻ ഈ ജയങ്ങളിലൂടെ മഞ്ഞപ്പടയ്ക്ക്  സാധിച്ചിരുന്നു. രണ്ട് മത്സരങ്ങളിലും കേരള ബ്ലാസ്റ്റേഴ്‌സ് എഫ് സിയുടെ ജയം നിർണയിച്ച നിർണായക ഗോൾ നേടിയത് ഉറുഗ്വെൻ പ്ലേമേക്കറായ അഡ്രിയാൻ ലൂണ ആയിരുന്നു. 2023 - 2024 സീസണിൽ കേരള ബ്ലാസ്‌റ്റേഴ്‌സ് എഫ് സിയുടെ ക്യാപ്റ്റന്റെ ആം ബാൻഡ് അണിയുന്നത് അഡ്രിയാൻ ലൂണയാണ്. എന്നാൽ, കളത്തിൽ അഡ്രിയാൻ ലൂണ മാത്രമല്ല കേരള ബ്ലാസ്റ്റേഴ്‌സ് എഫ് സിയുടെ മത്സരം നിയന്ത്രിക്കുന്ന നായകൻ എന്നതാണ് വാസ്തവം.

അഡ്രിയാൻ ലൂണയാണ് ക്യാപ്റ്റന്റെ ആം ബാൻഡ് അണിയുന്നതെങ്കിലും പ്രതിരോധത്തിലുള്ള പ്രബീർ ദാസ്  പ്രീതം കോട്ടാൽ എന്നിവരും ക്യാപ്റ്റൻ റോൾ ഏറ്റെടുത്ത് മനോഹരമായി അത് നിർവഹിക്കുന്നു എന്നതാണ് കേരള ബ്ലാസ്‌റ്റേഴ്‌സ് എഫ് സിയുടെ നിലവിലെ കരുത്ത്. 2023 - 2024 വേനൽക്കാല ട്രാൻസ്ഫർ വിൻഡോയിലൂടെയാണ് പ്രബീർ ദാസും പ്രീതം കോട്ടാലും കേരള ബ്ലാസ്‌റ്റേഴ്‌സ് എഫ് സിയിൽ എത്തിയത്. ഇത്ര മികച്ച നായകന്മാർ ഇത്തവണ ഒരുമിച്ച് ടീമിലുണ്ടാകുമെന്ന് ബ്ലാസ്റ്റേഴ്സിന്റെ ആരാധകർ സീസണ് മുൻപ് ഒട്ടും പ്രതീക്ഷിച്ചിരുന്നില്ല . 

2022 - 2023 സീസണിൽ മോഹൻ ബഗാൻ സൂപ്പർ ജയന്റ് ക്ലബ്ബിനെ ഐ എസ് എൽ കിരീടത്തിൽ എത്തിച്ച ക്യാപ്റ്റനാണ് പ്രീതം കോട്ടാൽ. അതുകൊണ്ടുതന്നെ നേതൃ പാടവത്തിൽ അദ്ദേഹത്തിന്റെ മിടുക്ക് കേരള ബ്ലാസ്റ്റേഴ്‌സ് എഫ് സിയുടെ ഡിഫെൻസിൽ വ്യക്തം.

പ്രബീർ ദാസാണെങ്കിലും മത്സരത്തിൽ തന്റെ പരിചയ സമ്പത്തിനാൽ കരുത്തനാണ്. പരിചയ സമ്പത്തിൽ ടീമിനെ നയിക്കാൻ പ്രബീർ ദാസിനും സാധിക്കുന്നു. അതായത് അഡ്രിയാൻ ലൂണ ടീമിനെ മുന്നിൽ നിന്ന് നയിക്കുമ്പോൾ പ്രബീർ ദാസ്, പ്രീതം കോട്ടാൽ ദ്വയം പിന്നിൽ നിന്നും നയിക്കുന്നു. ചുരുക്കത്തിൽ കേരള ബ്ലാസ്റ്റേഴ്‌സ് എഫ് സിക്ക് മൂന്ന് ക്യാപ്റ്റന്മാരുടെ കരുത്താണ് ഓരോ മത്സരത്തിലും ഉള്ളത്. ഇത് ഈ സീസണിൽ ടീമിനെ എത്രത്തോളം ശക്തമാക്കുന്നുവെന്ന് ആദ്യ മത്സരങ്ങളിൽ നാം കണ്ടുകഴിഞ്ഞു. മോഹൻ ബഗാൻ സൂപ്പർ ജയന്റ് ക്ലബ്ബും കേരള ബ്ലാസ്റ്റേഴ്‌സ് എഫ് സിയും മാത്രമാണ് 2023 - 2024 സീസണിലെ ആദ്യ രണ്ട് മത്സരങ്ങളിലും ജയം നേടിയത്. ഞായറാഴ്ച മുംബൈ സിറ്റി എഫ് സിക്ക് എതിരെയാണ് കേരള ബ്ലാസ്റ്റേഴ്‌സ് എഫ് സിയുടെ അടുത്ത മത്സരം. ഒരു ജയവും ഒരു സമനിലയുമായി നാല് പോയിന്റോടെ നാലാം സ്ഥാനത്താണ് മുംബൈ സിറ്റി എഫ് സി. മുംബൈയിലാണ് കേരള ബ്ലാസ്റ്റേഴ്‌സ് എഫ് സി x മുംബൈ സിറ്റി പോരാട്ടം. ഈ സീസണിൽ ബ്ലാസ്‌റ്റേഴ്‌സിന്റെ ആദ്യ എവേ മത്സരമാണ്. സീസണിലെ തുടർച്ചയായ മൂന്നാം ജയമാണ് മുംബൈ സിറ്റിക്കെതിരെ കേരളത്തിന്റെ മഞ്ഞപ്പട ലക്ഷ്യം വെക്കുന്നത്. ..

 മാഗ്ന വിഷൻ ടി വി ന്യൂസ് ഇവിടെ സമാപിക്കുന്നു  .