28 വർഷം നീണ്ട ലോകസഞ്ചാരം പൂർത്തിയാക്കി ബ്രിട്ടീഷ് സാഹസിക സഞ്ചാരി കാൾ ബുഷ്ബി ഇന്ന് സ്വന്തം നഗരമായ ഹളിൽ തിരിച്ചെത്തുന്നു. ഏകദേശം 31,000 മൈൽ അഥവാ 50,000 കിലോമീറ്റർ ദൂരം കാൽനടയായി സഞ്ചരിച്ചാണ് 57-കാരനായ ബുഷ്ബി തന്റെ ചരിത്രപരമായ യാത്ര പൂർത്തിയാക്കുന്നത്. 1998-ൽ തെക്കേ അമേരിക്കയിലെ ചിലിയിൽ നിന്നാണ് അദ്ദേഹം ഈ സാഹസിക യാത്ര ആരംഭിച്ചത്. അന്ന് 29 വയസ്സുകാരനായിരുന്ന ബുഷ്ബി യാത്ര തുടങ്ങുമ്പോൾ അഞ്ചുവർഷത്തിനുള്ളിൽ ലക്ഷ്യത്തിലെത്താമെന്നാണ് കരുതിയിരുന്നത്. എന്നാൽ വിവിധ രാജ്യങ്ങളിലെ യാത്രാനിയന്ത്രണങ്ങളും രാഷ്ട്രീയ പ്രശ്നങ്ങളും പ്രകൃതിദുരന്തങ്ങളും കാരണം യാത്ര 28 വർഷത്തോളം നീണ്ടു. മോട്ടോർ വാഹനങ്ങൾ ഉപയോഗിച്ച് യാത്ര മുന്നോട്ടുകൊണ്ടുപോകരുതെന്നും യാത്ര പൂർത്തിയാക്കുന്നതിന് മുമ്പ് ബ്രിട്ടനിലേക്ക് മടങ്ങരുതെന്നും അദ്ദേഹം സ്വയം രണ്ട് നിബന്ധനകൾ ഏർപ്പെടുത്തിയിരുന്നു. തെക്കേ അമേരിക്ക, വടക്കേ അമേരിക്ക, ഏഷ്യ, യൂറോപ്പ് എന്നീ നാല് ഭൂഖണ്ഡങ്ങളിലൂടെ അദ്ദേഹം സഞ്ചരിച്ചു. ആകെ 30 രാജ്യങ്ങളിലൂടെയാണ് ഈ യാത്ര കടന്നുപോയത്. ബേരിങ് കടലിടുക്കിലെ മഞ്ഞുപാളികൾ മറികടന്നതും കാസ്പിയൻ കടൽ നീന്തിക്കടന്നതും യാത്രയിലെ ഏറ്റവും വലിയ വെല്ലുവിളികളിലൊന്നായിരുന്നു. ഇംഗ്ലീഷ് ചാനൽ നീന്തിക്കടന്ന ശേഷമാണ് അദ്ദേഹം വീണ്ടും ബ്രിട്ടനിലെത്തിയത്. റഷ്യയിലെ യാത്രയ്ക്കിടെ വിസാ പ്രശ്നങ്ങളും തടങ്കലും ഉൾപ്പെടെയുള്ള പ്രതിസന്ധികൾ നേരിടേണ്ടിവന്നു. രാഷ്ട്രീയ സാഹചര്യങ്ങൾ കാരണം യാത്രാമാർഗങ്ങൾ അടഞ്ഞപ്പോൾ കാസ്പിയൻ കടൽ നീന്തിക്കടക്കാനുള്ള തീരുമാനവും അദ്ദേഹത്തിന് എടുക്കേണ്ടിവന്നു. ഇന്നലെ ഹംബർ പാലം കടന്നെത്തിയപ്പോൾ നിരവധി ആളുകളാണ് അദ്ദേഹത്തെ ആവേശത്തോടെ സ്വീകരിച്ചത്. ജനങ്ങളുടെ സ്നേഹപൂർവമായ സ്വീകരണം തന്നെ അത്ഭുതപ്പെടുത്തിയെന്നും അദ്ദേഹം പ്രതികരിച്ചു. ഇന്ന് രാവിലെ ഹളിലെ ക്വീൻ വിക്ടോറിയ സ്ക്വയറിൽ ഏകദേശം പതിനൊന്ന് മണിയോടെ അദ്ദേഹത്തെ ഔദ്യോഗികമായി സ്വീകരിക്കാനാണ് നഗരസഭയുടെ തീരുമാനം. നഗരവാസികളും സന്ദർശകരും രാവിലെ പത്തുമണി മുതൽ സ്ക്വയറിൽ എത്തണമെന്ന് അധികൃതർ അഭ്യർഥിച്ചിട്ടുണ്ട്. ഹളിലെ ലോർഡ് മേയർ മരിയ കൗവാർഡ് അദ്ദേഹത്തെ സിറ്റി ഹാളിന് മുന്നിൽ സ്വീകരിക്കും. തുടർന്ന് സിറ്റി ഹാളിൽ പ്രത്യേക സ്വീകരണവും മാധ്യമങ്ങളുമായി കൂടിക്കാഴ്ചയും നടക്കും. അതിനുശേഷം നഗരത്തിന്റെ വടക്കുഭാഗത്തുള്ള സ്വന്തം കുടുംബവീട്ടിലേക്ക് അവസാനഘട്ട യാത്ര അദ്ദേഹം തുടരും. പത്തുവർഷത്തോളമായി നേരിൽ കാണാത്ത മാതാവിനെയും മകനെയും പേരക്കുട്ടിയെയും കാണാനാകുമെന്നത് ഈ മടക്കയാത്രയെ കൂടുതൽ വൈകാരികമാക്കുന്നു. 28 വർഷം നീണ്ട അസാധാരണമായ സാഹസിക യാത്രയ്ക്ക് ഇന്ന് സ്വന്തം വീട്ടുമുറ്റത്ത് സമാപനമാകുകയാണ്.